ទីក្រុងហាណូយ៖ សេដ្ឋីវៀតណាម លោកស្រីជឿងមីឡាន អាចមានសង្ឃឹមរួចផុតពីទោសប្រហារជីវិតបន្ទាប់ពីរដ្ឋសភាវៀតណាមនៅថ្ងៃនេះបានសម្រេចលុបចោលទោសប្រហារជីវិតពីបទល្មើសឆបោក និងសកម្មភាពដែលចង់ផ្ដួលរំលំរដ្ឋាភិបាល។ ខាងលើនេះជាការថ្លែងរបស់រដ្ឋសភាវៀតណាម។ លោកស្រីជឿងមីឡានជាប់ចោទពីបទឆបោកប្រាក់១២ពាន់លានដុល្លារ។
នៅថ្ងៃនេះ អ្នកតំណាងរាស្ត្រវៀតណាមបានបោះឆ្នោតជាឯកច្ឆន្ទទៅលើសេចក្ដីព្រាងក្រមព្រហ្មទណ្ឌថ្មី។ បទល្មើសដទៃទៀតដែលធ្លាប់ជាប់ទោសប្រហារជីវិត ហើយឥឡូវនេះត្រូវលុបចោលវិញពីក្រមព្រហ្មទណ្ឌថ្មីមានដូចជាការបំផ្លិចបំផ្លាញទ្រព្យសម្បត្តិរបស់រដ្ឋ, ការផលិតឱសថក្លែងក្លាយ, ការរំខានសន្តិភាព, ការបង្កសង្គ្រាម, ការស៊ើបការណ៍សម្ងាត់ និងការដឹកជញ្ជូនគ្រឿងញៀន។ បទល្មើសទាំងនេះត្រូវបន្ធូរបន្ថយមកត្រឹមជាប់ពន្ធនាគារមួយជីវិត។
ដូច្នេះ អ្នកដែលត្រូវតុលាការផ្ដន្ទាទោសប្រហារជីវិតមុនថ្ងៃទី១ ខែកក្កដា ប៉ុន្តែមិនទាន់ប្រហារជីវិតនៅឡើយទេអាចនឹងទទួលបានការបន្ធូរបន្ថយមកជាប់ពន្ធនាគារមួយជីវិតវិញ។ នៅក្នុងចំណោមនោះក៏មានលោកស្រីជឿងមីឡានម្នាក់ផងដែរ។ លោកយ៉ាងហុងថាញ់ដែលជាមេធាវីរបស់លោកស្រីជឿងមីឡានប្រាប់ទីភ្នាក់ងារព័ត៌មានអាអែហ្វប៉េថាកូនក្ដីរបស់លោកនឹងទទួលបានការបន្ធូរបន្ថយទោសមកត្រឹមជាប់ពន្ធនាគារមួយជីវិត។ លោកថាកូនក្ដីរបស់លោកមានចិត្តត្រេកអរចំពោះដំណឹងនេះ។
សម្រាប់បទល្មើសចំនួនដប់ វៀតណាមនៅតែរក្សាទុកទោសប្រហារជីវិតដដែល។ ក្នុងនោះមានអំពើមនុស្សឃាត, អំពើក្បត់ជាតិ, អំពើភេរវកម្ម, ការបៀតបៀនផ្លូវភេទកុមារ និងការរត់ពន្ធគ្រឿងញៀន។ នៅវៀតណាម ការប្រហារជីវិតធ្វើឡើងដោយស្ងាត់ៗ។ ដូច្នេះ គេមិនអាចដឹងច្បាស់ថាតើនៅមនុស្សប៉ុន្មាននាក់ដែលត្រូវប្រហារជីវិតក្នុងមួយឆ្នាំៗ។ សព្វថ្ងៃនេះវៀតណាមច្រើនអនុវត្តវិធីប្រហារជីវិតដោយចាក់ថ្នាំសម្លាប់បន្ទាប់ពីការប្រហារជីវិតដោយបាញ់នឹងកាំភ្លើងត្រូវលុបចោលតាំងពីឆ្នាំ២០១១៕
ចែករំលែកព័តមាននេះ