ទីក្រុងបាងកក ៖ អាជ្ញាធរទេសចរណ៍ថៃ កាលពីថ្ងៃទី១៨ ខែមេសា ឆ្នាំ២០២៥ បានរាយ ការណ៍ប្រាក់ចំណូលបានពីពិធីបុណ្យសង្ក្រាន្តឆ្នាំ២០២៥ ដោយប្រាក់ចំណូលនៅទូទាំងប្រទេសមានចំនួន ២៨,៧ពាន់លានបាត…
ទីក្រុងបាងកក ៖ អាជ្ញាធរទេសចរណ៍ថៃ កាលពីថ្ងៃទី១៨ ខែមេសា ឆ្នាំ២០២៥ បានរាយ ការណ៍ប្រាក់ចំណូលបានពីពិធីបុណ្យសង្ក្រាន្តឆ្នាំ២០២៥ ដោយប្រាក់ចំណូលនៅទូទាំងប្រទេសមានចំនួន ២៨,៧ពាន់លានបាត ឬស្មើនឹង ៨៦០លានដុល្លារអាមេរិក ខណៈទីក្រុងបាងកករកចំណូលបានច្រើនបំផុត ៤,១ពាន់លានបាត ឬជិត ១២៣លានដុល្លារ ។ ប៉ុន្តែទោះយ៉ាងណាក៏ដោយ អត្រាស្នាក់នៅសណ្ឋាគារទូទាំងប្រទេសបានធ្លាក់ចុះ ១០% ដោយសារការធ្លាក់ចុះវត្តមានភ្ញៀវជនជាតិចិន។ នេះបើតាមការចេញផ្សាយពីកាសែតបាងកកប៉ុស្តិ៍។
លោកស្រី Thapanee Kiatphaibool អភិបាលនៃអាជ្ញាធរទេសចរណ៍ថៃបានថ្លែងថា ពិធីបុណ្យមហាសង្ក្រាន្តពិភពលោកឆ្នាំ២០២៥ (Maha Songkran World Water Festival 2025) ដែលរៀបចំឡើងនៅទីលានសាណាមហ្លួង (Sanam Luang) ក្បែរព្រះបរមរាជវាំងក្រុងបាងកកបានទាក់ទាញភ្ញៀវទេសចរចំនួន១,១លាននាក់ ចាប់ពីថ្ងៃទី ១១ដល់១៥ ខែមេសា ដោយក្នុងនោះ ៩០% ជាភ្ញៀវជាតិ។
បណ្តាខេត្តនៅភាគខាងកើតរកចំណូលត្រូវបានប៉ាន់ប្រមាណចំនួន ៤,០៤ពាន់លានបាត ឬ ១២១លានដុល្លារ ស្របពេលនៅភាគខាងជើងបានកត់ត្រាកំណើនប្រាក់ចំណូលខ្ពស់បំផុតធៀបនឹងឆ្នាំមុន ពោលកើនឡើង ៣០% ក្នុងចំនួន ២,៥ពាន់លានបាត ឬ ៧៥លានដុល្លារ។
លោកស្រីបន្តថា ការមកដល់របស់ភ្ញៀវអន្តរជាតិមានចំនួនសរុប ៤២១,៣៩៤នាក់ ចាប់ពីថ្ងៃទី ១២ ដល់ ១៦ ខែមេសា ដោយបង្កើតបានប្រាក់ចំណូលចំនួន ៦,៤៥ពាន់លានបាត ឬជាង ១៩៣លានដុល្លារ សម្រាប់ឧស្សាហកម្មទេសចរណ៍។ លោកស្រីក៏បានរាយការណ៍ពីប្រាក់ចំណូលទូទាំងប្រទេសសម្រាប់សង្ក្រាន្តឆ្នាំនេះ ត្រូវបានកត់ត្រាចំនួន ៨៦០លានដុល្លារ ពោលកើនឡើង ១៧% បើធៀបនឹងឆ្នាំមុន។ ទីក្រុងបាងកកទាក់ទាញភ្ញៀវច្រើនបំផុត ព្រមទាំងរាយការណ៍ចំណូលខ្ពស់បំផុតផងដែរ។ រដ្ឋបាលក្រុងបាងកកបានរាយការណ៍ថា មនុស្សប្រហែល ២,៨លាននាក់បានចូលរួមក្នុងការប្រារព្ធពិធីបុណ្យសង្ក្រាន្តក្រុងបាងកក ដោយទីលានសាណាមហ្លួងជាទីតាំងទាក់ទាញខ្លាំងបំផុត។
លោក Chatree Wattanakajorn អនុលេខាអចិន្ត្រៃយ៍របស់រដ្ឋបាលក្រុងបាងកកបានថ្លែងថា រដ្ឋបាលបានគាំទ្រទីតាំងសំខាន់ៗចំនួន ១៧ សម្រាប់ពិធីបុណ្យសង្ក្រាន្តឆ្នាំនេះ ចាប់ពីថ្ងៃទី ១១ ដល់ ១៥ ខែមេសា ដោយទីតាំងទាក់ទាញកំពូលទាំង៣ គឺ ទីលានសាណាមហ្លួង, ផ្លូវខាវសាន (Khao San) និងផ្លូវស៊ីឡុំ (Silom)។
ដោយឡែក លោក Thienprasit Chaiyapatranun ប្រធានសមាគមសណ្ឋាគារថៃបានលើកឡើងថា ហ្វូងមនុស្សយ៉ាងច្រើនបានប្រមូលផ្តុំនៅក្នុងទីក្រុងបាងកកសម្រាប់ឆ្នាំនេះ ខណៈអ្នកធ្វើដំណើរភាគច្រើនជ្រើសរើសការស្នាក់នៅផ្ទះជាងធ្វើដំណើរឆ្លងកាត់តំបន់។ លោកបន្តថា អ្នកដំណើរជាតិជាច្រើនដែលត្រឡប់ទៅស្រុកកំណើតទំនងជាស្នាក់នៅផ្ទះក្រុមគ្រួសារពួកគេមិនមែនសណ្ឋាគារនោះទេ ហើយគួបផ្សំជាមួយលំហូរភ្ញៀវជនជាតិចិនកាន់តែចុះខ្សោយ អត្រាស្នាក់នៅសណ្ឋាគារទូទាំងប្រទេសជាមធ្យម អំឡុងពេលពិធីបុណ្យសង្ក្រាន្តបានធ្លាក់ចុះ ១០% ពីអត្រាសរុប ៧១,៥% ដែលត្រូវបានកត់ត្រាក្នុងរយៈពេលដូចគ្នា កាលពីឆ្នាំមុន។
លោកក៏បានបន្ថែមទៀតថា អាជ្ញាធរទេសចរណ៍ថៃបានទទួលជោគជ័យក្នុងការទាក់ទាញភ្ញៀវពីទីឆ្ងាយកាន់តែច្រើនអំឡុងពិធីបុណ្យសង្ក្រាន្ត ប៉ុន្តែទោះជាយ៉ាងណា ការមកដល់ទាំងនេះមិនគ្រប់គ្រាន់ដើម្បីប៉ះប៉ូវការធ្លាក់ចុះពីទីផ្សារប្រទេសចិន ដែលបន្តរងផលប៉ះពាល់ដោយការព្រួយបារម្ភពីសុវត្ថិភាពក្នុងប្រទេសថៃ៕ ប្រភព ៖ Bangkok Post
ចែករំលែកព័តមាននេះ