កាលពីថ្ងៃពុធកន្លងមកនេះ អ្នកគ្រប់គ្រងក្រុមហ៊ុនផលិតរថយន្តធំបំផុតលើពិភពលោក Toyota បានថ្លែងថាក្នុងរយៈពេល១២ខែ គិតមកត្រឹមខែមីនា ឆ្នាំ២០១៤ ក្រុមហ៊ុនលក់រថយន្តបាន១០,១៣លានគ្រឿង កើនឡើង៤,៥% ។ តាមតួលេខនេះ បានបញ្ជាក់ឱ្យឃើញថា Toyota បានវ៉ាផ្តាច់គូប្រជែងរបស់ខ្លួន Volkswagen (អាល្លឺម៉ង់) និង General Motors (អាមេរិក) ទៅទៀត ដែលអ្នកវិភាគបានលើកឡើងថា គូប្រជែងទាំងពីរនេះមិនទំនងជាអាចលក់បាន១០លានគ្រឿងឡើយ ក្នុងអំឡុងពេលដូចគ្នា ។
គួររំលឹកថា ក្រុមហ៊ុនយក្សរបស់ជប៉ុនToyota ក៏បានកាន់កាប់តំណែងជាក្រុមហ៊ុនផលិតរថយន្តលំដាប់កំពូលលើពិភពលោកផងដែរ នៅក្នុងឆ្នាំ២០១៣ បន្ទាប់ពីសម្រេចបាននូវអត្រាលក់៩,៩៨លានគ្រឿង ។ ជាមួយគ្នានោះដែរ Toyota បានចង្អុលបង្ហាញពីភាពខ្លាំងនៃការលក់ក្នុងស្រុក និងគន្លឹះនៃទីផ្សារក្រៅស្រុកដែលរាប់បញ្ចូលទាំងប្រទេសចិន ដែលបច្ចុប្បន្នជាទីផ្សាររថយន្តធំបំផុតនៅលើពិភពលោក ។
អ្នកនាំពាក្យរបស់ក្រុមហ៊ុន Toyota បានបញ្ជាក់ថា ការលក់របស់ក្រុមហ៊ុននៅក្នុងប្រទេសជប៉ុន បានកើនឡើង៣,៩% ស្មើនឹង២,៤លានគ្រឿង ដែលជាការកើនឡើងនៃឆ្នាំសារពើពន្ធទី៣ ជាបន្តបន្ទាប់ ហើយក្នុងនោះ «តម្រូវការបន្ទាន់នាំមុខការប្រើប្រាស់នយោបាយបង្កើនពន្ធនៅក្នុងខែមេសាឆ្នាំនេះ ដែលនាំឱ្យការលក់មានកម្រិតខ្លាំងក្លានៅក្នុងប្រទេសជប៉ុន សម្រាប់ក្រុមហ៊ុនយើង» ។
ទោះជាយ៉ាងណា នៅក្នុងខែមេសា ឆ្នាំ២០១៤ ប្រទេសជប៉ុន បានបង្កើនតម្លៃពន្ធលើថ្លៃទំនិញរបស់ខ្លួនមកត្រឹម៨% ដែលកាលពីមុនត្រឹមតែ៥%ប៉ុណ្ណោះ ។ សូមបញ្ជាក់ថា ការដំឡើងថ្លៃលើការប្រមូលពន្ធដារជាលើកដំបូងរបស់ជប៉ុនគឺចាប់តាំងពីទសវត្សទី៩០មកម្លេ៉ះ ៕
ចែករំលែកព័តមាននេះ