រាជធានីភ្នំពេញ ៖ ការបាត់មុខយ៉ាងយូររបស់កីឡាករជើងចាស់ ឈាន វិច្ឆិកា មកពីក្លិបកុសលកីឡា ពេលមកប៉ះរាជសីហ៍ បាបា មកពីក្លិបសម្រែករាជសីហ៍បង្ក្រាបគ្រឿងញៀ.ននៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ កាលពីរសៀលថ្ងៃអាទិត្យ ទី២៧ មេសា គេបានបង្ហាញនូវភាពទន់ខ្សោយយ៉ាងខ្លាំង ។
រាជធានីភ្នំពេញ ៖ ការបាត់មុខយ៉ាងយូររបស់កីឡាករជើងចាស់ ឈាន វិច្ឆិកា មកពីក្លិបកុសលកីឡា ពេលមកប៉ះរាជសីហ៍ បាបា មកពីក្លិបសម្រែករាជសីហ៍បង្ក្រាបគ្រឿងញៀននៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ កាលពីរសៀលថ្ងៃអាទិត្យ ទី២៧ មេសា គេបានបង្ហាញនូវភាពទន់ខ្សោយយ៉ាងខ្លាំង ។
កីឡាកររូបនេះប៊ិៈតែនឹងសន្លប់ក្រោមផ្លែជង្គង់រាជសីហ៍ បាបា តាំងពីនៅក្នុងទឹកទី៣ ម៉្លេះ បុ៉ន្តែសំណាងហើយដែលគេអាចតស៊ូប្រកួតដល់ទឹកទី៥ ហើយទទួលលទ្ធផលត្រឹមចាញ់ដោយពិន្ទុ ។ ចំណែក ទេស សំខាន់ មកពីក្លិបកងពលតូចលេខ៧០ បានធ្វើឱ្យកំពូលអ្នកលេងស្នៀតជើង សារឹម ង៉ា មកពីសមាគមកីឡាប្រដាល់ក្រសួងការពារជាតិ ចាញ់ការប្រកួតដោយពិន្ទុទាំងមិនអស់ចិត្តឡើយ ។ ឈាន វិច្ឆិកា គឺជាអ្នកប្រដាល់ជើងចាស់មួយរូបដែលមានល្បិចប្រយុទ្ធនៅលើសង្វៀនមិនធម្មតាបុ៉ន្មានឡើយ បុ៉ន្តែការបាត់មុខពីលើសង្វៀនរបស់គេមួយរយៈមកនេះទាំងល្បិចប្រយុទ្ធ ទាំងកម្លាំងហាក់ដូចជាមានការស្រុតចុះជាងមុនឆ្ងាយណាស់ ។ ជាក់ស្តែង ពេលមកប៉ះរាជសីហ៍ បាបា លើកនេះរាល់ការវាយ និងទាត់គេធ្វើបានល្អត្រឹមទឹកទី១ និងទី២ បុ៉ណ្ណោះ លុះចូលដល់ទឹកទី៣ គេចាប់ផ្តើមបង្ហាញពីភាពទន់ខ្សោយរបស់ខ្លួនតាមរយៈការលើកដៃលើកជើងស្ទើរមិនចង់រួច ហើយបណ្តោយឱ្យគូប្រកួតបុកផ្លែជង្គង់ចូលពោះទឹកពេញៗបណ្តាលឱ្យចុករមូល ត្រូវអាជ្ញាកណ្តាលលោកឡុង សាលវ័ន្ត រាប់៨ រហូតដល់ទៅ២លើកឯណោះ ។ ហើយបើកុំតែស្នូរជួងបញ្ចប់ទឹកទី៣ ជួយទាន់ កុំអីគេមិនអាចគេចផុតពីសន្លប់បានឡើយ ។ រាជសីហ៍ បាបា នៅតែបន្តបុកជង្គង់ និងវាយកែងយ៉ាងសន្ធាប់ទៀតពេលឈានចូលដល់ទឹកទី៤ ។
