ខេត្តសៀមរាប ៖ ប្រជាពលរដ្ឋអ្នកផលិតអំបុក នៅភូមិរកា ឃុំល្វា ស្រុកពួក បានរំពឹងថា អំបុកខ្មែរពិតៗនឹងទទួលបានការគាំទ្រច្រើន ពិសេសការទទួលទានអំបុកទូទាំងប្រទេស តាមការអំពាវនាវរបស់ប្រមុខរាជរដ្ឋាភិបាលដែលបានប្រកាសយកថ្ងៃទី៩ វិច្ឆិកា ដែលជាថ្ងៃបុណ្យឯករាជ្យជាតិ ជាទិវាអកអំបុកទូទាំងប្រទេស ការពារជាតិ សាសនា និងព្រះមហាក្សត្រ ។
លោក រិច គ្រីន អ្នកផលិតអំបុក រស់នៅភូមិរកា ឃុំល្វា ស្រុកពួកបានឲ្យដឹងថា ក្រោយ ពេលប្រមុខរាជ រដ្ឋាភិបាលកម្ពុជា បានប្រកាសយកថ្ងៃទី៩ វិច្ឆិកា ជាថ្ងៃទិវាហូបអំបុកទូទាំងប្រទេសដើម្បីការពារជាតិ សាសនា ព្រះមហាក្សត្រ លោករំពឹងថា ទីផ្សារអំបុកនឹងមានតម្លៃខ្ពស់ ខណៈដែលថ្ងៃធម្មតា មានតម្លៃ៤៥០០រៀលក្នុង១គីឡូក្រាម ។
លោកថា ខណៈពេលបច្ចុប្បន្ននេះ ការផលិតអំបុកនៅភូមិរបស់លោកប្រមាណជាង២០០គ្រួសារ កំពុងមានទីផ្សារជាបណ្ដើរៗហើយ និងមានអ្នកកុំម៉ង់ទិញជាបន្ដបន្ទាប់ ។លោក រិច គ្រីន បានឲ្យដឹងទៀតថា ក្នុងមួយថ្ងៃលោកបានផលិតអំបុកលក់ បោះឲ្យក្រុមឈ្មួញកណ្ដាលបានប្រមាណ១០០គីឡូក្រាម ហើយនៅមុនថ្ងៃនិងក្រោយថ្ងៃអបអរ អកអំបុកនេះនឹងឡើងថ្ងៃជាងនេះ ដែលអាចជួយដោះស្រាយជីវភាពប្រចាំថ្ងៃកើនជាងមុន ខណៈដែលស្រូវធ្វើអំបុកត្រូវបាននាំមកពីខេត្ដកំពង់ធំ ខេត្ដបាត់ដំបងនិងកន្លែងផ្សេងៗទៀត។
ជាមួយគ្នានេះដែរ លោក ឆន ណូ ដែល ជាអ្នកផលិតអំបុក រស់នៅស្រុកពួកបានឲ្យដឹងដែរថា ការផលិតអំបុកត្រូវចំណាយដើមទុនច្រើន ទាំងការប្រើប្រាស់បច្ចេកទេសផលិតអំបុក និងចំណាយទិញស្រូវធ្វើអំបុក ។ លោកថា ស្រូវដែលយកមកធ្វើអំបុកនេះ ត្រូវយកមកពីតំបន់ផ្សេង ដោយសារស្រូវដែលពួកគាត់ធ្វើស្រែដោយផ្ទាល់ដៃទើបចេញផ្កា មិនទាន់ទុំល្មមសម្រាប់ការផលិតអំបុកនៅឡើយ ។
