រាជធានីភ្នំពេញ ៖ បុរសម្នាក់បើករថយន្តមួយគ្រឿងងោកមួយភាំងក៏ជ្រុលទៅបុកចូលផ្ទះរបស់អ្នកលក់ចាបហួយបាក់ជញ្ជាំងផ្ទះអស់៣ផ្ទាំង បាក់ដើមចេក២ដើម និងបុកបង្គោលភ្លើងបាក់អស់មួយដើម ហេតុការណ៍នេះបានកើតឡើងកាលពីវេលាម៉ោង2រំលងអធ្រាត្រឈានចូលថ្ងៃទី17 ខែតុលា ឆ្នាំ2019 តាមបណ្តោយផ្លូវបេតុងនៅចំណុចក្បែរនឹងស្ពានវត្តទួល ស្ថិតនៅក្នុងសង្កាត់គីឡូលេខ៦ ខណ្ឌឬស្សីកែវ ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញបុរសម្នាក់មិនស្គាល់អត្តសញ្ញាណនោះទេបើករថយន្តបង្កមួយគ្រឿង ពណ៌សំបកឪឡឹក ពាក់ផ្លាកលេខ ភ្នំពេញ 2AK-0586 បើកបរតាមបណ្តោយផ្លូវបេតុងក្នុងទិសដៅពីលិចទៅកើត ។
ខណៈបើកមកដល់ចំណុចកើតហេតុខាងលើនេះក៏ស្រាប់តែអ្នកបើកបររថយន្តងោកមួយភាំងក៏រេចង្កូតជ្រុលទៅបុកនឹងផ្ទះប្រជាពលរដ្ឋបណ្តាលឱ្យបាក់អស់ជញ្ជាំងអស់៣ផ្ទាំង បាក់ដើមចេក២ដើមនិ ងបុកបង្គោលភ្លើងមួយដើម រីឯរថយន្តបង្កវិញខូចខាតខ្ទេចអស់មួយកំណាត់ខាងមុខ និងផ្ទុះពោងសុវត្ថិភាពទាំងសងខាង ចំណែកឯម្ចាស់រថយន្តបង្កវិញបានរត់គេចខ្លួនបាត់ស្រមោលបន្សល់ទុកនៅតែរថយន្តបង្កនៅកន្លែងកើតហេតុតែប៉ុណ្ណោះ ។
ក្រោយពេលកើតហេតុរថយន្តបង្កត្រូវបានសមត្ថកិច្ចគាត់ធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