រាជធានីភ្នំពេញ ៖ កាលពីពេលថ្មីៗកន្លងទៅនេះ ប្រធានសហព័ន្ធកីឡាអុកអន្តរជាតិ និងជាអតីតប្រមុខរដ្ឋ KALMYKIA លោក Kirsan Ilyumzhinov បានធ្វើដំណើរមកកាន់ប្រទេសកម្ពុជា ជួបសំណេះសំណាលជាមួយលោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) ដើម្បីស្នើសុំការគាំទ្រ ខណៈដែលលោកត្រូវឈរឈ្មោះធ្វើជាបេក្ខភាពប្រធានសហព័ន្ធកីឡាអុកអន្តរជាតិអាណត្តិថ្មី និងការដាក់បញ្ចូលប្រភេទកីឡាអុកអន្តរជាតិចូលទៅក្នុងការប្រកួតកីឡាអូឡាំពិករដូវរងានាពេលខាងមុខ ។
លោកវ៉ាត់ ចំរើន បានមានប្រសាសន៍ថា ក្នុងជំនួបជាមួយប្រធានសហព័ន្ធកីឡាអុកអន្តរជាតិ កាលពីថ្ងៃទី២២ ខែមេសា ឆ្នាំ២០១៣ កន្លងទៅថ្មីៗនេះ គឺលោក Kirsan ចង់ឱ្យថ្នាក់ដឹកនាំ NOCC យើងមានទំនុកចិត្ត និងបោះឆ្នោតគាំទ្រលោកឱ្យបន្តធ្វើជាប្រធានសហព័ន្ធកីឡាអុកអន្តរជាតិអាណត្តិថ្មី ដែលការបោះឆ្នោតនោះនឹងធ្វើឡើងលើទឹកដីអឺរុ៉បអំឡុងខែតុលាខាងមុខនេះក្នុងព្រឹត្តិការណ៍ប្រកួតកីឡាអុកអន្តរជាតិពិភព លោក ។ មិនត្រឹមតែបុ៉ណ្ណោះ អតីតប្រមុខរដ្ឋរូបនេះថែមទាំងស្វែងរកការគាំទ្រពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាទៀតផង ។ លោកបានបន្តថា ក្រៅពីការស្នើសុំការគាំទ្របេក្ខភាពធ្វើជាប្រធានសហព័ន្ធកីឡាអុកអន្តរជាតិខាងលើលោក Kirsan បានស្នើឱ្យថ្នាក់ដឹកនាំ NOCC និងសហព័ន្ធកីឡាជាតិយើងចូលរួមបោះឆ្នោត ឬសរសេរលិខិតគាំទ្រចំពោះផែនការជំរុញឱ្យគណៈកម្មាធិការអូឡាំពិកអន្តរជាតិ (IOC) ដាក់បញ្ចូលកីឡាអុកអន្តរជាតិនេះចូលទៅក្នុងការប្រកួតកីឡាអូឡាំពិករដូវរងាផងដែរ ។
តាមរយៈជំនួបរវាងថ្នាក់ដឹកនាំកីឡាធំៗទាំងពីរខាងលើនេះ លោកវ៉ាត់ ចំរើន បានបញ្ជាក់ថា NOCC នឹងបញ្ជូនមន្ត្រី និងថ្នាក់ដឹកនាំសហព័ន្ធកីឡាជាតិកម្ពុជាទៅចូលរួមបោះឆ្នោត ហើយលោកនឹងសរសេរលិខិតគាំទ្រចំពោះគំនិតផ្តួចផ្តើមនៃការដាក់កីឡាអុកអន្តរជាតិចូលក្នុងកីឡាអូឡាំពិករដូវរងានោះ ពោលគឺយើងគាំទ្រទាំងអស់ ព្រោះវាក៏ជាផលប្រយោជន៍សម្រាប់សហព័ន្ធកីឡាអុកកម្ពុជាយើងដែរ ។ បុ៉ន្តែលោកបានសង្កត់ធ្ងន់ថា «រាល់ការគាំទ្រនោះ គណៈកម្មាធិការជាតិអូឡាំពិកកម្ពុជា នឹងស្នើសុំសេចក្តីសម្រេចពីប្រមុខរាជរដ្ឋាភិបាល គឺស្នើសុំអនុសាសន៍ពីប្រមុខរាជរដ្ឋាភិបាលជាមុនសិន» ។
ក្រោយពីបញ្ចប់ជំនួបជាមួយលោកវ៉ាត់ ចំរើន ហើយនោះ នៅព្រឹកថ្ងៃទី២៣ មេសា លោក Kirsan បានធ្វើសន្និសីទសារព័ត៌មានជាមួយសហព័ន្ធកីឡាអុកកម្ពុជា ដោយលោកបានគាំទ្រប្រភេទកីឡាអុកចត្រង្គរបស់កម្ពុជា ដោយសង្ឃឹមថា សហព័ន្ធកីឡាអុកកម្ពុជានឹងបញ្ជូនអត្តពលិកទៅចូលរួមប្រកួតកីឡាអុកនៅប្រទេសហ្វាំងឡង់ ដែលនឹងចាប់ផ្តើមនៅខែសីហាខាងមុខនេះផងដែរ ។ មិនត្រឹមតែបុ៉ណ្ណោះ ប្រធានសហព័ន្ធកីឡាអុកអន្តរជាតិអាណត្តិចាស់រូបនេះបានឧបត្ថម្ភនាឡិកាកំណត់ពេលវេលាប្រកួតកីឡាអុកចំនួន២០០គ្រឿង និងក្តារអុកអន្តរជាតិចំនួន២០០ ជូនដល់សហព័ន្ធកីឡាអុកកម្ពុជា ហើយលោកត្រៀមនឹងបង្កើតកម្មវិធីប្រកួតកីឡាអុកអន្តរជាតិនៅលើទឹកដីកម្ពុជាក្នុងឆ្នាំ២០១៤ នេះទៀតផង៕
ចែករំលែកព័តមាននេះ