ប្រទេសថៃ ៖ អាជ្ញាធរទេសចរណ៍ប្រទេសថៃ ហៅកាត់ថា TAT នៅថ្ងៃទី៣០ ខែមីនា ឆ្នាំ២០២៥ បានប្រកាសថា ការប្រារព្ធពិធីសង្ក្រាន្តឆ្នាំថ្មីនៅទូទាំងប្រទេស…
ប្រទេសថៃ ៖ អាជ្ញាធរទេសចរណ៍ប្រទេសថៃ ហៅកាត់ថា TAT នៅថ្ងៃទី៣០ ខែមីនា ឆ្នាំ២០២៥ បានប្រកាសថា ការប្រារព្ធពិធីសង្ក្រាន្តឆ្នាំថ្មីនៅទូទាំងប្រទេស នឹងដំណើរការតាមការគ្រោងទុក ដោយធានាថា ការធ្វើដំណើរ ការដឹកជញ្ជូន និងសណ្ឋាគារនៅតែមិនរងផលប៉ះពាល់ពីគ្រោះរញ្ជួយដីកាលពីពេលថ្មីៗនេះឡើយ។ នេះបើយោងតាមប្រភពពីសារព័ត៌មានថៃ Nation បានចេញផ្សាយ។
TAT បានប្រកាសថា ផែនការរបស់ខ្លួនក្នុងការប្រារព្ធពិធីសង្ក្រាន្តឆ្នាំថ្មីដ៏ធំទូទាំងប្រទេសនឹងដំណើរការតាមការគ្រោងទុក ដោយបានបញ្ជាក់ថា បន្ទាប់ពីការវាយតម្លៃស្ថានភាពក្រោយការរញ្ជួយដីដ៏ខ្លាំងក្លាកាលពីថ្ងៃសុក្រ អ្នកជំនាញបានរកឃើញថា ស្ថានភាពនៅក្នុងទីក្រុងបាងកក និងផ្នែកផ្សេងទៀតនៃប្រទេសថៃ បានវិលរកភាពប្រក្រតីវិញហើយ។ អាកាសយានដ្ឋានអន្តរជាតិដនមឿង និងអាកាសយានដ្ឋានអន្តរជាតិសុវណ្ណភូមិក្នុងក្រុងបាងកកបានបន្តដំណើរការដូចធម្មតា នៅពេលដែលបណ្តាក្រុមហ៊ុនអាកាសចរណ៍បានផ្តល់សេវាជាធម្មតា។
លើសពីនេះទៀត ការដឹកជញ្ជូនសាធារណៈ ពិសេសសេវាផ្លូវដែកអគ្គិសនីនៅតែដំណើរការពេញលេញ។ ស្របពេលដែលបណ្តាសណ្ឋាគារ ក៏ដូចជាទីតាំងកម្សាន្តនៅក្នុងតំបន់ទេសចរណ៍សំខាន់ៗ ក៏មិនរងផលប៉ះពាល់ដែរ។ TAT បានរាយការណ៍ថា ភ្ញៀវទេសចរមិនបានលុបចោលការកក់ទុករបស់ពួកគេនោះទេ ហើយប្រតិបត្តិករក្រុមទេសចរណ៍ក៏មិនបានដកការកក់ទុករបស់ពួកគេដូចគ្នា។ TAT ក៏បានបន្ថែមថា ផ្លូវហាយវេនៅទូទាំងប្រទេសមិនមានការខូចខាត និងអាចប្រើប្រាស់បានពេញលេញសម្រាប់ការធ្វើដំណើរ។
ដើម្បីធានាសុវត្ថិភាពភ្ញៀវទេសចរជាតិ និងអន្តរជាតិ TAT បានគូសបញ្ជាក់ថា ខ្លួននឹងស្វែងរកកិច្ចសហប្រតិបត្តិការពីវិទ្យាស្ថានវិស្វកម្មប្រទេសថៃ និងនាយកដ្ឋានសាធារណការ ដើម្បីត្រួតពិនិត្យបណ្តាសណ្ឋាគារមានកម្ពស់ខ្ពស់។ ជាចុងក្រោយ អាជ្ញាធរថៃបានធានាដល់សាធារណជនថា ការរៀបចំពិធីសង្ក្រាន្តឆ្នាំថ្មីដ៏ធំនៅទីក្រុងបាងកក ឈៀងម៉ៃ និងទីតាំងផ្សេងទៀត នឹងមិនរងផលប៉ះពាល់ឡើយ៕
ចែករំលែកព័តមាននេះ