ប្រទេសជប៉ុន ៖ ការស្ទង់មតិរបស់រដ្ឋាភិបាលជប៉ុនថ្មីៗនេះបានបង្ហាញថា ភ្ញៀវទេសចរបរទេសនៅក្នុងប្រទេសជប៉ុនបានលើកឡើង ក៏ដូចជាត្អូញត្អែរអំពីកង្វះធុងសំរាមនៅតាមទីសាធារណៈ រួមទាំងនៅស្ថានីយ៍រថភ្លើង ដែលបង្កើតផលវិបាកដល់ពួកគេអំឡុងពេលធ្វើដំណើរទៅណាមកណាម្តងៗ។ នេះបើតាមប្រភពពីសារព័ត៌មានក្យូដូជប៉ុន (Kyodo News)…
ប្រទេសជប៉ុន ៖ ការស្ទង់មតិរបស់រដ្ឋាភិបាលជប៉ុនថ្មីៗនេះបានបង្ហាញថា ភ្ញៀវទេសចរបរទេសនៅក្នុងប្រទេសជប៉ុនបានលើកឡើង ក៏ដូចជាត្អូញត្អែរអំពីកង្វះធុងសំរាមនៅតាមទីសាធារណៈ រួមទាំងនៅស្ថានីយ៍រថភ្លើង ដែលបង្កើតផលវិបាកដល់ពួកគេអំឡុងពេលធ្វើដំណើរទៅណាមកណាម្តងៗ។ នេះបើតាមប្រភពពីសារព័ត៌មានក្យូដូជប៉ុន (Kyodo News) បានចេញផ្សាយ។
យោងតាមទីភ្នាក់ងារទេសចរណ៍ជប៉ុនបានបង្ហាញថា បញ្ហានេះត្រូវបានលើកឡើងដោយភ្ញៀវទេសចរបរទេសជាង៤ពាន់នាក់ ឬស្មើ ២១,៩% នៃការស្ទង់មតិកាលពីថ្មីៗនេះ នៅឯអាកាសយានដ្ឋានធំៗចំនួន ៥ នៅក្នុងប្រទេសជប៉ុនថា គឺជាកង្វល់ចម្បងរបស់ពួកគេតែម្តង។ ការស្ទង់មតិ ត្រូវបានធ្វើឡើងលើអ្នកឆ្លើយសំណួរ មុនពេលចាកចេញពីអាកាសយានដ្ឋាន New Chitose, Narita, Haneda, Kansai និង Fukuoka នៅចន្លោះខែធ្នូ ឆ្នាំ២០២៤ និងខែមករា ឆ្នាំ២០២៥។
ទោះយ៉ាងណាក៏ដោយតួលេខនេះ បានប្រសើរឡើងប្រហែល ៨% បើធៀបនឹងស្ទង់មតិពីមុន។ បណ្តាអ្នកឆ្លើយសំណួរលើកឡើងថា ពួកគេពិបាករកធុងសំរាមនៅទីសាធារណៈ ដូច្នេះហើយពួកគេត្រូវតែយកសំរាមត្រឡប់ទៅកន្លែងស្នាក់នៅរបស់ពួកគេវិញ។
ប្រទេសជប៉ុនកន្លងមកធ្លាប់មានធុងសំរាមសាធារណៈច្រើន ប៉ុន្តែចំនួនជាច្រើនត្រូវបានដកចេញវិញក្នុងប៉ុន្មានឆ្នាំថ្មីៗនេះ ដោយផ្នែកមួយព្រោះតែការព្រួយបារម្ភអំពីសុវត្ថិភាព បន្ទាប់ពីការវាយប្រហារភេរវកម្មដូចជា ការវាយប្រហារដោយឧស្ម័នពុល Sarin នៅកន្លែងរថភ្លើងក្រោមដីទីក្រុងតូក្យូឆ្នាំ១៩៩៥ ហើយក៏ឃើញមានកើតឡើងនៅក្រៅប្រទេសផងដែរ។
ប្រការនេះហើយ ទើបបានជាការទុកដាក់សំរាមនៅតាមកន្លែងទេសចរណ៍បានក្លាយជាក្តីកង្វល់ដ៏ធំរបស់សាធារណជន។ លោក Yohei Takemura នាយកប្រតិបត្តិនៃក្រុមហ៊ុន Forcetec Inc. ដែលដំឡើងធុងសំរាមដើរដោយថាមពលពន្លឺព្រះអាទិត្យបានលើកឡើងថា គោលដៅទេសចរណ៍ពេញនិយមកំពូលដូចជា ទីក្រុងញូវយ៉ក និងប៉ារីស សុទ្ធតែមានធុងសំរាមសាធារណៈប្រហែល៣ម៉ឺនធុង។ ខណៈពេលដែលធុងសំរាមដែលបានដំឡើង និងថែទាំដោយរដ្ឋត្រូវបានដកចេញនៅទីក្រុងតូក្យូ ជំនួសមកវិញនូវធុងសំរាម និងការថែទាំដោយផ្នែកឯកជន។
ក្រៅពីការត្អូញត្អែរអំពីកង្វះធុងសំរាមសាធារណៈហើយ បញ្ហារអាក់រអួលដែលបានលើកឡើងដោយភ្ញៀវទេសចរបរទេសផ្សេងទៀតគឺ ១៥,២% បានរាយការណ៍ពីបញ្ហាទាក់ទងដូចជា អសមត្ថភាពរបស់បុគ្គលិកភោជនីយដ្ឋាន និងកន្លែងផ្សេងទៀតពិបាកក្នុងការប្រើប្រាស់ភាសាអង់គ្លេស ខណៈដែល ១៣,១% បានចង្អុលបង្ហាញពីបញ្ហាចង្អៀតដោយមនុស្សកកកុញនៅកន្លែងជាច្រើនដូចជា កន្លែងទេសចរណ៍ជាដើម។ អ្នកឆ្លើយសំណួរខ្លះទៀតក៏លើកឡើងពីនីតិវិធីអន្តោប្រវេសន៍ផងដែរ ដោយពួកគេត្អូញត្អែរអំពីការរង់ចាំយូរនៅឯព្រលានយន្តហោះ៕
ចែករំលែកព័តមាននេះ