ទីក្រុងសៀងហៃ៖ អាជ្ញាធរនៅទីក្រុងសៀងហៃ ប្រទេសចិន បានជម្លៀសប្រជាជនជាង២,៨សែននាក់ចាប់តាំងពីយប់ថ្ងៃអង្គាររហូតមកដល់ពេលនេះដើម្បីបង្ការខ្លួនពីខ្យល់ព្យុះដ៏ធំមួយឈ្មោះកូម៉ាយ (Co-May)។ គេព្យាករថាខ្យល់ព្យុះនេះនឹងបង្កជាភ្លៀងធ្លាក់ខ្លាំង។ ខ្យល់ព្យុះចាប់ផ្ដើមបក់ទៅដល់តំបន់ដីគោកប្រទេសចិន និងបម្លែងខ្លួនទៅជាព្យុះត្រូពិចនៅពេលទៅដល់ទីក្រុងកំពង់ផែចូវសាន (Zhoushan) ខេត្តសឺជាំង (Zhejiang) កាលពីព្រឹកថ្ងៃពុធ។
សារព័ត៌មានចិនផ្សាយថាខ្យល់ព្យុះនេះមានកម្លាំងបក់អតិបរមា៨៣គីឡូម៉ែត្រក្នុងមួយម៉ោង។ ថ្វីដ្បិតខ្យល់ព្យុះនេះមានកម្លាំងខ្សោយជាងព្យុះដទៃទៀត ប៉ុន្តែអាជ្ញាធរនៅទីក្រុងសៀងហៃ និងទីក្រុងដទៃទៀតនៅតាមតំបន់ដីសណ្ដទន្លេយ៉ាងស៊ីមិនអាចមើលស្រាល ឬធ្វេសប្រហែសបានឡើយ។ អាជ្ញាធរបានលុបចោលជើងហោះហើរ និងសេវាដឹកជញ្ជូនតាមរថភ្លើង។
សាលារៀនត្រូវបានបិទទ្វារខណៈដែលអាជ្ញាធរចុះទៅជម្លៀសខ្លួនអ្នករស់នៅតំបន់ប្រឈមនឹងហានិភ័យខ្ពស់។ ផ្នែកឧតុនិយមព្យាករថាគិតត្រឹមល្ងាចថ្ងៃពុធ ខ្យល់ព្យុះកូម៉ាយនឹងបក់កាន់តែកៀកទៅនឹងទីក្រុងសៀងហៃ។ តាមពិត ទីក្រុងនេះមិនសូវទទួលរងការវាយប្រហារដោយផ្ទាល់ពីខ្យល់ព្យុះទេព្រោះខ្យល់ភាគច្រើនច្រើនតែបក់ហួសទៅតំបន់ភាគខាងត្បូង។
ប្រភពខ្លះថាអាកាសយានដ្ឋានធំៗចំនួន២នៅទីក្រុងសៀងហៃបានលុបចោលជើងហោះហើរយ៉ាងតិច៦៤០ខ្សែ។ ក្រៅពីនេះ រាល់ការដឹកជញ្ជូនតាមនាវាចម្លង (ស្រឡាង) ក៏ត្រូវលុបចោលផងដែរ។ អាជ្ញាធរបានអំពាវនាវទៅអ្នកធ្វើដំណើរនៅតាមដងផ្លូវសូមបើកបរក្រោមល្បឿន៦០គីឡូម៉ែត្រក្នុងមួយម៉ោង។ ទោះបីរថភ្លើងខ្លះអាចបន្តសេវាដឹកជញ្ជូនរបស់ខ្លួនបាន ប៉ុន្តែពួកគេត្រូវតែធ្វើដំណើរដោយយឺតៗ៕
ចែករំលែកព័តមាននេះ