ប្រទេស​អា​រ៉ា​ប៊ី​សា​អូឌីត ៖ លី​គ​បាល់ទាត់​អាជីព​អា​រ៉ា​ប៊ី​សា​អូឌីត (SPL) បាន​ក្រើនរំលឹក​ជា​ផ្លូវការ​ដល់​កីឡាករ Cristiano Ronaldo អំពី​ការ​ដើរ​ហួស​សិទ្ធិ​កំណត់​របស់​ខ្លួន បន្ទាប់​ពី​របាយការណ៍​ថា ខ្សែប្រយុទ្ធ​ឆ្នើម​សញ្ជាតិ​ព័រ​ទុ​យ​ហ្គា​ល់​រូប​នេះ ធ្វើ​ពហិការ​លេង​ឱ្យ​ក្រុម Al Nassr ដើម្បី​ប្រឆាំង​នឹង​មូលនិធិ​វិនិយោគសាធារណៈ​អា​រ៉ា​ប៊ី​សា​អូឌីត (PIF) ជុំវិញ​ការ​ចោទប្រកាន់​ថា​លំអៀង​ទៅ​រក​ក្លិប​ជា​គូប្រជែង​។ នេះ​បើ​តាម​ប្រភព​ពី ESPN ចេញផ្សាយ​កាលពី​ពេល​ថ្មី​ៗ​នេះ​។

SPL បាន​ចេញ​សេចក្តីថ្លែងការណ៍​ដ៏​ម៉ឺងម៉ាត់​មួយ​កាលពី​ស​ប្តា​ហ៍​មុន​ថា ដោយ​បញ្ជាក់​ថា គ្មាន​តួឯក​ណា​ម្នាក់​ឡើយ ទោះជា​មាន​សារៈសំខាន់​យ៉ាងណា​ក៏​ដោយ ក៏​មិន​អាច​សម្រេចចិត្ត​លើស​ពី​ក្លិប​របស់​ពួក​គេ​។ សេចក្តីថ្លែងការណ៍​នេះ ឆ្លើយ​តប​ទៅ​នឹង​ការ​ធ្វើ​ពហិការ​ថ្មី​ៗ​របស់ Ronaldo នៅ Al Nassr បន្ទាប់​ពី​ប្រធាន​ក្រុម​វ័យ​៤១​ឆ្នាំ​រូប​នេះ បាន​ចោទប្រកាន់​ថា PIF លំអៀង ដោយ​បរាជ័យ​ក្នុង​ការ​វិនិយោគ​សម្រាប់ Al Nassr នៅ​ក្នុង​ទីផ្សារ​ដោះ​ដូរ​រដូវរងា ខណៈ​ក្រុម​ជា​គូប្រជែង Al Hilal ដែល​ជា​កម្មសិទ្ធិ​របស់ PIF ដែរ​នោះ បែរជា​បាន​នាំ​យក​អតីត​មិត្ត​រួម​ក្រុម Real Madrid របស់​ខ្លួន​គឺ​ខ្សែប្រយុទ្ធ Karim Benzema ពី Al Ittihad កាលពី​ពេល​ថ្មី​ៗ​នេះ​។

SPL បាន​គូសបញ្ជាក់​ថា ក្លិប​ទាំងអស់​គោរព​តាម​បទ​ប្បញ្ញត្តិ​ហិរញ្ញវត្ថុ​ដូច​គ្នា​។ អ្នកនាំពាក្យ SPL ប្រាប់​កាសែត The Guardian របស់​ចក្រភព​អង់គ្លេស​ថា លី​គ​អាជីព​អា​រ៉ា​ប៊ី​សា​អូឌីត​ត្រូវ​បាន​រៀបចំ​ឡើង​ជុំវិញ​គោលការណ៍​សាមញ្ញ​មួយ ដោយ​ក្លិប​នីមួយ​ៗ​ដំណើរការ​ដោយ​ឯករាជ្យ​ក្រោម​ច្បាប់​ដូច​គ្នា​។ ការ​សម្រេចចិត្ត​លើ​ការ​ជ្រើសរើស​បុគ្គលិក ការ​ចំណាយ និង​យុទ្ធសាស្ត្រ​ស្ថិត​នៅ​លើ​ក្លិប​ទាំងនោះ ក្នុង​ក្របខ័ណ្ឌ​ហិរញ្ញវត្ថុ​ដែល​ត្រូវ​បាន​ចងក្រង​ឡើង​ដើម្បី​ធានា​បាន​នូវ​និរន្តរភាព និង​តុល្យភាព​ប្រកួតប្រជែង​។