បុ៉ន្តែរាល់ការដើរចូលវាយនោះត្រូវ ឈាន វិច្ឆិកា ទាត់ស្កាត់ និងម៉ាត់បកសងវិញដោយមិនទុកឱកាសឱ្យគូប្រកួតចូលចាប់ក្រៀកដើម្បីឡើងជង្គង់បានស្រេចតែចិត្តដូចមុនទៀតឡើយ ។ ទោះបីជាយ៉ាងណា ស្ថានភាពប្រកួតរបស់ ឈាន វិច្ឆិកា នៅតែបង្ហាញពីភាពទន់ខ្សោយជាលំដាប់ និយាយរួមគេបានត្រឹមតែការពារខ្លួនពីការវាយលុករបស់គូប្រកួតបុ៉ណ្ណោះ ទើបលទ្ធផលចុងក្រោយគេត្រូវចាញ់ពិន្ទុរាជសីហ៍ បាបា ដែលគេចាត់ទុកថា គឺជាសំណាងហើយ ។ ការជួបគ្នារវាង ទេស សំខាន់ និងសារឹម ង៉ា ស្តែងចេញលទ្ធផលខុសពីការរំពឹងទុកដែលថា ទេស សំខាន់ មិនអាចទៅរួចជាមួយសារឹម ង៉ា បាននោះ ។ បើធ្វើការប្រៀបធៀបទៅលើកម្លាំង និងល្បិចប្រយុទ្ធវិញនោះគឺ សារឹម ង៉ា ល្អជាងទើបមានការយល់ឃើញបែបនេះ ។ បុ៉ន្តែការជួបគ្នាលើកនេះតាំងពីទឹកទី១ រហូតដល់ទឹកទី៥ រាល់ការដើរចូលម៉ាត់ និងទាត់របស់ សារឹម ង៉ា ទៅលើ ទេស សំខាន់ គឺត្រូវវាយបកសងវិញភ្លាមទាំងកែង និងជង្គង់ដែលជាហេតុធ្វើឱ្យ សារឹម ង៉ា មិនសូវមានឱកាសវាយបានល្អឡើយ។ សារឹម ង៉ា ស្ទើរតែលែងហ៊ានចូលកៀកផ្តេសផ្តាស ខណៈពេលដែលត្រូវ ទេស សំខាន់ បុកចូលពោះទឹក និងវាយកែងផ្ទួននៅចុងទឹកទី៣ និងទឹកទី៤ រួចមកនោះ ។
ទេស សំខាន់ ក៏មិនហ៊ានសម្រុកចូលផ្តេសផ្តាសនោះដែរ គឺគេបានត្រឹមតែវាយជាប្រយោលបុ៉ណ្ណោះ ទើបការយកឈ្នះពិន្ទុ សារឹម ង៉ា លើកនេះបានមកដោយតឹងតែងបំផុត ។ នៅលើសង្វៀនដដែល កីឡាករកន ចន្ថា មកពីសមាគមកីឡាប្រដាល់ក្រសួងការពារជាតិ យកឈ្នះកីឡាករធី តុងហុី មកពីក្លិបសាលវ័ន្តកីឡាដោយពិន្ទុ ។ កីឡាករគុណ សំណង មកពីក្លិបខេមរិន្ទមានឫទ្ធិ បានយកឈ្នះពិន្ទុកីឡាករសោម វិឆ័យ មកពីក្លិបសាលវ័ន្តកីឡា និងកីឡាករអឹុម វិបុល មកពីក្លិបគជសារកីឡា ក៏បានយកឈ្នះពិន្ទុកីឡាករម៉ន ចន្នី មកពីក្លិបការិយាល័យទី៥ កងទ័ពជើងគោកដូចគ្នាដែរ ៕
ចែករំលែកព័តមាននេះ