ទីក្រុងអូសាកា ៖ ហាងសាច់អាំងមួយកន្លែងនៅទីក្រុងអូសាកា ប្រទេសជប៉ុន បានទទួលរងការរិះគន់ និងការជជែកវែកញែកខ្លាំងលើបណ្តាញទំនាក់ទំនងសង្គម បន្ទាប់ពីហាងនេះបានបិទសេចក្តីជូនដំណឹងមួយនៅទ្វារខាងមុខហាង មិនទទួលអតិថិជនចិនឡើយ ដោយសារតែពួកគេមានអាកប្បកិរិយាមិនសមរម្យ។ នេះបើយោងតាមប្រភពពីសារព័ត៌មាន…
ទីក្រុងអូសាកា ៖ ហាងសាច់អាំងមួយកន្លែងនៅទីក្រុងអូសាកា ប្រទេសជប៉ុន បានទទួលរងការរិះគន់ និងការជជែកវែកញែកខ្លាំងលើបណ្តាញទំនាក់ទំនងសង្គម បន្ទាប់ពីហាងនេះបានបិទសេចក្តីជូនដំណឹងមួយនៅទ្វារខាងមុខហាង មិនទទួលអតិថិជនចិនឡើយ ដោយសារតែពួកគេមានអាកប្បកិរិយាមិនសមរម្យ។ នេះបើយោងតាមប្រភពពីសារព័ត៌មាន South China Morning Post, NDTV និង VnExpress បានចេញផ្សាយកាលពីពេលថ្មីៗនេះ។
ហាងលក់សាច់អាំងបែប Yakitori ដែលមានឈ្មោះថា Hayashin បានបង្ករឿងដ៏ភ្ញាក់ផ្អើលកាលពីពេលថ្មីៗនេះ និងត្រូវបានបង្ហាញដោយគណនីបណ្តាញសង្គមមួយចំនួន កាលពីថ្ងៃទី១០ ខែឧសភា ឆ្នាំ២០២៥ ដោយពួកគេបដិសេធទទួលអតិថិជនចិន ដោយបានបិទសេចក្តីជូនដំណឹងសរសេរជាភាសាចិនថា ហាងយើងខ្ញុំមិនទទួលអតិថិជនចិនទេ ព្រោះភាគច្រើនមានអាកប្បកិរិយាមិនសមរម្យ ឬ ឈ្លើយ។ រូបថតនៃការបិទសេចក្តីជូនដំណឹងនេះ ត្រូវបានផ្សព្វផ្សាយលើបណ្តាញសង្គម បង្កឱ្យមានការជជែកដេញដោលយ៉ាងក្តៅគគុក។
យោងតាមប្រភពពីសារព័ត៌មាន NDTV បានរាយការណ៍ថា ខណៈពេលដែលអ្នកនិយមលេងបណ្តាញសង្គមមួយចំនួនបានគាំទ្រការសម្រេចចិត្តហាងសាច់អាំងនោះ អ្នកផ្សេងទៀតបានសម្តែងការខកចិត្ត និងខឹងសម្បារចំពោះអាកប្បកិរិយារើសអើងមួយនេះ។ ជាក់ស្តែង គណនីមួយបានសរសេរថា «នេះគឺជាការសម្រេចចិត្តដ៏អស្ចារ្យ»។ តែផ្ទុយទៅវិញ គណនីមួយផ្សេងទៀតបានឆ្លើយតបថា «ហាងលក់សាច់អាំងដែលបិទសេចក្តីជូនដំណឹងបែបនេះ មានអាកប្បកិរិយាអាក្រក់ជាងអតិថិជនមានអាកប្បកិរិយាមិនសមរម្យ ឬ ឈ្លើយទៅទៀត» ចំពេលដែលគណនីមួយចំនួនផ្សេងទៀតបានស្នើឱ្យខាងហាងធ្វើការបកស្រាយផងដែរ។
គ្រប់គ្នាមិនយល់ថាមូលហេតុអ្វីដែលជំរុញឱ្យហាងលក់សាច់អាំងជប៉ុនមួយនេះ ប្រកាសមិនទទួលអតិថិជនចិននោះទេ ប៉ុន្តែនេះក៏មិនមែនជាលើកទី១ទេ ដែលអាជីវកម្មនៅជប៉ុនរើសអើងអតិថិជនចិន។ តួយ៉ាង កាលពីឆ្នាំ២០២៣ Influencer ជនជាតិចិនម្នាក់បានលាតត្រដាងភោជនីយដ្ឋានចិននៅទីក្រុងតូក្យូមួយកន្លែង បានបិទសេចក្តីជូនដំណឹងមិនស្វាគមន៍អតិថិជនចិន ដោយមានទាំងសរសេរជាភាសាចិន និងកូរ៉េទៀតផង។ ភោជនីយដ្ឋាននៅទីក្រុងតូក្យូមួយកន្លែងផ្សេងទៀត ក៏បានបង្ហោះសារលើបណ្តាញសង្គមរបស់ពួកគេកាលពីខែកក្កដា ឆ្នាំមុនផងដែរ ដោយមិនទទួលអតិថិជនចិន និងកូរ៉េខាងត្បូងដូចគ្នា។
សូមជម្រាបជូនថា ប្រទេសជប៉ុនបានទទួលស្វាគមន៍ភ្ញៀវទេសចរអន្តរជាតិសរុប ៣៦,៩ លាននាក់ កាលពីឆ្នាំមុន ពោលកើនឡើង ៤៧,១% បើធៀបនឹងឆ្នាំ២០២៣ ខណៈចំនួនភ្ញៀងច្រើនបំផុតត្រូវបានកត់ត្រាមកពីប្រទេសកូរ៉េខាងត្បូង បន្ទាប់មកគឺប្រទេសចិន៕
ចែករំលែកព័តមាននេះ