SPL ក៏​បាន​បដិសេធ​ការ​អះអាង​អំពី​ភាព​លំអៀង​របស់ PIF ដោយ​ពន្យល់​ថា ភាព​ខុស​គ្នា​នៃ​ការ​ផ្ទេរ​កីឡាករ​បង្ហាញ​ពី​ឯករាជ្យ​ភាព​របស់​ប្រព័ន្ធ​គ្រប់គ្រង​។ ស្រប​ពេល​សកម្មភាព​ផ្ទេរ​កីឡាករ​ថ្មី​ៗ​បង្ហាញ​យ៉ាង​ច្បាស់​ពី​ឯករាជ្យ​ភាព​នោះ​។ ក្លិប​មួយ​បាន​ពង្រឹង​តាម​របៀប​ជាក់លាក់​មួយ ហើយ​ក្លិប​មួយទៀត​បាន​ជ្រើសរើស​វិធីសាស្ត្រ​ផ្សេង​។ ទាំងនោះ​គឺជា​ការ​សម្រេចចិត្ត​របស់​ក្លិប​រៀងខ្លួន ដែល​ធ្វើ​ឡើង​ក្នុង​ក្របខ័ណ្ឌ​ហិរញ្ញវត្ថុ​ដែល​ត្រូវ​បាន​អនុម័ត​បែងចែក​។ ថវិកា​ផ្ទេរ​កីឡាករ​ត្រូវ​បាន​បែងចែក​តាម​រយៈ​មូលនិធិ​កណ្តាល ដោយ​ក្រុម​ធំ​ៗ​ទាំង ៤ គឺ Al Nassr, Al Hilal, Al Ittihad និង Al Ahli ទទួល​បាន​កញ្ចប់​ថវិកា​ដែល​អាច​ប្រៀបធៀប​គ្នា​បាន​។

បច្ចុប្បន្ន​របាយការណ៍​សារព័ត៌មាន​ធំ​ៗ​លើ​ពិភពលោក បាន​រាយការណ៍​ថា Cristiano Ronaldo ដែល​ឈាន​ចូល​វ័យ​៤១​ឆ្នាំ កាលពី​ថ្ងៃ​ទី​៥ ខែកុម្ភៈ ឆ្នាំ​២០២៦ កំពុង​មិន​ពេញចិត្ត​យ៉ាង​ខ្លាំង​នឹង​កង្វះ​សកម្មភាព​របស់ Al Nassr នៅ​ក្នុង​ទីផ្សារ​ដោះ​ដូរ​កីឡាករ​ខែមករា រហូត​មាន​របាយការណ៍​ខ្លះ​លើក​ឡើង​ថា អតីត​ខ្សែប្រយុទ្ធ​ឆ្នើម​ក្រុម Sporting Lisbon, Manchester United, Real Madrid និង Juventus រូប​នេះ ចង់​ចាក​ចេញពី​អាជីព​នៅ​ក្នុង​ប្រទេស​អា​រ៉ា​ប៊ី​សា​អូឌីត​ថែម​ទៀត​ផង​។ តាម​របាយការណ៍​ពី talkSPORT បានឱ្យ​ដឹង​ថា Ronaldo បាន​ផ្ញើ​សារ​ដោយ​ផ្ទាល់​ទៅ​ថ្នាក់ដឹកនាំ PIF និង SPL ដោយ​បញ្ជាក់​ពី​ការ​ត្រៀមខ្លួន​ចាក​ចេញពី​ប្រទេស​អា​រ៉ា​ប៊ី​សា​អូឌីត​៕