ប្រទេសរុស្ស៊ី ៖ ភ្នំភ្លើងKLIOUTECHEVSKOI ស្ថិតនៅឧបទ្វីបកាំឆាត់ការុស្ស៊ី បានផ្ទុះកាលពីថ្ងៃទី៣០កក្កដា បន្ទាប់ពីការរញ្ជួយដីខ្លាំងមួយកម្លាំងដល់៨,៨រីស្ទ័រ នាំឲ្យមានរលកយក្សស៊ូណាមីប៉ះពាល់ដល់តំបន់ចុងបូព៌ារុស្ស៊ីពុំសូវមានប្រជាជនរស់នៅច្រើននោះ។ នេះជាការគូសបញ្ជាក់របស់វិទ្យាស្ថានត្រួតពិនិត្យភូគុម្ភសាស្ត្ររុស្ស៊ី ។
តាមតេឡេក្រាមផ្នែកសិក្សាភូគុម្ភសាស្ត្ររុស្ស៊ីសរសេរថា ភ្នំភ្លើងKLIOUTECHEVSKOI កំពុងតែផ្ទុះ។ តាមរូបភាពនិងវីដេអូដែលភ្នាក់ងារនោះបង្ហោះតាមបណ្ដាញសង្គម គេឃើញអណ្ដាតភ្លើងជះទៅលើអាកាស។ ការហូរកំអែរភ្នំភ្លើងពិនិត្យឃើញនៅផ្នែកខាងលិចនៃចង្កេះភ្នំ។ ពន្លឺក្រហមស្រាលគេឃើញនៅពីលើភ្នំភ្លើងនេះដែលកំពុងតែផ្ទុះ។ ក្នុងពេលភ្លាមៗគេនៅមិនទាន់រាយការណ៍ពីជនរងគ្រោះឬការខូចខាតនៅឡើយ។ ភ្នំភ្លើងនោះជាភ្នំភ្លើងសកម្មមួយ ក្នុងចំណោមភ្នំភ្លើងសកម្មលើពិភពលោក ហើយជាភ្នំភ្លើងខ្ពស់ជាងគេនៅតំបន់អឺរ៉ាស៊ីគឹដល់៤៧៥០ម៉ែត្រ។
តាមតេឡេក្រាមផ្នែកសិក្សាភូគុម្ភសាស្ត្ររុស្ស៊ីមិនបានបញ្ជាក់ពីទំនាក់ទំនង រវាងការផ្ទុះភ្នំភ្លើងនោះជាមួយនឹងការរញ្ជួយដីដ៏ខ្លាំងក្នុងដែនទឹកឆ្នេរសមុទ្រកាំឆាត់កាឡើយ។ ទោះគ្មានការខូចខាតឬអ្នករបួសណាម្នាក់ត្រូវបានរាយការណ៍ បន្ទាប់ពីការផ្ទុះភ្នំភ្លើងនោះក្ដី ក៏ការរញ្ជួយដីនៅកាំឆាត់កាកាលពីថ្ងៃទី៣០កក្កដា បណ្ដាលឲ្យមនុស្សច្រើននាក់រងរបួសស្រាលនៅចុងបូព៌ារុស្ស៊ី។
ការរញ្ជួយដីខ្លាំងនោះបណ្ដាលឲ្យមានរលកយក្សស៊ូណាមី ក្នុងតំបន់ប៉ាស៊ីហ្វិកទាំងមូល និងមានការជម្លៀសមនុស្សចេញច្រើននៅរុស្ស៊ី និងជប៉ុនព្រមទាំងនៅតាមប្រទេសច្រើនទៀតជាប់មាត់មហាសមុទ្រនោះ។ នៅកាំឆាត់កាអាជ្ញាធរបានប្រកាសពីការលុបចោលការប្រកាសអាសន្នស៊ូណាមីដែលកើតមានក្រោយការរញ្ជួយដី ៕
ចែករំលែកព័តមាននេះ