ខេត្តកំពង់ស្ពឺ ៖ ក្រុមជនសង្ស័យលួច និងឆ.ក់ទូរស័ព្ទដៃចំនួន៩នាក់ ត្រូវបានកម្លាំងនគរបាលស្រុកសាមគ្គីមុនីជ័យ ធ្វើការស្រាវជ្រាវបង្ក្រាបបាន ខណៈដែលធ្វើសកម្មភាពបានសម្រេចហើយជនរងគ្រោះដាក់ពាក្យបណ្តឹងឱ្យនគរបាលជួយអន្តរាគមន៍ ។ នគរបាលស្រុកសាមគ្គីមុនីជ័យ បាននិយាយឱ្យដឹងថា…
ខេត្តកំពង់ស្ពឺ ៖ ក្រុមជនសង្ស័យលួច និងឆ.ក់ទូរស័ព្ទដៃចំនួន៩នាក់ ត្រូវបានកម្លាំងនគរបាលស្រុកសាមគ្គីមុនីជ័យ ធ្វើការស្រាវជ្រាវបង្ក្រាបបាន ខណៈដែលធ្វើសកម្មភាពបានសម្រេចហើយជនរងគ្រោះដាក់ពាក្យបណ្តឹងឱ្យនគរបាលជួយអន្តរាគមន៍ ។
នគរបាលស្រុកសាមគ្គីមុនីជ័យ បាននិយាយឱ្យដឹងថា ក្រោយទទួលបានពាក្យបណ្ដឹងពីជនរងគ្រោះក្នុងករណីលួច និងឆក់ទូរស័ព្ទនៅក្នុងឃុំដំណាក់រាំង និងឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺរួចមក ។
ដោយបានការអនុញ្ញាត និងការដឹកនាំបញ្ជាពីលោកឧត្ដមសេនីយ៍ទោ ឃឹម សុកខៃ ស្នងការនៃស្នងការដ្ឋាននគរបាលខេត្តកំពង់ស្ពឺ កាលពីល្ងាចថ្ងៃទី០៤ ខែកក្កដា ឆ្នាំ២០២៥ កម្លាំងអធិការដ្ឋាននគរបាស្រុកសាមគ្គីមុនីជ័យ បានបើកកិច្ចសហការពីកម្លាំងអធិការដ្ឋាននគរបាលស្រុកសំរោងទងរហូតឈានទៅកំណត់បានមុខសញ្ញា និងឃាត់ជនសង្ស័យចំនួន៩នាក់ ។
នគរបាលស្រុកសាមគ្គីមុនីជ័យ បានបន្តទៀតថា ក្រុមជនសង្ស័យដែលឃាត់ខ្លួនបានទី១.ឈ្មោះ ទឹង ពេញ ភេទប្រុស អាយុ២៤ឆ្នាំ រស់នៅភូមិក្រាំងអារិយ្យ ឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ ។ ទី២.ឈ្មោះ សួរ សាមុត ភេទប្រុស អាយុ១៨ឆ្នាំ រស់នៅភូមិឡធ្យូង ឃុំសំបូរ ស្រុកសំរោងទង (ធ្លាប់ជាប់ពន្ធនាគា០១លើក នៅខេត្តកំពង់ស្ពឺ) ។ ទី៣.ឈ្មោះ ជាតិ មេសា ហៅសា ភេទប្រុស អាយុ១៨ឆ្នាំ រស់នៅភូមិតាពរ ឃុំសំបូរ ស្រុកសំរោងទង ។
ទី៤.ឈ្មោះ សយ ពិសិដ្ឋ ហៅសិត ភេទប្រុស អាយុ១៨ឆ្នាំ រស់នៅភូមិអង្គខ្មៅ ឃុំសំបូរ ស្រុកសំរោងទង (ធ្លាប់ជាប់ពន្ធនាគារ០១លើក នៅខេត្តកំពង់ស្ពឺ) ។ ទី៥.ឈ្មោះ ផន សុភត្រា ហៅថាក់ ភេទប្រុស អាយុ២០ឆ្នាំ រស់នៅភូមិក្រាំងអារិយ្យ ឃុំភ្នំតូចស្រុកសាមគ្គីមុនីជ័យ (ធ្លាប់ជាប់ពន្ធធានាគារ០១លើក នៅខេត្តកំពង់ស្ពឺ)។
ទី៦.ឈ្មោះ ស៊យ ពុធ ភេទប្រុស អាយុ១៨ឆ្នាំ រស់នៅភូមិវត្តទម្លាប់ ឃុំសំរោងទង ស្រុកសំរោងទង ។ ទី៧.ឈ្មោះ ប៉ូច ម៉ឺន ភេទប្រុស អាយុ១៨ឆ្នាំ រស់នៅភូមិពាំងល្វា ឃុំពាំងល្វា ស្រុកសាមគ្គីមុនីជ័យ (ធ្លាប់ជាប់ពន្ធនាគារ០១លើក នៅខេត្តកំពង់ស្ពឺ)។ ទី៨.ឈ្មោះ ទី ចំរុង ហៅងោល ភេទប្រុស អាយុ២០ឆ្នាំ រស់នៅភូមិព្រៃក្ដួច ឃុំភ្នំតូច ស្រុកសាមគ្គីមុនីជ័យ។ និងទី៩.ឈ្មោះ ផុន ទីន ភេទប្រុស អាយុ២៥ឆ្នាំ រស់នៅភូមិព្រៃក្ដួច ឃុំភ្នំតូច ស្រុកសាមគ្គីមុនីជ័យ (ធ្លាប់ជាប់ពន្ធចំនួន០២លើក នៅខេត្តកំពង់ស្ពឺ០១លើក នឹងនៅគុកព្រៃសរ០១លើក)។
នគរបាលស្រុកសាមគ្គីមុនីជ័យបានបញ្ជាក់ថា ក្រោយឃាត់ខ្លួនក្រុមជនសង្ស័យខាងលើ កម្លាំងនគរបាលដកហូតបានវត្ថុតាងទូរស័ព្ទចំនួន០២គ្រឿង និងម៉ូតូជាមធ្យោបាយចំនួន០៣គ្រឿងផងដែរ ។
បច្ចុប្បន្ន ក្រុមជនសង្ស័យទាំង៩នាក់ខាងលើ រួមជាមួយវត្ថុតាងត្រូវបានឃាត់បញ្ជូនទៅអធិការដ្ឋាននគរបាលស្រុកសាមគ្គីមុនីជ័យ ដើម្បីសាកសួរ និងកសាងសំណុំរឿងបញ្ជូនទៅការិយាល័យជំនាញចាត់ការបន្តតាមផ្លូវច្បាប់ ៕
ចែករំលែកព័តមាននេះ