ខេត្តស្វាយរៀង ៖ ករណីរំដោះអ្នកទោសជាជនជាតិវៀតណាម ចេញពីសាលាដំបូងខេត្តស្វាយរៀង នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ រហូតមានការផ្ទុះបាញ់ដាក់គ្នា រវាងកម្លាំងសមត្ថកិច្ច ជាមួយក្រុមឧក្រិដ្ឋជន…
ខេត្តស្វាយរៀង ៖ ករណីរំដោះអ្នកទោសជាជនជាតិវៀតណាម ចេញពីសាលាដំបូងខេត្តស្វាយរៀង នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ រហូតមានការផ្ទុះបាញ់ដាក់គ្នា រវាងកម្លាំងសមត្ថកិច្ច ជាមួយក្រុមឧក្រិដ្ឋជន ដែលបានបង្កឲ្យមានការភ្ញាក់ផ្អើលយ៉ាងខ្លាំងនោះ នៅពេលនេះកម្លាំងនាយកដ្ឋាននគរបាលព្រហ្មទណ្ឌ សហការជាមួយកម្លាំងនគរបាលខេត្តស្វាយរៀង ស្រាវជ្រាវតាមប្រម៉ាញ់ និងចាប់ក្របួចបានមកវិញទាំងអស់ហើយ សរុប៧នាក់ (អ្នកទោស៦នាក់ និងស្ដ្រីមករំដោះម្នាក់)។
អ្នកទោស៦នាក់ និងស្ដ្រីមករំដោះម្នាក់ខាងលើ ត្រូវបានចាប់ខ្លួននៅវេលាម៉ោង៦និង១០នាទីល្ងាចថ្ងៃដដែលនេះ នៅជិតវត្តសំបួរ ភូមិព្រៃសង្ឃ័រ ឃុំសំបួរ ស្រុកស្វាយទាប ខេត្តស្វាយរៀង ។
សូមជម្រាបថា ករណីរំដោះអ្នកទោសជនជនជាតិវៀតណាម ចេញពីសាលាដំបូងខេត្តស្វាយរៀង នៅវេលាម៉ោង៨និង៤០នាទីព្រឹកថ្ងៃទី១៨ ខែវិច្ឆិកា ឆ្នាំ២០២៥ រហូតមានការផ្ទុះអាវុធបាញ់ដាក់គ្នាមួយប្រាវ ជាមួយកម្លាំងសមត្ថកិច្ច ។ បន្ទាប់ពីអ្នកទោសជនជាតិវៀតណាម ដែលត្រូវបានបក្ខពួកមករំដោះចេញពីសាលាដំបូងខេត្តស្វាយរៀងនោះ ទាំងកម្លាំងអនុរក្សពន្ធនាគារ កម្លាំងនគរបាល និងអាវុធហត្ថ បានសហការគ្នាយ៉ាងស្អិតរមួតស្រាវជ្រាវភ្លាមៗ រហូតដល់ដល់ការចាប់ខ្លួនអ្នកទោសវិញបានម្នាក់ ដែលជាមេខ្លោង រួមជាមួយរថយន្ដមួយគ្រឿង ដែលជាមធ្យោបាយសម្រាប់ពួកគេជិះគេចខ្លួននៅពេលរំដោះ ។
សមត្ថកិច្ចខេត្តស្វាយរៀង បានអះអាងថា អ្នកទោស៦នាក់ ដែលត្រូវបានរំដោះទាំងព្រឹកនេះ គឺនៅពេលកម្លាំងអនុរក្សពន្ធនាគារ បានបញ្ជូនទៅបន្ដនីតិវិធីនៅតុលាការនេះ សង្ស័យពួកគេពាក់ព័ន្ធករណី Scam Online ដែលត្រូវបានសមត្ថកិច្ចជំនាញចាប់ខ្លួន បានកាលពីពេលកន្លងទៅ ៕
ចែករំលែកព័តមាននេះ