រាជធានីភ្នំពេញ ៖ រថយន្តម៉ាកហ៊ីយ៉ាន់ដាយ ទ្រុងឃ្លុបបិទជិត ១គ្រឿង បានបើកបុកអ្នកជិះម៉ូតូពីក្រោយ រួចកិនបណ្ដាលឲ្យស្លាប់ម្នាក់ និងរបួសស្រាលម្នាក់ បន្ទាប់មកបានព្យាយាមបើករត់ ប៉ុន្តែត្រូវបានប្រជាពលរដ្ឋច្រើននាក់…
រាជធានីភ្នំពេញ ៖ រថយន្តម៉ាកហ៊ីយ៉ាន់ដាយ ទ្រុងឃ្លុបបិទជិត ១គ្រឿង បានបើកបុកអ្នកជិះម៉ូតូពីក្រោយ រួចកិនបណ្ដាលឲ្យស្លាប់ម្នាក់ និងរបួសស្រាលម្នាក់ បន្ទាប់មកបានព្យាយាមបើករត់ ប៉ុន្តែត្រូវបានប្រជាពលរដ្ឋច្រើននាក់ នាំគ្នាដេញតាមរហូតឃាត់បានទាំងរថយន្ត និងអ្នកបើកបររួចប្រគល់ឲ្យនគរបាល ។
ឧប្បត្តិហេតុនេះ បានកើតឡើងនៅវេលាម៉ោង២និង១៥នាទីរសៀលថ្ងៃទី០២ ខែមករា ឆ្នាំ២០២៦ នៅលើផ្លូវជាតិលេខ៣ ត្រង់ចំណុចមុខវត្តគោកខ្សាច់ ស្ថិតនៅក្នុងភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
ក្មេងប្រុសជំទង់ ដែលស្លាប់បាត់បង់ជីវិតនោះឈ្មោះ រឿន ពិសី អាយុ១៧ឆ្នាំ កម្មករោងចក្រ មានទីលំនៅភូមិចន្លាត់ដៃ ឃុំបឹងណាយ ស្រុកព្រៃឈរ ខេត្តកំពង់ចាម និងស្នាក់នៅសង្កាត់ក្រាំងពង្រ ខណ្ឌដង្កោ ។ ចំណែកយុវជនម្នាក់ទៀត ដែលរងរបួសស្រាល ឈ្មោះគឹង រ៉េត អាយុ១៨ឆ្នាំ មុខរបរកម្មករោងចក្រ ស្នាក់ភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ និងមានស្រុកកំណើតនៅ ភូមិអូរសង្កែ ឃុំព្រៃគ្រេស ស្រុកមេសាងខេត្តព្រៃវែង ។
ជនរងគ្រោះទាំង២នាក់ ជិះម៉ូតូ១គ្រឿងម៉ាកស៊ុយហ្ស៊ុយគីនិច ពណ៍ស ពាក់ស្លាកលេខក្រចេះ 1F-0486 ដោយឡែករថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខព្រៃវែង 3A-0384 ជាប្រភេរថយន្តទ្រុងឃ្លុប បិទជិត បើកបរដោយបុរសម្នាក់ឈ្មោះតាប ណេ អាយុ៣៨ឆ្នាំ ស្នាក់នៅក្នុងឃ្លាំងទំនិញ ស្ថិតក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
អ្នកដំណើរតាមផ្លូវខាងលើបាននិយាយថា នៅមុនពេលកើតហេតុ ជនរងគ្រោះទាំង២នាក់ បានជិះម៉ូតូឌុបគ្នាធ្វើដំណើរតាមផ្លូវជាតិលេខ៣ ក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ ស្រាប់តែរថយន្តបង្កខាងលើ ដែលបើកបរស្របគ្នាក្នុងល្បឿនលឿនជ្រុលទៅបុកពីក្រោយទាំងកំរោល។ ខណៈនោះ បានបណ្ដាលឲ្យអ្នកជិះពីក្រោយឈ្មោះ រឿន ពិសី ធ្លាក់ពីលើម៉ូតូចូលក្រោមកង់រថយន្តនោះកិនស្លាប់ភ្លាមៗនៅនឹងកន្លែង ចំណែកម៉ូតូដួលហើយឈ្មោះគឹង រ៉េត ដែលជាអ្នកបើកម៉ូតូរងរបួសស្រាល បន្ទាប់មក រថយន្តបានបត់ឆ្វេងត្រលប់ក្រោយរត់គេច ។
ប្រភពដដែលប្រាប់បន្តទៀតថា ពេលនោះប្រជាពលរដ្ឋច្រើននាក់ បាននាំគ្នាដេញតាមហើយរហូតដល់ភូមិឃ្លះសណ្ដាយ សង្កាត់ពងទឹក ខណ្ឌដង្កោ ទើបតាមទាន់ និងឃាត់បានទាំងរថយន្តបង្ក ព្រមទាំងអ្នកបើកបរផងដែរ រួចប្រគល់ឲ្យនគរបាលប៉ុស្តិ៍ភ្លើងឆេះរទេះ ។
ក្រោយពីនគរបាលសួរនាំ អ្នកបើកបររថយន្តបង្កខាងលើ បាននិយាយថា រថយន្តរបស់ខ្លួនដាច់ហ្វ្រាំង ទើបជ្រុលទៅបុកម៉ូតូពីក្រោយទាំងកំរោលបែបនេះ បន្ទាប់មកខ្លួនបានព្យាយាមបើករត់ ប៉ុន្តែមិនអាចរត់រួចឡើយ ទីបំផុត ត្រូវមហាជនដេញតាមឃាត់បាន ។
ដោយឡែកអ្នកស្គាល់ជនរងគ្រោះ បាននិយាយថា នៅមុនពេលកើតហេតុជនរងគ្រោះ ដែលស្លាប់បានពឹងឲ្យមិត្តភក្តិជិះម៉ូតូឌុបរូបគេចេញពីចោមចៅ ខណ្ឌពោធិ៍សែនជ័យ ឆ្ពោះទៅកាន់រោងចក្រនៅភូមិទឹកថ្លា សង្កាត់ក្រាំងពង្រ ខណ្ឌដង្កោ ដើម្បីសុំច្បាប់រោងចក្រឈប់សម្រាក ហើយខណៈពេលទៅដល់ត្រង់ចំណុចកើតហេតុក៏ជួបគ្រោះអកុសលបែបនេះតែម្ដង។
ក្រោយពេលកើតហេតុ នគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះទៅធ្វើការវាស់វែង និងនាំយករថយន្ត និងអ្នកបើកបរ រថយន្ត ព្រមទាំងម៉ូតូទៅកាន់ការិយាល័យ រង់ចាំការដោះស្រាយនៅពេលក្រោយ ហើយបានប្រគល់សាសពជូនក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