ទីក្រុងហូណូលូលូ៖ នៅទីបំផុត រលកយក្សស៊ូណាមីដែលគេព្យាករថាអាចនឹងកើតមាននោះបានក្លាយជាការពិតហើយ។ គ្រោះរញ្ជួយដីបាតសមុទ្រនៃតំបន់ចុងបូព៌ាប្រទេសរុស្ស៊ីកាលពីព្រឹកមិញពិតជាមិនធម្មតាឡើយ។ ជាមួយនឹងកម្រិត៨,៨រ៉ិចទ័រនៅជម្រៅផែនដីម្ភៃគីឡូម៉ែត្រ ការរញ្ជួយដីនេះបានបង្កជារលកយក្សស៊ូណាមីនៅតំបន់ជាប់មហាសមុទ្រប៉ាស៊ីហ្វិចជាបណ្ដើរៗហើយ។
ឧទាហរណ៍រលកយក្សនៅកោះហុកកៃដូរបស់ជប៉ុន, រលកយក្សនៅប្រជុំកោះគូរីល និងនៅតំបន់កាំឆាតកា (Kamchatka) របស់រុស្ស៊ី។ ឥឡូវនេះ ប្រទេសហ្វ៊ីលីពីនក៏កំពុងតែបារម្ភ និងកំពុងត្រៀមលក្ខណៈបង្ការផងដែរ។ ប្រភពខ្លះថារលកយក្សលើកនេះនឹងវាយប្រហារដល់រដ្ឋអាឡាស់ស្កា និងកាលីហ្វ័ញ៉ារបស់អាមេរិកថែមទៀត។
រលកយក្សស៊ូណាមីចាប់ផ្ដើមវាយប្រហារតំបន់ឆ្នេរសមុទ្រកោះហាវ៉ៃជាបណ្ដើរៗហើយ។ ហេតុនេះ អាជ្ញាធរបានបិទដំណើរការកំពង់ផែពាណិជ្ជកម្មទាំងអស់នៅលើកោះនេះ។ អាជ្ញាធរអំពាវនាវឱ្យប្រជាជនឡើងឱ្យផុតឆ្ងាយពីមាត់សមុទ្រ និងស្នាក់នៅតំបន់ដែលខ្ពស់ៗផុតពីទឹក។ អ្នករស់នៅកោះហាវ៉ៃបើអាចធ្វើទៅបានគួរឡើងទៅផ្ទះថ្មជាន់ទីបួន ឬខ្ពស់ជាងនេះដើម្បីធានាថាពួកគេមានសុវត្ថិភាព។
អភិបាលរដ្ឋហាវ៉ៃ លោកចូស ហ្គ្រីន (Josh Green) ថ្លែងថាប្រជាជនគួរកុំស្ថិតនៅក្បែរមាត់សមុទ្រដូចដែលយើងឃើញកាលពីពេលកន្លងមកអ្នកខ្លះចង់ទស្សនារលកយក្សព្រោះមិនដែលបានឃើញ ឬកម្របានឃើញ។ លោកសូមបញ្ជាក់ឡើងវិញថាសូមកុំធ្វើដូច្នេះឱ្យសោះ។ បើមិនដូច្នេះទេពួកគេនឹងជួបវាសនាអាក្រក់។ បើសិនជាត្រូវវាយប្រហារដោយស៊ូណាមីគឺមានតែផ្លូវស្លាប់មួយមុខគត់។
លោកហ្គ្រីនថ្លែងថាមិនទាន់មានរលកធំៗវាយប្រហារនៅឡើយទេទៅលើកោះហាវ៉ៃចាប់តាំងពីអាជ្ញាធរចាត់វិធានការបង្ការរួចមក។ ប៉ុន្តែអាកាសយានដ្ឋានដ៏ធំមួយបានលុបចោលជើងហោះហើរជាច្រើនដោយសារបារម្ភអំពីរលកយក្សស៊ូណាមី។ នេះបើតាមការដកស្រង់ប្រភពពីឌីដាប់បលយូ (Dw), ប៊ីប៊ីស៊ី (BBC) និងប្រភពដទៃទៀត៕
ចែករំលែកព័តមាននេះ