ទីក្រុងតូក្យូ៖ មន្ត្រីជាន់ខ្ពស់ជប៉ុន និងចិនបានជួបពិភាក្សាគ្នានៅទីក្រុងប៉េកាំងដើម្បីបន្ធូរបន្ថយភាពតានតឹងរវាងប្រទេសទាំង២ក្រោយការថ្លែងសុន្ទរករបស់នាយករដ្ឋមន្ត្រីជប៉ុន លោកស្រីតាកាអ៊ីឈិ នៅរដ្ឋសភាពាក់ព័ន្ធនឹងបញ្ហាតៃវ៉ាន់។ ក្រោយការថ្លែងនោះត្រឹមតែប៉ុន្មានថ្ងៃប៉ុណ្ណោះ គេឃើញថាភាពតានតឹងចាប់ផ្ដើមឡើងកម្ដៅដល់កម្រិតខ្ពស់ដល់ថ្នាក់ប្រទេសចិនបញ្ចេញប្រតិកម្មជាបន្តបន្ទាប់ និងអំពាវនាវឱ្យប្រជាជនខ្លួនកុំធ្វើដំណើរទៅប្រទេសជប៉ុនព្រោះហេតុផលសុវត្ថិភាព។
លោកម៉ាសាអាគិ កាណាអ៊ិ (Masaaki Kanai) ជាប្រធានការិយាល័យទទួលបន្ទុកកិច្ចការអាស៊ី និងអូសេអានីនៃក្រសួងការបរទេសជប៉ុន។ លោកបានជួបសមភាគីចិន លោកលាវជីនសុង (Liu Jinsong) នៅល្ងាចនេះ។ តាមរយៈការជួបគ្នាលើកនេះ ជប៉ុនចង់បន្ធូរបន្ថយភាពតានតឹងផ្នែកការទូតព្រោះភាពតានតឹងនេះធ្វើឱ្យប៉ះពាល់ខ្លាំងទៅលើវិស័យទេសចរណ៍ អប់រំ និងកម្សាន្ត។
ប្រទេសចិនបញ្ចេញប្រតិកម្មតបទៅលោកស្រីតាកាអ៊ីឈិដែលជាអ្នកនយោបាយប្រើសម្ដីខ្លាំងប្រឆាំងចិន និងជាអ្នកគាំទ្រកោះតៃវ៉ាន់។ កាលពីថ្ងៃទី៧ ខែវិច្ឆិកាកន្លងទៅនេះ លោកស្រីថ្លែងថាបើសិនចិនវាយប្រហារកោះតៃវ៉ាន់មែន ពេលនោះជប៉ុននឹងធ្លាក់ទៅក្នុងស្ថានភាពដែលត្រូវតស៊ូដើម្បីភាពរស់រានមានជីវិតរបស់ជាតិ។ មានន័យថាជប៉ុនអាចនឹងត្រូវបង្ខំចិត្តបញ្ជូនកងទ័ពទៅធ្វើអន្តរាគមន៍ជួយតៃវ៉ាន់។ ក្រសួងការពារជាតិចិនតបទៅវិញថាកងទ័ពប្រជាជនចិននឹងវាយកម្ទេចកងទ័ពជប៉ុន។
មន្ត្រីជាន់ខ្ពស់ចិន លោកលាវជីនសុង (រូបឆ្វេង) និងមន្ត្រីជាន់ខ្ពស់ជប៉ុន (រូបខាងស្ដាំ)ប្រទេសចិនបានទាមទារឱ្យលោកស្រីតាកាអ៊ីឈិដកពាក្យសម្ដីនោះមកវិញទើបខ្លួនសុខចិត្ត។ ចិនចាត់ទុកថាកោះតៃវ៉ាន់ជាបញ្ហាផ្ទៃក្នុងរបស់ខ្លួន រឿងអីដែលប្រទេសដទៃត្រូវជ្រៀតជ្រែក។ នៅក្នុងការជួបគ្នាជាមួយមន្ត្រីចិននៅថ្ងៃនេះ លោកកាណាអ៊ិចង់សង្កត់ធ្ងន់ថាពាក្យសម្ដីរបស់លោកស្រីតាកាអ៊ីឈិជារឿងផ្សេង។ ប៉ុន្តែជប៉ុននៅតែប្រកាន់ជំហរចិនតែមួយដូចដែលមានចែងនៅក្នុងសេចក្ដីថ្លែងការណ៍រួមចិន-ជប៉ុនឆ្នាំ១៩៧២។
នៅទីក្រុងតូក្យូ អ្នកនាំពាក្យរដ្ឋាភិបាលជប៉ុន លោកមីណូរូ គីហារ៉ា (Minoru Kihara) ថ្លែងថាជប៉ុនបើកទូលាយជានិច្ចសម្រាប់ការសន្ទនាគ្នាគ្រប់ប្រភេទជាមួយប្រទេសចិន។ ការថ្លែងដូច្នេះ១ថ្ងៃបន្ទាប់ពីក្រសួងការបរទេសចិនប្រកាសថានាយករដ្ឋមន្ត្រីចិន លោកលីឆៀង (Li Qiang) គ្មានគម្រោងជួបលោកស្រីតាកាអ៊ីឈិទេនៅពេលលោក និងលោកស្រីចូលរួមកិច្ចប្រជុំកំពូលជីម្ភៃ (G20) នៅអាហ្វ្រិកខាងត្បូង។
កាលពីសប្ដាហ៍មុន រដ្ឋាភិបាលចិនអំពាវនាវឱ្យប្រជាជនខ្លួនផ្អាកធ្វើដំណើរទៅជប៉ុនជាបណ្ដោះអាសន្ន។ ចំណែកជនជាតិចិនដែលមានគម្រោងបន្តការសិក្សានៅជប៉ុនសូមគិតឡើងវិញដោយហ្មត់ចត់។ សារព័ត៌មានចិនរាយការណ៍កាលពីថ្ងៃចន្ទថាខ្សែភាពយន្តជប៉ុន២រឿងដែលគ្រោងចាក់បញ្ចាំងនៅតាមរោងភាពយន្តចិននៅចុងសប្ដាហ៍នេះ និងដើមខែធ្នូត្រូវផ្អាកវិញហើយ។ នេះបើយោងតាមប្រភពពីក្យូដូ (Kyodo) និងប្រភពដទែទៀត៕
ចែករំលែកព័តមាននេះ