រាជធានីភ្នំពេញ ៖ មន្ត្រីឧទ្យានុរក្សនៃតំបន់ការពារធម្មជាតិ បាននិងកំពុងប្រើប្រាស់ឧបករណ៍ដ្រូន (Drone) ដើម្បីតាមដាន និងបង្ក្រាបបទល្មើសបំផ្លាញធនធានធម្មជាតិ បានយ៉ាងមានប្រសិទ្ធភាព ស្របពេលដែលបច្ចេកវិទ្យាដ្រូន និងកម្មវិធី…
រាជធានីភ្នំពេញ ៖ មន្ត្រីឧទ្យានុរក្សនៃតំបន់ការពារធម្មជាតិ បាននិងកំពុងប្រើប្រាស់ឧបករណ៍ដ្រូន (Drone) ដើម្បីតាមដាន និងបង្ក្រាបបទល្មើសបំផ្លាញធនធានធម្មជាតិ បានយ៉ាងមានប្រសិទ្ធភាព ស្របពេលដែលបច្ចេកវិទ្យាដ្រូន និងកម្មវិធី SMART Mobile បានចូលរួមចំណែកយ៉ាងខ្លាំងធ្វើឱ្យបទល្មើសធនធានធម្មជាតិមានការថយចុះគួរឱ្យកត់សម្គាល់ ។
លោក រស់ លីដា មន្ត្រីឧទ្យានុរក្ស នៃដែនជម្រកសត្វព្រៃកែវសីមា ក្នុងខេត្តមណ្ឌលគីរី បានបញ្ជាក់ថា តាមរយៈប្រព័ន្ធបច្ចេកវិទ្យានេះ មន្ត្រីឧទ្យានុរក្ស បានបញ្ជូនសំណុំរឿងបទល្មើសធនធានធម្មជាតិ ទៅតុលាការជាច្រើន ដូច្នេះដ្រូន នឹងចូលរួមបង្កើនប្រសិទ្ធភាពក្នុងការល្បាតរបស់មន្ត្រីឧទ្យានុរក្ស សហគមន៍ការពារធម្មជាតិ និងអ្នកពាក់ព័ន្ធផ្សេងទៀត តាមរយៈការកំណត់ព័ត៌មាន ឬទីតាំងសង្ស័យមានបទល្មើសជាមុន ។
មិនត្រឹមប៉ុណ្ណឹងទេ វាក៏ចូលរួមប្រមូលទិន្នន័យ ជាពិសេសទាក់ទងនឹងការបាត់បង់ព្រៃឈើ ដើម្បីបង្ហាញទៅកាន់ឱ្យរដ្ឋាភិបាល ឬអ្នកមានសមត្ថកិច្ច ក្នុងការសម្រេចចិត្តអន្តរាគមន៍ ឬដំណោះស្រាយយ៉ាងណា ដើម្បីឈានទៅរកភាពប្រសើរឡើង។ លោកបន្តថា ដ្រូន មានវិសាលភាពឃ្លាំមើលទីតាំងបានធំទូលាយល្អ ជាពិសេសនៅទីតាំងតំបន់ ដែលមានព្រៃក្រាស តំបន់ភ្នំ និងអូរជាដើម ខណៈនៅខែខ្លះមន្ត្រីឧទ្យានុរក្សមិនអាចធ្វើដំណើរដោយផ្ទាល់ចុះទៅល្បាតនៅតាមគោលដៅមួយចំនួនបាននោះទេ ប៉ុន្តែដ្រូនបានចូលរួមចំណែកយ៉ាងខ្លាំងឃ្លាំមើលបទល្មើសជាដើម ។
លោក ខ្វៃ អាទិត្យា អ្នកនាំពាក្យក្រសួងបរិស្ថាន បានបញ្ជាក់ប្រាប់អ្នកសារព័ត៌មានថា បន្ទាប់ពីក្រសួងបរិស្ថាន បានបំពាក់ប្រព័ន្ធបច្ចេកវិទ្យាដ្រូន ទៅដល់មន្ត្រីឧទ្យានុរក្សរួចមកបទល្មើសព្រៃឈើ និងសត្វព្រៃមានការថយចុះ ដែលនេះបានបង្ហាញពីការយកចិត្តទុកក្នុងកិច្ចការអភិរក្សធនធានធម្មជាតិនៅកម្ពុជាឱ្យមានប្រសិទ្ធភាពសម្រាប់មនុស្សជំនាន់ក្រោយ។ «ជាលទ្ធផល នៃការបង្ក្រាបបទល្មើសព្រៃឈើនិងសត្វព្រៃ ក្នុងរយៈពេលពីរឆ្នាំនេះមានការថយចុះ»។
អ្នកនាំពាក្យរូបនេះ បានបន្ថែមថា ការប្រើប្រាស់ដ្រូន នៅពេលនេះក៏បង្ហាញពីការវិវត្តថ្មីមួយរបស់កម្ពុជា ក្នុងសម័យបច្ចេកវិទ្យា ព្រោះថាសព្វថ្ងៃ ការល្បាតព្រៃមិនអាចពឹងផ្អែកលើកម្លាំងមនុស្សតែមួយមុខបានទេ។ ការវិវត្តបច្ចេកវិទ្យាទំនើបនេះ ក៏ជាផ្នែកមួយបង្កើនប្រសិទ្ធភាពក្នុងការល្បាតរបស់មន្ត្រីឧទ្យានុរក្ស សហគមន៍ការពារធម្មជាតិ និងអ្នកពាក់ព័ន្ធផ្សេងទៀត ។
សូមជម្រាបថា នៅឆ្នាំ២០២៤-២០២៥ ក្រសួងបរិស្ថានបានផ្ដល់ផែនទីតំបន់ការពារធម្មជាតិ និងផែនទីផ្កាយរណបដល់រដ្ឋបាលថ្នាក់ក្រោមជាតិ អាជ្ញាធរមូលដ្ឋាន និងបានប្រគល់ដ្រូនចំនួន ៤៧គ្រឿង ដល់មន្ទីរបរិស្ថានគ្រប់រាជធានី-ខេត្ត ដើម្បីតាមដាន និងបង្ក្រាបបទល្មើសព្រៃឈើ ។
ក្រសួងបរិស្ថាន ក៏បានបណ្តុះបណ្តាល និងពង្រឹងសមត្ថភាពដល់មន្ត្រីឧទ្យានុរក្សឱ្យចេះប្រើប្រាស់ប្រព័ន្ធបច្ចេកវិទ្យាដ្រូន និងកម្មវិធី SMART Mobile ដែលជាមួយឧបករណ៍ស្មាតហ្វូន ឱ្យយល់ដឹងអំពីវិធីសាស្ត្រក្នុងការប្រមូលទិន្នន័យល្បាត និងការអង្កេតតាមដានសកម្មភាពបទល្មើសធនធានធម្មជាតិ នៅក្នុងតំបន់ការពារធម្មជាតិប្រកបដោយភាពត្រឹមត្រូវតាមរយៈការប្រើប្រាស់ប្រព័ន្ធបច្ចេក វិទ្យាទំនើបមួយនេះ ៕
ចែករំលែកព័តមាននេះ