លោក ឆន ណូ បានឲ្យដឹងទៀតថា អំបុកដែលអ្នកភូមិផលិតជាអំបុកស្រូវថ្មីពិតៗ ដោយគ្មានប្រើប្រាស់សារធាតុអ្វីផ្សេងដាក់ចូលក្នុងអំបុកនោះឡើយ បើទោះបីទិញស្រូវពីតំបន់ផ្សេងក៏ដោយ ដូច្នេះក្នុងនាមជាអ្នកលក់អំបុក ក៏ដូចជាអ្នកផលិតអំបុកក្នុងភូមិ ពួកគាត់មានការគាំទ្រយ៉ាងពេញទំហឹង ចំពោះការប្រកាសរបស់ប្រមុខរាជរដ្ឋាភិបាលកម្ពុជា ឲ្យមានទិវាទទួលទានអំបុកទូទាំងប្រទេស ដែលពួកគាត់រំពឹងថា អំបុកស្រូវថ្មីស្នាដៃកូនខ្មែរ នឹងមានទីផ្សារខ្ពស់ ។
បានកត់សម្គាល់ឃើញថា អ្នកផលិតអំបុកខ្លះបានយកស្លឹកតយទៅលាយជាមួយស្រូវហើយលីងដើម្បីឱ្យមានក្លិនឈ្ងុយ ។ លុះពេលរែងសម្អាតអត់មានស្លឹកតយជាប់ជាមួយទេ មានតែក្លិនឈ្ងុយតយតែប៉ុណ្ណោះ ។
គួររំលឹកថា ក្នុងឱកាសអញ្ជើញជាអធិបតីក្នុងពិធីចែកវិញ្ញាបនបត្រ និងសញ្ញាបត្រជូនសិស្សថ្នាក់វិជ្ជាជីវៈគរុកោសល្យ និងនិស្សិតបញ្ចប់ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី២ ខែតុលា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសយកថ្ងៃសៅរ៍ទី៩ វិច្ឆិកា ឆ្នាំ២០១៩ ដែលជាថ្ងៃបុណ្យឯករាជ្យជាតិ ហើយបន្តដោយបុណ្យអុំទូក អកអំបុក និងសំពះព្រះខែ គឺជាថ្ងៃកម្ពុជាត្រូវទទួលទានអំបុកនៅទូទាំងប្រទេស «ហូបអំបុកការពារជាតិ សាសនា ព្រះមហាក្សត្រ» ។
ទន្ទឹមនឹងនេះដែរ សម្តេចតេជោ ហ៊ុន សែន បានអំពាវនាវដល់ថ្នាក់ដឹកនាំ និងសកម្មជនគណបក្សប្រជាជនកម្ពុជា ទូទាំងប្រទេស ត្រូវរៀបចំទិវាហូបអំបុកឲ្យបានគ្រប់ៗគ្នា នៅថ្ងៃទី៩ ដល់ថ្ងៃទី១២ វិច្ឆិកា ឆ្នាំ២០១៩ខាងមុខនេះ ដែលជាថ្ងៃបុណ្យអុំទូក បណ្តែតប្រទីប និងអកអំបុកតាមប្រពៃណី ។
សូមបញ្ជាក់ថា ជាប្រវត្តិសាស្ត្រ កាលពីថ្ងៃអាទិត្យទី៩ ខែមិថុនា ឆ្នាំ២០១៩កន្លងទៅនេះ សម្តេចតេជោ ហ៊ុន សែន ក៏ធ្លាប់បានអំពាវនាវដល់បងប្អូនប្រជាពលរដ្ឋ សមាជិក សមាជិកាមកពីគ្រប់គណបក្សនយោបាយ និងកូន ក្មួយយុវជន កម្មករ កម្មការិនីចូលរួមហូបនំបញ្ចុកខ្មែរ ដើម្បីបង្ហាញពីសាមគ្គីភាព មិត្តភាព ក្តីស្រឡាញ់ និងឯកភាពជាតិដែលនៅពេលនោះ សម្តេចតេជោបានថ្លែងថា នំបញ្ចុកមិនមែនជាកម្មសិទ្ធិរបស់បក្សនយោបាយណាមួយឡើយ ប៉ុន្តែជារបស់ជាតិខ្មែរទាំងមូល ៕
ចែករំលែកព័តមាននេះ