ទីក្រុងប៉េកាំង ៖ យោងតាមប្រព័ន្ធផ្សព្វផ្សាយរដ្ឋចិន កាលពីថ្មីៗនេះ បានបង្ហាញថា ជើងហោះហើរប្រហែល ៤០% ពីប្រទេសចិនទៅកាន់ប្រទេសជប៉ុននៅក្នុងខែធ្នូ ត្រូវបានលុបចោល ខណៈដែលភាពតានតឹងផ្នែកនយោបាយកំពុងកើនឡើងកម្តៅកាន់តែខ្លាំង។…
ទីក្រុងប៉េកាំង ៖ យោងតាមប្រព័ន្ធផ្សព្វផ្សាយរដ្ឋចិន កាលពីថ្មីៗនេះ បានបង្ហាញថា ជើងហោះហើរប្រហែល ៤០% ពីប្រទេសចិនទៅកាន់ប្រទេសជប៉ុននៅក្នុងខែធ្នូ ត្រូវបានលុបចោល ខណៈដែលភាពតានតឹងផ្នែកនយោបាយកំពុងកើនឡើងកម្តៅកាន់តែខ្លាំង។
បើតាមការចុះផ្សាយរបស់ទូរទស្សន៍រដ្ឋចិន CCTV បានឱ្យដឹងថា ដោយស្រង់ទិន្នន័យពីបណ្តាក្រុមហ៊ុនអាកាសចរណ៍ចិនដែលមិនបញ្ចេញឈ្មោះបានឱ្យដឹងថា ជើងហោះហើរលើសពី ១ ៩០០ ជើងត្រូវបានលុបចោល។ ការធ្លាក់ចុះនេះ កំពុងត្រូវបានជំរុញស្ទើរតែទាំងស្រុងដោយបណ្តាក្រុមហ៊ុនអាកាសចរណ៍ចិន។ របាយការណ៍ពីក្រុមហ៊ុនទិន្នន័យកាលវិភាគជើងហោះហើរ AeroRoutes បង្ហាញថា ទីក្រុងសាប៉ូរ៉ូ (Sapporo) និងអូសាកា (Osaka) របស់ប្រទេសជប៉ុន ដែលពឹងផ្អែកយ៉ាងខ្លាំងលើវិស័យទេសចរណ៍នោះ ក៏បានឃើញការធ្លាក់ចុះយ៉ាងច្រើនបំផុតនៃសេវាកម្មដែលបានគ្រោងទុក។
បើតាមការចុះផ្សាយរបស់ទីភ្នាក់ងារព័ត៌មាន Bloomberg កាលពីខែវិច្ឆិកាកន្លងទៅ បានឱ្យដឹងថា ប្រទេសចិនបានប្រាប់បណ្តាក្រុមហ៊ុនអាកាសចរណ៍របស់ខ្លួន ឱ្យកាត់បន្ថយចំនួនជើងហោះហើរទៅកាន់ប្រទេសជប៉ុនរហូតដល់ខែ មីនា ឆ្នាំ ២០២៦ នេះជាសញ្ញាមួយបង្ហាញថា ចិនបានត្រៀមខ្លួនរួចជាស្រេច សម្រាប់ជម្លោះរយៈពេលវែងជាមួយនឹងប្រទេសជប៉ុន។
ភាពតានតឹងផ្នែកនយោបាយរវាងប្រទេសសេដ្ឋកិច្ចធំបំផុតទាំង២នៅអាស៊ី បានចាប់ផ្តើមនៅក្នុងខែវិច្ឆិកា ដែលបង្កឡើងដោយការអត្ថាធិប្បាយរបស់នាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈី (Sanae Takaichi) ទៅកាន់សភាថា ការវាយប្រហាររបស់ចិនលើកោះតៃវ៉ាន់ ដែលគំរាមកំហែងដល់ការរស់រានមានជីវិតរបស់ជប៉ុន អាចជំរុញឱ្យមានការឆ្លើយតបផ្នែកយោធាពីជប៉ុន។
ការលើកឡើងនេះធ្វើឱ្យចិនក្តៅស្លឹកត្រចៀកយ៉ាងខ្លាំង ដោយបានចេញការព្រមានស្តីអំពីសុវត្ថិភាពប្រឆាំងនឹងការធ្វើដំណើរទៅកាន់ប្រទេសជប៉ុន ដែលជំរុញឱ្យក្រុមហ៊ុនអាកាសចរណ៍ចិនលុបចោលជើងហោះហើររហូតដល់ថ្ងៃទី៣១ ធ្នូ។ ការព្រមានបានគំរាមកំហែងដល់សន្ទុះទេសចរណ៍របស់ប្រទេសជប៉ុន ដែលជាចលករដ៏សំខាន់ក្នុងចំណោមចលករដ៏សំខាន់មួយចំនួននៅក្នុងសេដ្ឋកិច្ចរបស់ជប៉ុនដែលកំពុងធ្លាក់ចុះ។ Bloomberg បានរាយការណ៍ពីមុនថា ប្រទេសជប៉ុនអាចខាតបង់ពីការចំណាយរបស់អ្នកទេសចរជនជាតិរហូតដល់ ១,២ ពាន់លានដុល្លារអាមេរិក រវាងខែវិច្ឆិកា ដល់ចុងឆ្នាំនេះ៕
ចែករំលែកព័តមាននេះ