រាជធានីភ្នំពេញ ៖ សិស្សស្រីចំនួន៤នាក់រស់នៅក្នុងភូមិជាមួយគ្នា ប៉ុន្តែរៀននៅសាលាផ្សេងពីគ្នា ហើយក្រោយ ពេលចប់ម៉ោងសិក្សាចេញពីរៀន មិនបាននាំគ្នាត្រលប់ទៅផ្ទះនោះទេ ពួកនាងបានណាត់ជួបគ្នា បន្ទាប់មកទិញចំណីអាហារ និងបានជិះម៉ូតូ២គ្រឿងឌុបគ្នាទៅលេងទឹករណ្ដៅដីក្នុងដីឡូត៌មួយកន្លែងដែលមានជម្រៅជាង១០ម៉ែត្រ…
រាជធានីភ្នំពេញ ៖ សិស្សស្រីចំនួន៤នាក់រស់នៅក្នុងភូមិជាមួយគ្នា ប៉ុន្តែរៀននៅសាលាផ្សេងពីគ្នា ហើយក្រោយ ពេលចប់ម៉ោងសិក្សាចេញពីរៀន មិនបាននាំគ្នាត្រលប់ទៅផ្ទះនោះទេ ពួកនាងបានណាត់ជួបគ្នា បន្ទាប់មកទិញចំណីអាហារ និងបានជិះម៉ូតូ២គ្រឿងឌុបគ្នាទៅលេងទឹករណ្ដៅដីក្នុងដីឡូត៌មួយកន្លែងដែលមានជម្រៅជាង១០ម៉ែត្រ ។ លុះពេលទៅដល់ពួកនាងចង់ងូត និងហែលទឹកលេង ប៉ុន្តែអត់ដឹងថាទឹកស្រះនោះជម្រៅប៉ុន្មានម៉ែត្រឡើយ ក៏បានតោងជើងបន្តគ្នាទម្លាក់ខ្លួនចុះទៅក្នុងស្រះដើម្បីវាស់ជម្រៅទឹក ក៏បណ្ដាលឲ្យធ្លាក់ទឹកទាំងអស់គ្នាហើយ២នាក់លង់លិចបាត់ទៅក្នុងទឹក ឯ២នាក់ទៀតរួចខ្លួន ។
ខណៈនោះស្ត្រីជាម្ដាយបានទៅទីតាំងកើតហេតុ ហើយដោយការតក់ស្លុតខ្លាំងពេកយំសោកបោកខ្លួនរហូតដល់សន្លប់បាត់ស្មារតី ដោយឡែកក្រុមអ្នកមុជទឹកកងពលតូចទ័ពពិសេសឆ័ត្រយោង៩១១ ទៅជួយរាវរកសាកសពនិងបានរកឃើញទាំង២នាក់នៅវេលាម៉ង៤រសៀលថ្ងៃដដែលនោះ ។
ហេតុការណ៍នោះបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង១រសៀលថ្ងៃទី៣០ ខែកក្កដា ឆ្នាំ២០២៥ នៅចំណុចរណ្ដៅដីក្នុងដីឡូត៌មួយកន្លែងស្ថិតនៅតាមបណ្ដោយផ្លូវតាម៉ៃ (ផ្លូវទៅវត្តពោធិ៍វ័ន )ក្នុងភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ក្មេងស្រីដែលស្លាប់នោះ១,ឈ្មោះ លាភ ស្រីមាស អាយុ១៣ឆ្នាំ ២,ឈ្មោះ វ៉ាន្នី ចាន់ណា អាយុ១៣ឆ្នាំជាសិស្សរៀនថ្នាក់ទី៦(ក) នៃសាលាបឋមសិក្សាអូដឹម ។ ចំណែកក្មេងស្រី២នាក់ទៀតដែលឡើងគោករួចនោះម្នាក់ឈ្មោះថេង លីហ្សា១៤ឆ្នាំជាសិស្សថ្នាក់ទី៧(I1) និងឈ្មោះសំរិត បញ្ជារ៉ា អាយុ១៤ឆ្នាំ សិស្សថ្នាក់ទី៧(H1)នៃអនុវិទ្យាល័យជម្ពូវ័ន ។ ហើយស្សស្រីទាំង៤នាក់ខាងលើនោះរស់នៅក្នុងភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បើតាមក្មេងស្រីឈ្មោះថេង លីហ្សា ដែលបានរួចផុតពីការស្លាប់នោះបាននិយាយថា នៅវេលាម៉ោងប្រមាណជិត១១ព្រឹក ក្រោយពេលចេញពីសាលារៀន ពួកនាងទាំង៤នាក់បានណាត់ជួបគ្នាដើរលេង ហើយបានទិញចំណីមួយចំនួនដាក់យកទៅដើម្បីហូបជុំគ្នាផងដែរ ។ បន្ទាប់មកក៏បានជិះម៉ូតូ២គ្រឿងឌុបគ្នាទៅលេងនៅកន្លែងកើតហេតុខាងលើ លុះពេលទៅដល់មានបំណងហែលទឹកលេង ប៉ុន្តែមិនធ្លាប់ដឹងពីមុនមកនោះទេថា តើទឹករណ្ដៅដីនោះជម្រៅប៉ុន្មានមែត្រនោះទេ ។
ក្មេងស្រីរូបនោះបាននិយាយរៀបរាប់បន្តទៀតថា ខណៈនោះក៏បានឯកភាពគ្នាវាស់ជម្រៅទឹកដើម្បីចុះងូតនិងហែលលេង រួចក៏បានតោងជើងបន្តគ្នាសម្រូតខ្លួនចុះទៅក្នុងទឹករណ្ដៅដីនោះតាមច្រាំងថ្ម ដើម្បីវាស់ជម្រៅទឹក ដោយក្មេងស្រីដែលស្លាប់២នាក់នោះស្ថិតនៅលេខរៀងទី១និងទី២ ។ បន្ទាប់មករូបនាងស្ថិតនៅលេខរៀងទី៣ និងឈ្មោះសំរឹត បញ្ជារ៉ា ស្ថិតនៅលេខរៀងទី៤និងនៅលើគេ ហើយក៏ស្រាប់តែធ្លាក់ចូលទៅក្នុងទឹកទាំងអស់គ្នាតែម្ដង ។
នាងបញ្ជាថា ពេលនោះឈ្មោះសំរិត បញ្ជារ៉ា បានស្រវាឡើងគោករួចមុនគេ រួចបានស្ររែកហៅអ្នកដែលអង្គុយលេងជិតនោះឲ្យជិះម៉ូតូទៅហៅអ្នកភូមិឲ្យមកជួយ ព្រមទាំងរត់ទៅយកខ្សែនីឡុងនៅជិតនោះបោះឲ្យតោង ហើយរូបនាងតោងឡើងបាន ចំណែកក្មេងស្រីឈ្មោះ លាភ ស្រីមាស និងឈ្មោះ វ៉ាន្នី ចាន់ណា លង់លិចបាត់ទៅក្នុងទឹកតែម្ដង ៕
ចែករំលែកព័តមាននេះ