ខេត្តពោធិ៍សាត់​៖ រថយន្ត​ពេទ្យ​ចំនួន​02​គ្រឿង​និង​រថយន្ត​ពន្លត់អគ្គីភ័យ​ចំនួន​01​គ្រឿង ជា​អំណោយ​របស់​រដ្ឋបាល​ខេត្ត​Gyoenggi-do នៃ​សាធារណរដ្ឋ​កូរ៉េ បាន​ត្រូវ​លោក Park Woohee ប្រធាន​គណៈ​ប្រតិភូ នាំ​យក​មក​ប្រគល់​ជូន​រដ្ឋបាល​ខេត្តពោធិ៍សាត់ ទុក​សម្រាប់​ប្រើប្រាស់​បញ្ជូន​អ្នកជំងឺ​ក្នុង​មន្ទីរពេទ្យ និង​ពន្លត់អគ្គីភ័យ​។

ពិធី​ប្រគល់​ទទួល​ធ្វើ​នៅ​សាលាខេត្ត​ពោធិ៍សាត់ នា​រសៀល​ថ្ងៃ​ទី​27​ខែតុលា​ឆ្នាំ​2025 ដោយ​មានការ​អញ្ជើញ​ចូលរួម​ពី​លោក ខូ​យ រី​ដា អភិបាល​នៃ​គ​ណះ​អភិបាលខេត្ត និង​មន្ត្រី​អ្នកមុខអ្នកការ​មួយ​ចំនួន​ទៀត​។ លោក ខូ​យ រី​ដា បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​លោក Park Woohee និង​អភិបាលខេត្ត Gyeonggi-do នៃ​សាធារណរដ្ឋ​កូរ៉េ ក៏​ដូច​ជា​គណៈប្រតិភូ​ទាំងអស់ ដែល​បាន​ផ្ដល់​ជំនួយ នូវ​រថយន្ត​ពេទ្យ ចំនួន​០២​គ្រឿង និង​រថយន្ត​ពន្លត់​អគ្គិភ័យ ចំនួន​០១​គ្រឿង ជូន​ដល់​រដ្ឋបាល​ខេត្ត​នា​ពេល​នេះ ដើម្បី​ជួយ​បម្រើ​ជា​ផលប្រយោជន៍ ដល់​ប្រជាពលរដ្ឋ​កម្ពុជា ដែល​ជួប​គ្រោះ​អគ្គី​ភ័យ និង​គ្រោះថ្នាក់​ជាយថាហេតុ​ផ្សេង​ៗ​។

លោក ខូ​យ រី​ដា បាន​បង្ហាញ​អារម្មណ៍​សប្បាយ​រីករាយ និង​គាំទ្រ ដោយ​ប្តេជ្ញា​ខិតខំ​ជម្រុញ​កិច្ចសហការ លើ​ប្រតិបត្តិការ​វិស័យ​ទេសចរណ៍ វប្បធម៌ សេដ្ឋកិច្ច អប់រំ កសិកម្ម ជា​ពិសេស​ការ​បញ្ជូន​ពលករ ក្នុង​ខេត្តពោធិ៍សាត់ ទៅ​ធ្វើការ​តាម​រដូវ​កាល នៅ​ខេត្ត Gyeonggi-do នៃ​សាធារណរដ្ឋ​កូរ៉េ ដោយ​ស្រប​តាម​គោលនយោបាយ នៃ​ប្រទេស​ទាំង​ពីរ​។

លោក​អភិបាលខេត្ត បាន​គូសបញ្ជាក់​បន្ថែម​ថា កន្លង​មកនេះ ពលករ​ភាគច្រើន ពួក​គេ​ពេញចិត្ត​ទៅ​ធ្វើការ​នៅ​ប្រទេស​កូរ៉េ និង​ជប៉ុន​ច្រើន​ជាងគេ នេះ​ដោយសារ​ប្រទេស​ទាំង​ពីរ បង្ក​លក្ខណៈ​ងាយស្រួល​ដល់​ពលករ​ខ្មែរ និង​ទទួល​បាន​ប្រាក់ខែ​ខ្ពស់ ដើម្បី​យក​មក​អភិវឌ្ឍន៍​ក្រុម​គ្រួសារ នៅ​ស្រុក​កំណើត​។ លោក​ក៏​សូម​អរគុណ​ដល់ រដ្ឋបាល​ខេត្ត Gyeonggi-do នៃ​សាធារណរដ្ឋ​កូរ៉េ ដែល​បាន​ជ្រើសរើស​ពលករ ដែល​មាន​សមត្ថភាព​ក្នុង​ខេត្តពោធិ៍សាត់ ទៅ​ធ្វើការ ស្រប​តាម​កិច្ច​ព្រម​ព្រៀម ដែល​បាន​ចុះហត្ថលេខា​នា​ពេល​កន្លង​មក​។

បន្ទា​ពី​ប្រគល់​-​ទទួល​រថយន្ត​រួច​មក ក៍​មានកម្ម​វិធី​ប្រគល់​គ្រឿង​ឥស្សរិយយស លិខិត​ថ្លែងអំណរគុណ ព្រមទាំង​វត្ថុ​អនុស្សាវរីយ៍ ជូន​ដល់​ដល់​សប្បុរសជន ០៥​រូប នៃ​សាធារណរដ្ឋ​កូរ៉េ​ផង​ដែរ​។ នេះ​ជា​ចំណង​សាមគ្គីភាព​មួយទៀត រវាង​ខេត្ត​Gyoenggi-do នៃ​សាធារណរដ្ឋ​កូរ៉េ ជាមួយ​ខេត្តពោធិ៍សាត់ នៃ​ព្រះ​រា​ណា​ចក្រ​កម្ពុជា