ស្ទះមួយគ្រួសារ! ទុកឱ្យរាប់សិបគ្រួសាររងគ្រោះទឹកលិ.ច
- ព្រៃវែង
ខេត្តព្រៃវែង ៖ ដំណាំប្រជាកសិកររាប់សិបហិចតា នៅឃុំអ្នកលឿង ស្រុកពាមរក៍ ដែលមានទាំងពោត ចេកស្វាយ ត្របែក ម្កាក់ និងសណ្ដែកល្ងផងនោះ…
ខេត្តព្រៃវែង ៖ ដំណាំប្រជាកសិកររាប់សិបហិចតា នៅឃុំអ្នកលឿង ស្រុកពាមរក៍ ដែលមានទាំងពោត ចេកស្វាយ ត្របែក ម្កាក់ និងសណ្ដែកល្ងផងនោះ កំពុងរលួយងាប់ជាបណ្ដើរៗហើយ ដោយសារតែទឹកភ្លៀងជន់លិច ហើយប្រជាកសិករម្ចាស់ចំការកំពុងស្នើសុំឲ្យអាជ្ញាធរឃុំអ្នកលឿង ជួយដោះ ស្រាយបង្ហូរទឹកចេញ។
ប្រជាកសិករទាំងនោះបានឱ្យដឹងថា ភូមិសាស្ត្រដីឃុំអ្នកលឿង ទោះបីមានសណ្ឋានទាបបន្តិចមែនប៉ុន្តែអាជ្ញាធរបានធ្វើប្រព័ន្ធបង្ហូរទឹកចេញ ចូលទៅក្នុងទន្លេ ដោយមានទាំងអាងស្តុបទឹកថែមទៀតផង គឺមិនធ្វើឲ្យជន់លិចផលដំណាំរបស់ពួកគាត់នោះទេ។
ប៉ុន្តែមួយរយៈចុងក្រោយនេះ ប្រឡាយមេរំដោះទឹកចេញពីអាងចូលទៅក្នុងទន្លេ បានគោករាក់ ធ្វើឲ្យទឹកហូរចេញយឺត មិនទាន់សភាពការណ៍ ជាហេតុធ្វើឲ្យទឹកចាល់ ជនលិចខូចផលដំណាំប្រជា កសិករអស់រាប់សិបហិចតា ទើបបងប្អូនប្រជាកសិករទាំងនោះនាំគ្នាសំណូមពរឲ្យអាជ្ញាធរជួយដោះស្រាយផង។
ឆ្លើយតបចំពោះបញ្ហានេះ អាជ្ញាធរឃុំអ្នកលឿងបានឲ្យដឹងថា ខាងរដ្ឋបាលឃុំ មានគម្រោងជីកស្ដារប្រឡាយមេរំដោះទឹក ឱ្យបានធំនិងជ្រៅដែរ ដើម្បីរំដោះទឹកបានលឿន កុំឲ្យជន់លិចផលដំណាំប្រជាកសិករ ប៉ុន្តែគម្រោងនេះត្រូវបានរាំងស្ទះដោយសារមានពលរដ្ឋ១គ្រួសារ ប្ដឹងជំទាស់មិនឲ្យជីក ដោយអះអាងថាប៉ះពាល់ដំណាំពោតរបស់គាត់ដែលទើបនឹងដាំ ដូច្នេះហើយទើបអាជ្ញាធរឃុំសម្រេចពន្យារពេលជីកស្ដារប្រឡាយនេះសិនដោយរង់ចាំឲ្យពលរដ្ឋ១គ្រួសារនោះ ប្រមូលផលពោតរួចសិន ចាំជីកស្ដារប្រឡាយ។
ប៉ុន្តែវិធានការរបស់អាជ្ញាធរឃុំអ្នកលឿងនេះត្រូវបានប្រជាពលរដ្ឋនាំគ្នារិះគន់ជាខ្លាំង ដោយលើកឡើងថា អាជ្ញាធរខ្លាចពលរដ្ឋ១គ្រួសារប្ដឹង សុខចិត្តពន្យារពេលជីកស្ដារប្រឡាយរាប់សិបគ្រួសារ តែពេលនេះដំណាំពួកគាត់រាប់សិបហិចតារលួយខូចអស់ តើនរណាទទួលខុសត្រូវ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