រាជធានីភ្នំពេញ ៖ យុវជនជនជាតិចិនម្នាក់សង្ស័យឃាតករសម្លាប់រួចដឹកសពតាមរថយន្ត១គ្រឿងយកទៅទម្លាក់ចោលនៅមុខប៉ុស្តិ៍នគរបាលភ្លើងឆេះរទេះ ហើយជនសង្ស័យបើករថយន្តគេចខ្លួនបាត់ ។ បន្ទាប់មកសាកសពជនរងគ្រោះខាងលើ ត្រូវបានបុរសអ្នករត់ម៉ូតូកង់បីម្នាក់ប្រទះឃើញ រួចរាយការណ៍ជូននគរបាលប៉ុស្តិ៍ខាងលើឲ្យចុះទៅពិនិត្យមើល និងចាត់ចែងតាមជំនាញ ។…
រាជធានីភ្នំពេញ ៖ យុវជនជនជាតិចិនម្នាក់សង្ស័យឃាតករសម្លាប់រួចដឹកសពតាមរថយន្ត១គ្រឿងយកទៅទម្លាក់ចោលនៅមុខប៉ុស្តិ៍នគរបាលភ្លើងឆេះរទេះ ហើយជនសង្ស័យបើករថយន្តគេចខ្លួនបាត់ ។ បន្ទាប់មកសាកសពជនរងគ្រោះខាងលើ ត្រូវបានបុរសអ្នករត់ម៉ូតូកង់បីម្នាក់ប្រទះឃើញ រួចរាយការណ៍ជូននគរបាលប៉ុស្តិ៍ខាងលើឲ្យចុះទៅពិនិត្យមើល និងចាត់ចែងតាមជំនាញ ។
ហេតុការណ៍នេះបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង៣និង១៥នាទីទៀបភ្លឺថ្ងៃទី៣១ ខែកក្កដា ឆ្នាំ២០២៥ នៅតាមផ្លូវជាតិលេខ៣ ត្រង់ចំណុចមុខសាលាបឋមសិក្សាទួលកី ហើយក៏ទល់មុខប៉ុស្តិ៍រដ្ឋបាលនគរបាលភ្លើងឆេះរទេះផងដែរ ស្ថិតនៅក្នុងភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
យុវជនរងគ្រោះរូបនោះឈ្មោះ WU YONG LONG អាយុ២៤ឆ្នាំ ជនជាតិចិន សាកសពមានស្នាមរបួសបែកក្បាលពីក្រោយខ្ទេចវ៉ល់ដូចត្រូវគេវាយ ហើយក៏មានស្នាមរបួសនៅលើខ្នងនិងលើស្មាផងដែរ ។
នគរបាលបានប្រាប់ឲ្យដឹងថា បានរកឃើញកាបូបស្ពាយពណ៍ប្រផេះ១ស្ថិតនៅក្បែរសាកសព ហើយនៅក្នុងកាបូបនោះ មានលិខិតឆ្លងដែន ,ទូរស័ព្ទដៃម៉ាកIphone14 pro max១គ្រឿង និងកាតធនាគារATM១សន្លឹក ។ តាមរយៈការត្រួតពិនិត្យទៅលើលិខិតឆ្លងដែននោះ ទើបអាចស្គាល់អត្តសញ្ញាជនរងគ្រោះ ហើយបានដឹងថាជនរងគ្រោះរូបនោះ ទើបតែចូលមកដល់ប្រទេសកម្ពុជានិងចុះពីយន្តហោះនាយប់ថ្ងៃទី៣០ ខែកក្កដា ឆ្នាំ២០២៥នេះប៉ុណ្ណោះ ។
នគរបាលបានប្រាប់ឲ្យដឹងបន្តទៀតថា នៅវេលាម៉ោងខាងលើមានបុរសអ្នករត់ម៉ូតូកង់បីម្នាក់បានរាយការណ៍ប្រាប់ថា នៅក្នុងពេលដែលគាត់ធ្វើដំណើរឆ្លងកាត់ចំណុចកើតហេតុនោះ បានប្រទះឃើញយុវជនរងគ្រោះដេកនៅលើចិញ្ចើមផ្លូវ ។ ក្រោយពេលទទួលបានដំណឹងនេះភ្លាម កម្លាំងនគរបាលប៉ុស្តិ៍ភ្លើងឆេះរទះ ក៏បានចេញទៅមើលភ្លាមៗដែរ ហើយទីតាំងនោះស្ថិតនៅទល់មុខប៉ុស្តិ៍នគរបាលភ្លើងឆេះរទេះតែម្ដង ដោយគ្រាន់តែរំលងផ្លូវជាតិលេខ៣ មួយប៉ុណ្ណោះ ។
នគរបាលបានប្រាប់ឲ្យដឹងបន្តទៀតថា ក្រោយមកនគរបាលប៉ុស្តិ៍បានរាយការណ៍ទៅកាន់នគរបាលខណ្ឌកំបូល រួមសហការណ៍គ្នាធ្វើការលើរឿងនេះ និងបានឆែកមើលកាមេរ៉ាសុវត្ថិភាពដែលបំពាក់នៅប៉ុស្តិ៍នគរបាលខាងលើនោះ ។ តាមរូបភាពនៅក្នុងកាមេរ៉ាបានឃើញនៅវេលាម៉ោង២និង៣០នាទីយប់រំលងអាធ្រាត្រឈានចូលថ្ងៃទី៣១ ខែកក្កដា ឆ្នាំ២០២៥ មានរថយន្ត១គ្រឿង បានដឹកសពបុរសនេះទៅទម្លាក់ចោលនៅទីនោះ រួចក៏ចាកចេញទៅបាត់ស្រមោល ។
នគរបាលបានប្រាប់ឲ្យដឹងបន្តទៀតថា ផ្អែកតាមរូបភាពដឹកតាមដឹកសពយកទៅទម្លាក់ចោល រួមនិងស្លាកស្នាមរបួសផងនោះ គឺសង្ស័យថា យុវជនរងគ្រោះខាងលើស្លាប់ដោយអំពើឃាតកម្ម ហើយនគរបាលកំពុងធ្វើការស្រាវជ្រាវលើករណីនេះហើយ ។ ដោយឡែកសាកសពត្រូវបាននាំយកចេញពីកន្លែងកើតហេតុ ទៅដាក់នៅក្នុងវត្តជន្លង់ម្លូដើម្បីធ្វើកោសល្យវិច័យ រួចទើបដឹកយកបន្តទៅក្លាស្សេនៅក្នុងវត្តស្ទឹងមានជ័យរង់ចាំស្វែងរកសាច់ញាតិ ៕
ចែករំលែកព័តមាននេះ