អន្តរជាតិ ៖ លោកស្រី Alice Walton កូនស្រី​ស្ថាបនិក​ក្រុមហ៊ុន Walmart និង​លោកស្រី Francoise Bettencourts Meyers ចៅស្រី​ស្ថាបនិក​ក្រុមហ៊ុន L’Oreal កំពុង​ឈរ​ក្នុង​បញ្ជី​ស្ត្រី​មានទ្រព្យ​សម្បត្តិ​ច្រើន​ជាងគេ​បំផុត​ទាំង​៥​រូប​របស់​ពិភពលោក​។ នេះ​បើ​យោង​តាម​ទិន្ន័យ​ចុង​ក្រោយ​ពី​ទស្សនាវដ្តី​ពាណិជ្ជកម្ម​អា​មេ​រិ​ក Forbes​។

១-លោកស្រី Alice Walton ទ្រព្យសម្បតិ្ត​១០១.២​ពាន់​លាន​ដុល្លារ​អា​មេ​រិ​ក
កូនស្រី​តែ​ម្នាក់​គត់​របស់​លោក Sam Walton ស្ថាបនិក​ក្រុមហ៊ុន​ដំណើរការ​បណ្តាញ​ផ្សារ​ទំនើប Walmart លោកស្រី Alice Walton អាយុ​៧៥​ឆ្នាំ បាន​ផ្តោត​ជា​សំខាន់​លើ​ការ​ថែរក្សា​វត្ថុ​សិល្បៈ​ជំនួស​ឱ្យ​ការ​បម្រើ​ការ​ជា​ក្រុមប្រឹក្សាភិបាល​របស់​ក្រុមហ៊ុន​ឪពុក​លោកស្រី ដោយ​ផ្ទុយ​ពី​បងប្អូន​ប្រុស​។ លោកស្រី​បាន​បើក​សារមន្ទីរ​សិល្បៈ Crystal Bridges នៅ​រដ្ឋ​អា​កាន​សាស់ (Arkansas) សហរដ្ឋអាមេរិក ក្នុង​ឆ្នាំ ២០១១ ដោយ​បង្ហាញ​អំពី​ស្នាដៃ​ពី​សិល្បករ​ដូច​ជា Norman Rockwell និង Andy Warhol ជាដើម​។

ទោះ​យ៉ាងណា​ក៏​ដោយ លោកស្រី Alice ក៏​ធ្លាប់​ជា​អ្នកវិភាគ​ទីផ្សារ​ភាគហ៊ុន ហើយ​ក៏​បាន​បង្កើត​ក្រុមហ៊ុន​ធនាគារ​វិនិយោគ ហើយ​ក៏​ជា​អនុប្រធាន​របស់​ធនាគារ Arvest Bank Group ដែល​ជា​ធនាគារ​ក្រោម​កម្មសិទ្ធិ​របស់​គ្រួសារ Walton ផង​ដែរ​។

២-លោកស្រី Francoise Bettencourt Meyers ទ្រព្យសម្បត្តិ​៨១.២​ពាន់​លាន​ដុល្លារ
ស្ត្រី​មាន​លំដាប់​ទី​២​ពិភពលោក វ័យ​៧១​ឆ្នាំ​រូប​នេះ គឺជា​ចៅស្រី​របស់​លោក Eugene Schueller ស្ថាបនិក​ក្រុមហ៊ុន​គ្រឿងសំអាង​បារាំង និង​ដ៏​ធំ​បំផុត​មួយ​របស់​ពិភពលោក L’Oréal ដោយ​កាន់កាប់​ភាគហ៊ុន​ជាង​មួយ​ភាគ​បី ដែល​បាន​ជួញដូរ​ជា​សាធារណៈ​។

លោកស្រី Bettencourt Meyers បាន​បម្រើ​ការ​ក្នុង​ក្រុមប្រឹក្សាភិបាល​របស់​ក្រុមហ៊ុន L’Oréal តាំងពី​ឆ្នាំ ១៩៩៧ និង​ជា​ប្រធាន​ក្រុមហ៊ុន​គ្រួសារ ដែល​កាន់កាប់​លើ​ម៉ាក​ល្បី​ៗ ដូច​ជា Maybelline និង Yves Saint Laurent ជាដើម​។

