ប្រទេសជប៉ុន ៖ ទីក្រុងអូសាកា (Osaka) ក្នុងតំបន់កានសៃ (Kansai) នៃកោះហុងស៊ូ (Honshu) របស់ប្រទេសជប៉ុន នឹងហាមប្រាមមនុស្សចាស់មិនឱ្យប្រើប្រាស់ម៉ាស៊ីនដកប្រាក់…
ប្រទេសជប៉ុន ៖ ទីក្រុងអូសាកា (Osaka) ក្នុងតំបន់កានសៃ (Kansai) នៃកោះហុងស៊ូ (Honshu) របស់ប្រទេសជប៉ុន នឹងហាមប្រាមមនុស្សចាស់មិនឱ្យប្រើប្រាស់ម៉ាស៊ីនដកប្រាក់ ATM អំឡុងពេលកំពុងនិយាយទូរស័ព្ទ ក្រោមច្បាប់ថ្មីដើម្បីដោះស្រាយការរីករាលដាលនៃការឆបោក។ នេះបើយោងតាមប្រភពពីទីភ្នាក់ងារសារព័ត៌មាន AFP បានចេញផ្សាយ។
របាយការណ៍ផ្លូវការបានបង្ហាញថា នៅទូទាំងប្រទេសជប៉ុន ការខាតបង់ដោយសារតែករណីឆបោកដែលបានរៀបចំគិតទុកជាមុនដោយក្រុមឧក្រិដ្ឋជន រួមទាំងក្រុមបងធំសង្គមងងឹតយ៉ាគូហ្សា (Yakuza) ផងនោះ បានឈានដល់កម្រិតកំណត់ត្រាគិតជាទឹកប្រាក់ចំនួន៧២,២ពាន់លានយ៉េន ឬស្មើនឹង ៥០០លានដុល្លារអាមេរិក កាលពីឆ្នាំមុន ហើយមនុស្សចាស់ជាច្រើនគឺជាគោលដៅចម្បងសម្រាប់ការឆបោក តាមរយៈការហៅទូរស័ព្ទ ដោយក្រុមបោកប្រាស់បានតាំងខ្លួនជាសាច់ញាតិ ជាប៉ូលិស ឬមេធាវី ដើម្បីបញ្ចុះបញ្ចូលពួកគាត់ឱ្យដក ឬផ្ទេរប្រាក់ទៅឱ្យពួកគេ។
ឆ្លើយតបតាមការកើនឡើងនេះ អាជ្ញាធរទីក្រុងអូសាកាបានដាក់ចេញបទប្បញ្ញត្តិថ្មី ដែលចូលជាធរមានចាប់ពីខែសីហាខាងមុខនេះតទៅ ដោយហាមបុគ្គលមានអាយុចាប់ពី៦៥ឆ្នាំឡើងទៅកាន់ទូរសព្ទដៃពេលកំពុងប្រើប្រាស់ម៉ាស៊ីន ATM។ ច្បាប់នេះត្រូវបានគេរាយការណ៍ថាជាច្បាប់ដំបូងសម្រាប់ប្រទេសជប៉ុន ដោយតម្រូវឱ្យប្រតិបត្តិករម៉ាស៊ីន ATM ជូនដំណឹងដល់អតិថិជនរបស់ពួកគេអំពីការហាមឃាត់នេះ ឧទាហរណ៍ដោយការដាក់ផ្ទាំងរូបភាព ឬការចែកចាយខិត្តប័ណ្ណជាដើម។ ទោះយ៉ាងណាក៏ដោយ នឹងមិនមានការផាកពិន័យចំពោះមនុស្សចាស់ ឬស្ថាប័នណាមួយដែលមិនគោរពតាមនោះទេ។
មន្ត្រីប្រចាំតំបន់ម្នាក់បានពន្យល់ប្រាប់ AFP កាលពីថ្ងៃទី២៥ ខែមេសា កន្លងទៅថា ដោយសារតែមនុស្សចាស់គឺជាជនរងគ្រោះនៃក្រុមឆបោក ហើយប្រតិបត្តិករ រួមទាំងធនាគារដែលព្យាយាមការពារប្រឆាំងនឹងសកម្មភាពឆបោកនោះ គឺមិនសក្តិសមទេក្នុងការដាក់ពិន័យលើពួកគេ។ បើតាមការអះអាងពីប៉ូលិសបានឱ្យដឹងថា ទីក្រុងអូសាកាមាន ករណីឆបោកដែលរៀបចំទុកជាមុនច្រើនជាងគេលំដាប់ទីពីរ បន្ទាប់ពីទីក្រុងតូក្យូ។
បន្ថែមពីលើនេះទៀត ច្បាប់ដែលបានកែសម្រួលក៏ជំរុញឱ្យធនាគារធ្វើការឆ្ពោះទៅរកការប្រើប្រាស់បច្ចេកវិទ្យា AI ដើម្បីជួយឱ្យម៉ាស៊ីន ATM របស់ពួកគេរកឃើញអ្នកប្រើប្រាស់ដែលនិយាយនៅលើទូរស័ព្ទដៃ។ ប៉ូលីសក៏បានព្រមានថា មនុស្សចាស់ក៏អាចត្រូវបានគេបញ្ឆោតឱ្យប្រើប្រាស់ម៉ាស៊ីន ATM ដើម្បីទទួលបានប្រាក់ពីកិច្ចព្រមព្រៀងធានារ៉ាប់រង ឬប្រាក់សោធននិវត្តន៍របស់ពួកគាត់៕
ចែករំលែកព័តមាននេះ