សភាពការណ៍នៅអ៊ុយក្រែនកាន់តែតានតឹងនាំឱ្យមានការភ័យខ្លាចកាន់តែខ្លាំងចំពោះអន្តរាគមន៍យោធារុស្ស៊ីចូលក្នុងប្រទេសនេះ ។ ការភ័យខ្លាចនោះកើតមានក្រោយពីមន្ទីរប៉ង់តាហ្គោន និងអ៊ុយក្រែនបានបរិហាររុស្ស៊ីពីការរំលោ.ភបំពានដែនអាកាសអ៊ុយក្រែន ព្រមទាំងខណៈពេលដែលពួកបំបែកខ្លួននិយមសិ្នទ្ធរុស្ស៊ីបានចាប់ឃុំទុកសមាជិក១៣រូប
សភាពការណ៍នៅអ៊ុយក្រែនកាន់តែតានតឹងនាំឱ្យមានការភ័យខ្លាចកាន់តែខ្លាំងចំពោះអន្តរាគមន៍យោធារុស្ស៊ីចូលក្នុងប្រទេសនេះ ។ ការភ័យខ្លាចនោះកើតមានក្រោយពីមន្ទីរប៉ង់តាហ្គោន និងអ៊ុយក្រែនបានបរិហាររុស្ស៊ីពីការរំលោភបំពានដែនអាកាសអ៊ុយក្រែន ព្រមទាំងខណៈពេលដែលពួកបំបែកខ្លួននិយមសិ្នទ្ធរុស្ស៊ីបានចាប់ឃុំទុកសមាជិក១៣រូបនៃបេសកកម្មរបស់អង្គការសន្តិសុខ និងកិច្ចសហប្រតិបត្តិការនៅអឺរ៉ុប OSCE ។
ទន្ទឹមគ្នានេះដែរ សហរដ្ឋអាមេរិកនិងសហភាពអឺរ៉ុបគ្រោងអនុម័តចាប់ពីថ្ងៃទី២៨ មេសា នូវការដាក់ទណ្ឌកម្មបន្ថែមទៀតប្រឆាំងក្រុងមូស្គូ។ គឺមន្ទីរប៉ង់តាហ្គោនដែលកាលពីថ្ងៃទី២៥ មេសា កន្លងមកនេះចោទប្រកាន់រុស្ស៊ីថា រំលោភបំពានជាច្រើនលើកលើដែនអាកាសអ៊ុយក្រែនកាលពីថ្ងៃទី២៤ និង២៥ មេសា ។
ជាការឆ្លើយតបវិញ កាលពីថ្ងៃទី២៦ មេសា ក្រុងមូស្គូបានបដិសេធរាល់ការលុកលុយចូលដែនអាកាសអ៊ុយក្រែន ។ កាលពីថ្ងៃទី២៦ មេសា នាយករដ្ឋមន្ត្រីអ៊ុយក្រែននិយាយថា បណ្តាយន្តហោះរុស្ស៊ីហោះរំលោភដែនអាកាសអ៊ុយក្រែន ដើម្បីជំរុញអ៊ុយក្រែនឱ្យបាញ់មីស៊ីល១គ្រាប់ បន្ទាប់មកធ្វើការចោទប្រកាន់អ៊ុយក្រែនថា បង្កសង្គ្រាមមួយប្រឆាំងរុស្ស៊ី ។ ពេលនោះហើយកងទ័ពរុស្ស៊ីជាមហាអំណាចយោធាធំទី២ លើពិភពលោកបន្ទាប់ពីសហរដ្ឋអាមេរិក នឹងបានលេសលុកលុយចូលអ៊ុយក្រែន ។
ក្នុងបរិយាកាសតានតឹងក្រុមប្រទេស G-7 បានសម្រេចដាក់ទណ្ឌកម្មថ្មីៗប្រឆាំងក្រុងមូស្គូ ពិសេសទណ្ឌកម្មថ្មីរបស់អាមេរិកអាចប្រកាសចាប់ពីថ្ងៃទី២៨ មេសាទៅ ។
