ទីក្រុងតូក្យូ ៖ ប្រទេសជប៉ុនបានព្រមានពលរដ្ឋរបស់ខ្លួននៅក្នុងប្រទេសចិន ឱ្យបង្កើនការប្រុងប្រយ័ត្នសុវត្ថិភាពខ្ពស់ និងជៀសវាងកន្លែងមានមនុស្សច្រើនកុះករ ចំពេលមានវិបត្តិការទូតកាន់តែធ្ងន់ធ្ងររវាងប្រទេសដែលមានសេដ្ឋកិច្ចធំជាងគេទាំងពីរនៅអាស៊ី ជុំវិញការអត្ថាធិប្បាយរបស់នាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈី…
ទីក្រុងតូក្យូ ៖ ប្រទេសជប៉ុនបានព្រមានពលរដ្ឋរបស់ខ្លួននៅក្នុងប្រទេសចិន ឱ្យបង្កើនការប្រុងប្រយ័ត្នសុវត្ថិភាពខ្ពស់ និងជៀសវាងកន្លែងមានមនុស្សច្រើនកុះករ ចំពេលមានវិបត្តិការទូតកាន់តែធ្ងន់ធ្ងររវាងប្រទេសដែលមានសេដ្ឋកិច្ចធំជាងគេទាំងពីរនៅអាស៊ី ជុំវិញការអត្ថាធិប្បាយរបស់នាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈី (Sanae Takaichi) លើបញ្ហាកោះតៃវ៉ាន់។
តាមប្រភពពីទីភ្នាក់ងារសារព័ត៌មាន Reuters ចេញផ្សាយនៅរសៀលថ្ងៃទី១៨ ខែវិច្ឆិកា ឆ្នាំ២០២៥ បានឱ្យដឹងថា ការណែនាំដែលចេញដោយស្ថានទូតជប៉ុនប្រចាំប្រទេសចិន បានកើតឡើងនៅពេលដែលមន្ត្រីជាន់ខ្ពស់ក្រសួងការបរទេសជប៉ុនម្នាក់បានធ្វើដំណើរទៅកាន់ទីក្រុងប៉េកាំង ដើម្បីធ្វើកិច្ចពិភាក្សានៅថ្ងៃទី១៨ ខែវិច្ឆិកានេះ ជាមួយសមភាគីចិន ដើម្បីព្យាយាមកាត់បន្ថយភាពតានតឹងរវាងប្រទេសទាំងពីរ។
ការណែនាំនេះទៀតសោត បានកើតឡើងក្រោយប្រទេសចិនបានជំរុញឱ្យពលរដ្ឋរបស់ខ្លួនកុំធ្វើដំណើរទៅកាន់ប្រទេសជប៉ុន។ ការជំរុញនេះ អាចនឹងប៉ះពាល់ដល់សេដ្ឋកិច្ចរបស់ជប៉ុនយ៉ាងខ្លាំង ដោយសារតែប្រជាជនចិនបច្ចុប្បន្នមានចំនួនជិតមួយភាគបួននៃភ្ញៀវទេសចរសរុបនៅជប៉ុន។ មិនត្រឹមតែប៉ុណ្ណោះ បណ្តាភាគហ៊ុនទាក់ទងនឹងវិស័យទេសចរណ៍នៅក្នុងប្រទេសជប៉ុន ក៏បានធ្លាក់ចុះយ៉ាងខ្លាំងផងដែរ។
លោកស្រី តាកាអ៊ីឈី បានបង្កឱ្យវិបត្តិការទូតរវាងប្រទេសទាំងពីរដែលកើតមានក្នុងរយៈពេលជាច្រើនឆ្នាំ កាន់តែឡើងកម្តៅខ្លាំង ក្រោយពេលលោកស្រីបានថ្លែងទៅកាន់សភាកាលពីពេលថ្មីៗនេះថា ការវាយប្រហាររបស់ចិនលើកោះតៃវ៉ាន់ដែលគំរាមកំហែងដល់ការរស់រានមានជីវិតរបស់ជប៉ុនអាចជំរុញឱ្យមានការឆ្លើយតបខាងផ្នែកយោធាពីជប៉ុន។ ការអត្ថាធិប្បាយនេះហើយ ធ្វើឱ្យប្រទេសចិនក្តៅសន្លឹកត្រចៀកយ៉ាងខ្លាំង៕
ចែករំលែកព័តមាននេះ