ក្រសួងធនធានមនុស្សនិងសន្ដិសុខសង្គមរបស់ចិនបានឱ្យដឹងថា នៅក្នុងរយៈពេល៣ខែដំបូងនៃឆ្នាំ២០១៤ នេះ អត្រាមានការងារធ្វើនៅតាមតំបន់ទីប្រជុំជនឬទីក្រុងក្នុងប្រទេសចិនបានកើនឡើងជាង៣,៤លាននាក់ ។ កំណើននេះខ្ពស់ជាងតួលេខនៅក្នុងអំឡុងពេលដូចគ្នាកាលពីឆ្នាំមុនបើទោះជាកំណើនសេដ្ឋកិច្ចក្នុងប្រទេសធ្លាក់ចុះទៅក្នុងកម្រិតទាបបំផុតរបស់ខ្លួនចាប់តាំងពីត្រីមាសទី៣នៃឆ្នាំ២០១២ ក៏ដោយ ។
លោកLi Zhong អ្នកនាំពាក្យរបស់ក្រសួងបានថ្លែងប្រាប់អ្នកសារព័ត៌មានថា អត្រាអត់ការងារធ្វើនៅតាមតំបន់ទីក្រុងដែលបានចុះបញ្ជីនៅក្នុងដំណាច់ខែមីនាកន្លងមកមាន៤,១% ធ្លាក់ចុះពីមួយឆ្នាំទៅមួយឆ្នាំ ។ លោកបានបន្តទៀតថា ការកើនឡើងនៅក្នុងអត្រាការងារនិងការថយចុះនៃភាពអត់ការងារធ្វើគឺសម្រេចដោយកត្ដា៣ចំណុចសំខាន់ៗរួមមាន ការធ្វើឱ្យប្រសើរឡើងនៃហេដ្ឋារចនាសម្ព័ន្ធសេដ្ឋកិច្ច ការធ្វើឱ្យមានភាពងាយស្រួលនៃវិធានការដ្ឋបាល និងវិធានការការងារជំនាញ ។
ក្រសួងក៏បានអះអាងផងដែរថា រដ្ឋាភិបាលកណ្ដាលក៏បានពុះពារដើម្បីធ្វើឱ្យប្រសើរឡើងនូវស្ថានភាពនៃភាពមានការងារធ្វើសម្រាប់កម្មករនៅតាមតំបន់ជនបទផងដែរដែលក្នុងនោះបានបង្កើតការងារពលរដ្ឋចំនួន៧,៣លាននាក់ក្នុងសហគ្រាសក្នុងស្រុក និងបានរៀបចំការងារឱ្យពលរដ្ឋបានធ្វើការចំនួន៦,៥លាននាក់នៅតំបន់ផ្សេងៗ ។ ជាងនេះទៅទៀតអត្រាពលករចំណាកស្រុករបស់ប្រទេសចិនមានចំនួន២៦៩លាននាក់នៃបរិមាណ៥៤%ដែលធ្វើការនៅក្នុងស្រុកកំណើតរបស់ពួកគេ ៕
ចែករំលែកព័តមាននេះ