រាជធានីភ្នំពេញ ៖ បុរសម្នាក់ជាគ្រូនគរបាលមួយរូប ជិះម៉ូតូបុកឃឿនថ្មពុះចែកទ្រូងផ្លូវ បណ្ដាលឲ្យម៉ូតូហោះសង្កត់ពីលើស្លាប់យ៉ាងអាណោចអាធ័ម កាលពីវេលាម៉ោង៨និង៣០នាទីយប់ ថ្ងៃទី៣០ ខែកក្កដា ឆ្នាំ២០២៥ នៅចំនុចស្តុបវត្តនិរោធ…
រាជធានីភ្នំពេញ ៖ បុរសម្នាក់ជាគ្រូនគរបាលមួយរូប ជិះម៉ូតូបុកឃឿនថ្មពុះចែកទ្រូងផ្លូវ បណ្ដាលឲ្យម៉ូតូហោះសង្កត់ពីលើស្លាប់យ៉ាងអាណោចអាធ័ម កាលពីវេលាម៉ោង៨និង៣០នាទីយប់ ថ្ងៃទី៣០ ខែកក្កដា ឆ្នាំ២០២៥ នៅចំនុចស្តុបវត្តនិរោធ ផ្លូវជាតិលេខ១ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។
ជនរងគ្រោះឈ្មោះ មូល ចន្ថា ភេទប្រុស អាយុ៦២ឆ្នាំ ជាមន្ត្រីនគរបាល មានឋានន្តរសក្តិឧត្តមសេនីយ៍ទោ ( គ្រូនគរបាលជាតិ ថ្នាក់លេខ១) ស្នាក់នៅផ្ទះលេខ5B1 ផ្លូវ169 សង្កាត់វាលវង់ ខណ្ឌ៧មករា រាជធានីភ្នំពេញ មានស្រុកកំណើតនៅភូមិក្រាំងស្វាយ ស្រុកឈូក ខេត្តកំពត ។
តាមប្រភពព័ត៌មានបានអោយដឹងថា មុនពេលកើតហេតុ គេបានឃើញបុរសរងគ្រោះជិះម៉ូតូមួយគ្រឿងម៉ាក ADV350 ពណ៌ខ្មៅ ពាក់ស្លាកលេខ នគរបាល 1.7272 ធ្វើដំណើរតាមបណ្ដោយផ្លូវជាតិលេខ១ ក្នុងទិសដៅពីកើតទៅលិច លុះពេលមកដល់ចំណុចកើតហេតុ ក៍ស្រាប់តែម៉ូតូជ្រុលទៅបុកនឹងឃឿនថ្មពុះចែកទ្រូងផ្លូវយ៉ាងពេញទំហឹង បណ្ដាលឲ្យហោះផ្លោងទាំងម៉ូតូនិងមនុស្សត្រូវម៉ូតូសង្កត់ពីលើ បណ្តាលឲ្យជនរងគ្រោះស្លាប់នៅលើផ្លូវយ៉ាងអាណោចអាធ័ម ។
ករណីនេះផងដែរ បន្តិចក្រោយមកក៍មានកម្លាំងសមត្ថកិច្ចមូលដ្ឋាននិងជំនាញចរាចរណ៍ខណ្ឌច្បារអំពៅបានចុះទៅកន្លែងកើតហេតុ និងបានពិនិត្យឆែកមើលអត្តសញ្ញាណទើបដឹងថាជនរងគ្រោះជា គ្រូនគរបាលជាតិថ្នាក់លេខ១ ឋានន្តរសក្តិឧត្តមសេនីយ៍ទោ (ពាក់ផ្កាយ២)ពិតប្រាកដមែន ។
ក្រោយកើតហេតុ សមត្ថកិច្ចក៍បានទាក់ទងជាមួយក្រុមគ្រួសារអោយមកទទួលយកសពទៅចាត់ចែងធ្វើបុណ្យតាមប្រពៃណី ចំណែកមធ្យោបាយសមត្ថកិច្ចជំនាញចរាចរណ៍យកទៅរក្សាទុកនៅអធិការដ្ឋាននគរបាលខណ្ឌច្បារអំពៅ ៕
ចែករំលែកព័តមាននេះ