រាជធានី​ភ្នំពេញ ៖ អ្នកចាំទី​ដៃ​ទី​១​របស់​ក្លិបព្រះ​ខ័ន​រាជ​ស្វាយ​រៀង​កីឡាករ វី​រៈ ដា​រ៉ា បានបង្ក​ការ​ភ្ញាក់ផ្អើល​យ៉ាង​ខ្លាំង​ក្នុង​ពិភព​បាល់ទាត់កម្ពុជា ក្រោយ​ពី​រូបគេ​ប្រើ​ពេល​ត្រឹមតែ​៩វិនាទី​ប៉ុណ្ណោះ​ដើម្បី​ទាត់​បាល់​ពី​ចម្ងាយ​បញ្ចូលទី​គូប្រកួត​ជួយ​ក្លិប​របស់​ខ្លួន​នាំមុខ​ក្លិប​អាយអេស​អាយ ដង្កោ​សែន​ជ័យ នៅ​ដើម​វគ្គ​ទី​១នៃ​ជំនួប​លី​គ​កំពូល​កម្ពុជា កាលពី​ល្ងាច​ថ្ងៃ​ទី​១៩ ខែវិច្ឆិកា ឆ្នាំ​២០២៥ ។

មួយ​គ្រាប់​របស់​អ្នកចាំទី​វី​រៈ ដា​រ៉ា ទំនងជាជាប់​កំណត់​ត្រា​គ្រាប់​បាល់​ស៊ុត​បញ្ចូល​ទី​ពី​ចម្ងាយលឿន​បំផុត​លើ​ពិភពលោក​ក្នុង​ចំណោម​អ្នក​ចាំទី​អាជីព​ជា​ច្រើន​នាក់​ដែល​រក​គ្រាប់​បាល់​បានឱ្យ​ក្រុម​របស់​ខ្លួន​តាម​របៀប​ស្រ​ដៀង​គ្នា​នេះ ។
គ្រាប់​បាល់​ស៊ុត​បញ្ចូល​ទី​ពី​ចម្ងាយ​លឿន​បំផុតរបស់​អ្នកចាំទី វី​រៈ ដា​រ៉ា ដែល​ប្រើ​ពេល​ត្រឹម៩​វិនាទី​ប៉ុណ្ណោះ​បន្ទាប់​ពី​កែ​បាល់​នៅ​ដើម​វគ្គ​ទី​១បាន​បំបែក​កំណត់​ត្រា​គ្រាប់​បាល់​ស៊ុត​បញ្ចូលទី​ពី​ចម្ងាយ​លឿន​បំផុត​របស់​អ្នកចាំទី​អាជីព​មួយ​ចំនួន​ដែល​ធ្វើ​បាន​នា​ពេល​កន្លង​មក​ដូច​ជា​៖

១-​វី​រៈ ដា​រ៉ា – ៩ វិនាទី (CPL, ១៩ វិច្ឆិកា ឆ្នាំ​២០២៥)
២-Asmir Begović-១៣ វិនាទី (Premier League, ០២ វិច្ឆិកា ២០១៣)
៣- Paul Smith – ១៥ វិនាទី (EFL Cup, ១៨ កញ្ញា ២០០៧) និង
៤-Matías Dituro -១៨ វិនាទី (​លី​គ​កំពូល
បូ​លី​វី (Bolivia League), ២៦ មេ​សា ឆ្នាំ ២០១៧)​។

សូម​រំ​ឮ​កថា វី​រៈ ដា​រ៉ា ក្រៅពី​ធ្វើ​ជា​អ្នកចាំទី​ឱ្យ​ក្លិប​ព្រះ​ខ័ន​រាជ​ស្វាយ​រៀង រូបគេ​ក៏​ជា​អ្នកចាំទី​ឱ្យ​ក្រុម​ជម្រើសជាតិ​កម្ពុជា​ផង​ដែរ​។

ក្នុង​តួនាទី​ជា​អ្នកចាំទី​ឱ្យ​ក្រុម​ជម្រើសជាតិកីឡាករ​រូប​នេះ​ទើប​រួច​ផុត​ពី​ការ​ចោទប្រកាន់ជុំវិញ​សកម្មភាព​មិន​ប្រក្រតី​ក្នុង​ជំនួប​ពានរង្វាន់ ASEAN Championship Mitsubishi Electric Cup នៅ​កីឡដ្ឋាន​ជាតិ​សិង្ហ​បុរី ដែល​ធ្វើ​ឱ្យ​ក្រុម​ជម្រើសជាតិ​កម្ពុជាចាញ់​សិង្ហ​បុរី ២-១ ។ ២​គ្រាប់​របស់​ក្រុម​ម្ចាស់ផ្ទះ សុទ្ធតែ​កើត​ចេញពី​ការ​បញ្ជូន​បាល់​មិន​បាន​ល្អ​របស់​អ្នកចាំទី​កម្ពុជា​រូប​នេះ​ត្រឹម​រយៈពេល​ប្រមាណ​១៦​នាទី​ប៉ុណ្ណោះ ។

ការ​របូត​គ្រាប់​បាល់​ដោយ​ងាយ​ៗ​នេះ ត្រូវបាន​មហាជន ពិសេស​អ្នកគាំទ្រ​ដាក់​ការ​សង្ស័យលើ វី​រៈ ដា​រ៉ា ថា ប្រព្រឹត្ត​ទ​ង្វើ​រៀបចំ​លទ្ធផល​ទុកជា​មុន នាំ​ឲ្យ​សហព័ន្ធ​បើក​ការ​ស៊ើបអង្កេត រហូត​ដល់​ថ្ងៃ​ទី​០៥ ខែមីនា ឆ្នាំ​២០២៥ ទើប​ប្រកាស​លទ្ធផល​ថា វី​រៈ ដា​រ៉ា មិន​បាន​ប្រព្រឹត្តទ​ង្វើ​ដូច​ការ​សង្ស័យ​នោះ​ឡើយ​៕