ចំណែកសមាជិក១៣នាក់របស់អង្គការ OSCE ដែលទទួលការចោទប្រកាន់ពីពួកបំបែកខ្លួននិយមស្និទ្ធរុស្ស៊ីថា ធ្វើចារកម្មនោះត្រូវបានពួក ជីវពលស្និទ្ធរុស្ស៊ីចាប់ខ្លួនកាលពីថ្ងៃទី២៥ មេសា ហើយពួកគេនៅបន្តឃុំទុក ដោយពួកបំបែកខ្លួននិយមនៅក្រុងស្លាវីយ៉ានស្ក៍ភាគខាងកើតអ៊ុយក្រែន ។ ពួកបំបែកខ្លួននិយមនៅក្រុងស្លាវីយ៉ានស្ក៍ កាលពីថ្ងៃទី២៦ មេសា និយាយថា ត្រៀមចរចាឱ្យមានការដោះដូរគ្នាមួយ ។
លោកវីយ៉ាតឆេស្លាវ ប៉ូណូម៉ារីអូហ្វ អភិបាលក្រុងស្លាវីយ៉ានស្ក៍ ប្រកាសដោយខ្លួនឯងនិយាយទៅកាន់សារព័ត៌មានថា ពួកកាន់អំណាចនៅក្រុងគៀវបានឃុំឃាំងបណ្តាមនុស្សរបស់យើង អាស្រ័យហេតុនេះបើអាចទៅរួច យើងត្រៀមធ្វើការដោះដូរគ្នា ។ គឺកងទាហានអ៊ុយក្រែនដែលស្ថិតនៅលើដែនដីរបស់យើងដោយគ្មានការអនុញ្ញាតពីយើង រួចសមាជិក OSCE ទាំងនេះពិតណាស់ជាឈ្លើយសឹករបស់យើង ។ លោកបញ្ជាក់ថា មនុស្សទាំងនេះត្រូវសួរចម្លើយពីសកម្មភាពទាំងឡាយរបស់ពួកគេ និងសួរថា ហេតុអីបានជាពួកគេមកកាន់ស្លាវីយ៉ានស្ក៍ ។ ឈ្លើយសឹកទាំងនេះក្នុងពេលមានសង្គ្រាមអាចធ្វើការដោះដូរគ្នា ដែលនោះជាច្បាប់អន្តរជាតិ ។
តាមពិតមានអ្នកសង្កេតការណ៍របស់ OSCE ៨នាក់អមដំណើរដោយបណ្តានាយទាហានអ៊ុយក្រែនត្រូវចាប់ខ្លួន ពេលពួកគេធ្វើដំណើរតាមរថយន្តបឺស១គ្រឿងតាមដងវិថីនៃទីក្រុងស្លាវីយ៉ានស្ក៍ ជាទីតាំងរបស់ពួកជីវពលស្និទ្ធរុស្ស៊ី ។ យោងតាមភ្នាក់ងារសន្តិសុខអ៊ុយក្រែន SBU ថា ពួកគេត្រូវចាប់ឃុំទុកក្នុងលក្ខខណ្ឌអមនុស្សធម៌នៅក្រោមដីនៃទីតាំងរបស់ពួកភេរវករ ។ នេះជាពាក្យហៅរបស់ក្រុងគៀវ សំដៅលើពួកបំបែកខ្លួននិយម ។ អភិបាលក្រុងស្លាវីយ៉ានស្ក៍អះអាងផ្ទុយពីនេះថា ពួកគេពិតជារក្សាទុកដោយប្រពៃ។ ទាហានម្នាក់មានជំងឺទឹកនោមផ្អែម តែពុំធ្ងន់ធ្ងរទេ ព្រោះមានថ្នាំពេទ្យ ។
OSCE កំពុងតែធ្វើការទាក់ទងជាមួយពួកសកម្មប្រយុទ្ធស្និទ្ធរុស្ស៊ី ដើម្បីឱ្យទទួលបានការដោះលែងពួកអ្នកសង្កេតការណ៍យោធាទាំងនេះ។ ក្នុងចំណោមពួកអ្នកសង្កេតការណ៍ដែលត្រូវចាប់ខ្លួនមានជនជាតិអាល្លឺម៉ង់៤នាក់ និងអ្នកបកប្រែម្នាក់ ក្រៅពីនេះមានជនជាតិឆេកម្នាក់ ដាណឺម៉ាកម្នាក់ និងស៊ុយអែតម្នាក់ រួចអ្នកក្រៅពីនេះជានាយទាហានអ៊ុយក្រែន ៕
ចែករំលែកព័តមាននេះ