ទីក្រុងប៉េកាំង ៖ ប្រទេសចិនបានអះអាងថា សហរដ្ឋអាមេរិកបានបំពានយ៉ាងធ្ងន់ធ្ងរលើកិច្ចព្រមព្រៀងពាណិជ្ជកម្មរវាងប្រទេសទាំងពីរ ហើយថាខ្លួននឹងចាត់វិធានការដ៏ម៉ឺងម៉ាត់ដើម្បីការពារផលប្រយោជន៍។ នេះបើយោងតាមប្រភពពីសារព័ត៌មាន BBC ចេញផ្សាយនៅថ្ងៃទី២ ខែមិថុនា ឆ្នាំ២០២៥។…
ទីក្រុងប៉េកាំង ៖ ប្រទេសចិនបានអះអាងថា សហរដ្ឋអាមេរិកបានបំពានយ៉ាងធ្ងន់ធ្ងរលើកិច្ចព្រមព្រៀងពាណិជ្ជកម្មរវាងប្រទេសទាំងពីរ ហើយថាខ្លួននឹងចាត់វិធានការដ៏ម៉ឺងម៉ាត់ដើម្បីការពារផលប្រយោជន៍។ នេះបើយោងតាមប្រភពពីសារព័ត៌មាន BBC ចេញផ្សាយនៅថ្ងៃទី២ ខែមិថុនា ឆ្នាំ២០២៥។
ក្រសួងពាណិជ្ជកម្មចិនប្រកាសថា សហរដ្ឋអាមេរិកបានធ្វើឱ្យខូចខាតយ៉ាងធ្ងន់ធ្ងរដល់កិច្ចព្រមព្រៀង ដែលសម្រេចបានអំឡុងការចរចានៅទីក្រុងហ្សឺណែវ ប្រទេសស្វីស កាលពីខែមុន នៅពេលប្រទេសទាំងពីរបានយល់ព្រមទម្លាក់អត្រាពន្ធលើទំនិញនាំចូលពីគ្នាទៅវិញទៅមក។ អ្នកនាំពាក្យក្រសួងពាណិជ្ជកម្មចិនបានបន្ថែមថា ទង្វើរបស់អាមេរិកក៏បានរំលោភបំពានធ្ងន់ធ្ងរផងដែរ ចំពោះការព្រមព្រៀងគ្នាដែលសម្រេចបាន អំឡុងពេលការសន្ទនាតាមទូរស័ព្ទកាលពីខែមករាកន្លងទៅរវាងមេដឹកនាំចិន លោក ស៊ី ជិនភីង (Xi Jinping) និងប្រធានាធិបតីអាមេរិក លោក ដូណាល់ ត្រាំ (Donald Trump)។
ការអត្ថាធិប្បាយរបស់ក្រសួងពាណិជ្ជកម្មចិនកើតឡើង បន្ទាប់ពីលោក ត្រាំ កាលពីថ្ងៃសុក្របានលើកឡើងថា ចិនបានបំពានទាំងស្រុងលើកិច្ចព្រមព្រៀងជាមួយអាមេរិក។ ប្រធានាធិបតីអាមេរិករូបនេះ មិនបានផ្តល់ព័ត៌មានលម្អិតណាមួយនោះទេ ប៉ុន្តែក្រោយមកអ្នកតំណាងពាណិជ្ជកម្មអាមេរិក លោក Jamieson Greer បានថ្លែងថា ប្រទេសចិនមិនបានដកចេញរបាំងពាណិជ្ជកម្ម ដូចដែលបានព្រមព្រៀងគ្នានៅក្រោមកិច្ចព្រមព្រៀងនោះទេ។
នៅក្នុងការចរចានៅទីក្រុងហ្សឺណែវ សហរដ្ឋអាមេរិកបានយល់ព្រមទម្លាក់អត្រាពន្ធលើទំនិញពីចិនពី ១៤៥% មកនៅត្រឹម ៣០% ខណៈដែលពន្ធសងសឹករបស់ចិនលើទំនិញអាមេរិកបានទម្លាក់ចុះពី ១២៥% មកនៅត្រឹម១០%។ ទោះយ៉ាងណាក៏ដោយ នៅថ្ងៃទី២ ខែមិថុនា ឆ្នាំ២០២៥ ភាគីចិនអះអាងថា ការរំលោភលើកិច្ចព្រមព្រៀងដោយអាមេរិក រួមមានការបញ្ឈប់ការលក់បន្ទះឈីបសម្រាប់ការរចនាកម្មវិធីកុំព្យូទ័រទៅឱ្យក្រុមហ៊ុនចិន ការព្រមានប្រឆាំងនឹងការប្រើប្រាស់បន្ទះឈីបផលិតដោយក្រុមហ៊ុនបច្ចេកវិទ្យាខ្នាតយក្សរបស់ចិន Huawei ព្រមទាំងការលុបចោលទិដ្ឋាការសម្រាប់និស្សិតចិនថែមទៀតផង។
អំឡុងការចរចាទល់មុខគ្នារវាងក្រុងវ៉ាស៊ីនតោន និងក្រុងប៉េកាំងនៅទីក្រុងហ្សឺណែវ ភាគីទាំងអាចឈានទៅដល់កិច្ចព្រមព្រៀង។ ប៉ុន្តែការបោះពាក្យបោះសម្តីរវាងប្រទេសទាំងពីរកំពុងតែផ្ទុះឡើងម្តងទៀតនេះ ភាពផុយស្រួយនៃការផ្អាកសង្គ្រាមពាណិជ្ជកម្មបទបច្ចុប្បន្នត្រូវបានរំលេចឡើងវិញ និងផ្តល់ការចង្អុលបង្ហាញថា តើអាចមានបញ្ហាប្រឈមបែបណា នៅក្នុងការឈានដល់កិច្ចព្រមព្រៀងពាណិជ្ជកម្មរយៈពេលវែង?
ចែករំលែកព័តមាននេះ