៣-លោកស្រី Julia Koch ទ្រព្យសម្បត្តិត​៧៤.២​ពាន់​លាន​ដុល្លារ
លោកស្រី Julia Koch ដែល​ពី​មុន​ធ្លាប់​ធ្វើការ​ក្នុង​ឧស្សាហកម្ម​ម៉ូ​ដ​នោះ ទទួល​បាន​មរតក​ភាគហ៊ុន ៤២% នៅ​ក្នុង​ក្រុមហ៊ុន​សាជីវកម្ម​ចម្រុះ​អា​មេ​រិ​ក Koch Industries ពី​ស្វាមី​លោកស្រី គឺ​លោក David Koch ដែល​បាន​ទទួលមរណភាព​កាលពី​ឆ្នាំ ២០១៩​។

កាលពី​ខែកុម្ភៈ ឆ្នាំ​២០២៤ មូលនិធិ​គ្រួសារ Julia Koch បាន​បរិច្ចាគ​ប្រាក់​ចំនួន​៧៥​លាន​ដុល្លារ ដើម្បី​ផ្តល់​មូលនិធិ​ដល់​មជ្ឈមណ្ឌល​ថែទាំ​គ្រួសារ Julia Koch ។ មូលនិធិ​គ្រួសារ​នេះ បាន​បរិច្ចាគ​ប្រាក់​រាប់​លាន​ដុល្លារ​អា​មេ​រិ​ក​ដល់​សាលារៀន និង​មន្ទីរពេទ្យ​។

៤-លោកស្រី Jacqueline Mars ទ្រព្យសម្បត្តិ​៤៤.២​ពាន់​លាន​ដុល្លារ
លោកស្រី Jacqueline Mars អាយុ​៨៥​ឆ្នាំ បាន​កាន់កាប់​ភាគហ៊ុន​មួយ​ភាគ​បី​នៅ​ក្នុង​ក្រុមហ៊ុន​អា​មេ​រិ​ក Mars Inc. ដែល​ជា​ក្រុមហ៊ុន​ផលិត​ស្ករ​គ្រាប់ អាហារ និង​ចំណី​សត្វ ដែល​បង្កើត​ឡើង​ដោយ​ជីតា​របស់​លោកស្រី​។ លោកស្រី​បាន​ចូលរួម​យ៉ាង​សកម្ម​នៅ​ក្នុង​អាជីវកម្ម​គ្រួសារ​អស់​រយៈពេល​ប្រហែល​២​ទសវត្សរ៍ ហើយ​បម្រើ​ការ​ជា​ក្រុមប្រឹក្សាភិបាល​រហូត​ដល់​ឆ្នាំ ២០១៦​។

៥-លោកស្រី Rafaela Aponte-Diamant ទ្រព្យសម្បត្តិ​៣៨.៩​ពាន់​លាន​ដុល្លារ
ស្ត្រី​សញ្ជាតិ​អ៊ី​តា​លី​ដើម​កំណើត​អ៊ី​ស្រា​អែ​លវ័យ​៧៩​ឆ្នាំ​រូប​នេះ គឺជា​សហ​ម្ចាស់​ក្រុមហ៊ុន​របស់​អ៊ី​តា​លី MSC ដែល​ជា​ក្រុមហ៊ុន​ដឹក​ជញ្ជូន​ដ៏​ធំ​បំផុត​មួយ​របស់​ពិភពលោក ជាមួយនឹង​ស្វាមី​លោកស្រី គឺ​លោក Gianluigi Aponte​។

លោកស្រី​មាន​ជំនាញ​ក្នុង​ការ​រចនា​ផ្នែក​ខាងក្នុង​សម្រាប់​នាវា​ទេសចរណ៍​របស់​ក្រុមហ៊ុន MSC និង​បម្រើ​ការ​ជា​ក្រុមប្រឹក្សាភិបាល​នៃ​មូលនិធិ MSC ផង​ដែរ​។ បង្កើត​ឡើង​ដោយ​គ្រួសារ​លោកស្រី​ក្នុង​ឆ្នាំ ២០១៨ មូលនិធិ MSC ផ្តោត​លើ​ការ​អភិរក្ស​សកល និង​គំនិត​ផ្តួចផ្តើម​មនុស្សធម៌ ដោយ​បរិច្ចាគ​ប្រហែល ១២.៩​លាន​ដុល្លារ​ដល់​គម្រោង​សប្បុរសធម៌​ផ្សេង​ៗ​គិត​ត្រឹម​ឆ្នាំ ២០២២៕ ប្រភព ៖ VnExpress