រាជធានីភ្នំពេញ ៖ មានករណីកម្មករសំណង់ជាង៣០នាក់ នាំគ្នាប្រមូលផ្តុំគ្នាតវ៉ាក្នុងការដ្ឋានកំពុងសាងសង់មួយកន្លែងដោយយកម៉ូតូបិទផ្លូវនៅមុខការដ្ឋាន ព្រោះតែមេការជាជនជាតិចិនមិនព្រមបើកប្រាក់ខែអោយ ។ ហេតុការណ៍ខាងលើនេះ បង្កការភ្ញាក់ផ្អើលដល់អាជ្ញាធរចុះអន្ដរាគមន៍កាលពីវេលាម៉ោងជាង៨យប់ ថ្ងៃទី០៥ ខែកក្កដា…
រាជធានីភ្នំពេញ ៖ មានករណីកម្មករសំណង់ជាង៣០នាក់ នាំគ្នាប្រមូលផ្តុំគ្នាតវ៉ាក្នុងការដ្ឋានកំពុងសាងសង់មួយកន្លែងដោយយកម៉ូតូបិទផ្លូវនៅមុខការដ្ឋាន ព្រោះតែមេការជាជនជាតិចិនមិនព្រមបើកប្រាក់ខែអោយ ។
ហេតុការណ៍ខាងលើនេះ បង្កការភ្ញាក់ផ្អើលដល់អាជ្ញាធរចុះអន្ដរាគមន៍កាលពីវេលាម៉ោងជាង៨យប់ ថ្ងៃទី០៥ ខែកក្កដា ឆ្នាំ ២០២៥ តាមបណ្ដោយផ្លូវព្រះស៊ីសុវត្ថិ ខាងមុខមន្ទីរពេទ្យព្រះកេតុមាលា សង្កាត់ស្រះចក ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីកម្មករបានអោយដឹងថា មេការជនជាតិចិន បានសន្យាថា នឹងបើកកលុយអោយពួកគាត់ ប៉ុន្តែមកដល់ថ្ងៃត្រូវបើកលុយ ស្រាប់តែមេការខាងលើបែរជាមិនព្រមអោយទៅវិញ ទើបពួកគាត់ជាកម្មករសំណង់ បានប្រមូលផ្តុំគ្នាជាង៣០នាក់ដើម្បីធ្វើការតវ៉ានៅក្នុងការដ្ឋានសំណង់ខាងលើនេះតែម្តងនិងបានយកម៉ូតូបិទផ្លូវនៅមុខការដ្ឋាន ខណះនោះដែលមេការជាជនជាតិក៏បានបើករថយន្ដបុកបណ្ដាលរងការខូចខាតម៉ូតូមួយគ្រឿងផងដែរ។
កម្មករបន្តថា ពួកគាត់ខិតខំធ្វើការដើម្បីរកប្រាក់ចិញ្ចឹមគ្រួសារ និងបង់ធានាគារ ប្រសិនបើមេការមិនបើកលុយអោយ តើពួកគាត់បានប្រាក់មកពីណាដើម្បីផ្គត់ផ្គង់ជីវភាព ។ ក្នុងលក្ខខណ្ឌ ដែលមេការជាជនជាតិចិន មិនបើកប្រាក់អោយ ពួកគាត់មិនព្រមធ្វើការទៀតនោះឡើយ ។
បន្ទាប់ពីមានការតវ៉ាខាងលើ ក៏មានវត្តមានអាជ្ញាធរមានសមត្ថកិច្ចចុះមកដល់ទីតាំងការដ្ឋាន កំពុងសាងសង់ខាងលើដើម្បីធ្វើការសម្របសម្រួល ។
ក្រោយមានការអន្តរាគមន៍ពីសំណាក់អាជ្ញាធររួចមក មេការជនជាតិចិនសន្យាថានឹងបើកប្រាក់ពលកម្មអោយនៅពេលព្រឹកស្អែកទាំងអស់ ៕
ចែករំលែកព័តមាននេះ