ប្រទេសវៀតណាម ៖ គណៈកម្មាធិការប្រជាជនទីក្រុងហាណូយ ប្រទេសវៀតណាម មានគម្រោងផ្តល់ប្រាក់លើកទឹកចិត្តចំនួន ៥ លានដុង ឬស្មើនឹង ១៩០ ដុល្លារអាមេរិក…
ប្រទេសវៀតណាម ៖ គណៈកម្មាធិការប្រជាជនទីក្រុងហាណូយ ប្រទេសវៀតណាម មានគម្រោងផ្តល់ប្រាក់លើកទឹកចិត្តចំនួន ៥ លានដុង ឬស្មើនឹង ១៩០ ដុល្លារអាមេរិក សម្រាប់ម្ចាស់ម៉ូតូប្រើសាំងដែលប្តូរមកប្រើម៉ូតូអគ្គិសនីជំនួសវិញ។ នេះបើតាមប្រភពពីសារព័ត៌មាន VnExpress កាលពីថ្ងៃទី២៤ ខែវិច្ឆិកា ឆ្នាំ២០២៥។
ផែនការគណៈកម្មាធិការប្រជាជន ដែលនឹងត្រូវបោះឆ្នោតនៅក្នុងកិច្ចប្រជុំក្រុមប្រឹក្សាក្រុងនៅសប្តាហ៍នេះ នឹងផ្តល់ប្រាក់ឧបត្ថម្ភដល់អ្នករស់នៅអចិន្ត្រៃយ៍ និងអ្នកមករស់នៅក្នុងទីក្រុងហាណូយយ៉ាងហោចណាស់ពីរឆ្នាំ។ នៅពេលដែលពួកគេទិញម៉ូតូអគ្គិសនីដែលមានតម្លៃ ១០ លានដុង ឬ ៣៧៩ ដុល្លារ ឬច្រើនជាងនេះ ពួកគេនឹងទទួលបានប្រាក់ឧបត្ថម្ភ ២០% មិនលើសពី ៥ លានដុង។
សម្រាប់ប្រជាជនក្រីក្រ និងក្បែរភាពក្រីក្រ ប្រាក់ឧបត្ថម្ភនឹងកើនឡើងដល់ ២០ លានដុង (៧៥៨ដុល្លារ) និង ១៥ លានដុង (៥៧០ដុល្លារ)។ គ្រប់គ្នានៅក្នុងទីក្រុងនឹងមានសិទ្ធិទទួលបានប្រាក់ឧបត្ថម្ភសម្រាប់ម៉ូតូ១គ្រឿង រហូតដល់ថ្ងៃទី ១ ខែមករា ឆ្នាំ ២០៣១។ ចំនួនទឹកប្រាក់នេះ គឺខ្ពស់ជាងការស្នើឡើងរបស់នាយកដ្ឋានសំណង់កាលពីខែកក្កដាកន្លងទៅ ដែលកំណត់ចំនួនទឹកប្រាក់ត្រឹម ៣ លានដុង សម្រាប់ប្រជាជនភាគច្រើន។
លើសពីនេះ ទីក្រុងហាណូយ ក៏មានគម្រោងផ្តល់ប្រាក់ឧបត្ថម្ភចំនួន ៥០% ដល់ថ្លៃចុះបញ្ជី និងធ្វើផ្លាកលេខ សម្រាប់អ្នកដែលប្តូរទៅប្រើម៉ូតូអគ្គិសនីផងដែរ។ សម្រាប់អ្នកទិញតាមផែនការបង់រំលស់ នឹងមានប្រាក់ឧបត្ថម្ភ ៣០% លើការប្រាក់រយៈពេល ១២ ខែ។ ចំណែកអាជីវកម្មដឹកជញ្ជូនដំណើរការឡានក្រុង និងតាក់ស៊ី នឹងទទួលបានប្រាក់ឧបត្ថម្ភពេញលេញលើថ្លៃសេវាទាំងអស់ នៅពេលពួកគេផ្លាស់ប្តូរមកប្រើយានយន្តអគ្គិសនី។
ទន្ទឹមជាមួយគ្នា ទីក្រុងហាណូយ ក៏មានគម្រោងបញ្ជាឱ្យអគារផ្ទះល្វែង អគារពាណិជ្ជកម្ម មន្ទីរពេទ្យ និងកន្លែងសាធារណៈផ្សេងទៀត ផ្លាស់ប្តូរយ៉ាងហោចណាស់ ១៥% នៃកន្លែងចតរថយន្តទៅជាស្ថានីយ៍សាកយានយន្តអគ្គិសនី។ រីឯកន្លែងសាងសង់ថ្មីត្រូវតែបែងចែកយ៉ាងហោចណាស់ ៣០%។
សូមជម្រាបថា ទីក្រុងហាណូយ នឹងហាមឃាត់ម៉ូតូប្រើហ្គាសពីផ្លូវកណ្តាលទីក្រុង ចាប់ពីខែកក្កដា ឆ្នាំ ២០២៦ និងយានយន្តប្រើឥន្ធនៈហ្វូស៊ីលភាគច្រើន ចាប់ពីឆ្នាំ ២០៣០។ បច្ចុប្បន្នម៉ូតូប្រហែល ៦,៩ លានគ្រឿងកំពុងចរាចរក្នុងទីក្រុងហាណូយ។ អាជ្ញាធរបានអះអាងថា ម៉ូតូប្រើសាំងមានចំនួនប្រហែល ៦០% នៃការបំពុលទីក្រុងនេះ៕
ចែករំលែកព័តមាននេះ