ទីក្រុងហ្សាការតា ៖ យោងតាមរបាយការណ៍ចុងក្រោយរបស់វិទ្យាស្ថានអភិវឌ្ឍន៍សេដ្ឋកិច្ច និងហិរញ្ញវត្ថុរបស់ប្រទេសឥណ្ឌូណេស៊ី (INDEF) បានឱ្យដឹងថា វិស័យកសិកម្ម រុក្ខាប្រមាញ់ និងនេសាទ កំពុងលេចឡើងជាកត្តាជំរុញកំណើនសេដ្ឋកិច្ចដ៏សំខាន់របស់ប្រទេសឥណ្ឌូណេស៊ី…
ទីក្រុងហ្សាការតា ៖ យោងតាមរបាយការណ៍ចុងក្រោយរបស់វិទ្យាស្ថានអភិវឌ្ឍន៍សេដ្ឋកិច្ច និងហិរញ្ញវត្ថុរបស់ប្រទេសឥណ្ឌូណេស៊ី (INDEF) បានឱ្យដឹងថា វិស័យកសិកម្ម រុក្ខាប្រមាញ់ និងនេសាទ កំពុងលេចឡើងជាកត្តាជំរុញកំណើនសេដ្ឋកិច្ចដ៏សំខាន់របស់ប្រទេសឥណ្ឌូណេស៊ី ជាពិសេសក្នុងត្រីមាសទី១ នៃឆ្នាំ២០២៥។ នេះបើយោងតាមប្រភពពីសារព័ត៌មាន VietnamPlus ចេញផ្យាយកាលពីថ្ងៃទី៣ ខែមិថុនា ឆ្នាំ២០២៥។
លោក អាប្រា តាឡាតូវ (Abra Talattov) នាយកមជ្ឈមណ្ឌលអាហារ ថាមពល និងការអភិវឌ្ឍប្រកបដោយចីរភាពរបស់វិទ្យាស្ថាន INDEF បានរាយការណ៍ថា វិស័យកសិកម្ម រុក្ខាប្រមាញ់ និងនេសាទ បានបង្ហាញអំពីកំណើនខ្ពស់បំផុត នៅក្នុងចំណោមវិស័យសេដ្ឋកិច្ចទាំងអស់របស់ប្រទេសឥណ្ឌូណេស៊ី ដោយឈានដល់ ១០,៥២% នៅក្នុងត្រីមាសទី១ នៃឆ្នាំនេះ ភាគច្រើនដោយសារការប្រមូលផលស្រូវ និងពោត។ ទិន្នផលស្រូវបានកើនឡើង ៥១,៤៥% ចំណែកទិន្នផលពោតបានកើនជាង ៣៩%។ កំណើននេះត្រូវបានគាំទ្រដោយលក្ខខណ្ឌអាកាសធាតុអំណោយផល និងរដូវប្រមូលផលលឿនជាងធម្មតា។
ការប្រមូលផលចម្បងស្របគ្នាទៅនឹងរយៈពេលបុណ្យរ៉ាម៉ាដាន និង Eid al-Fitr អំឡុងខែមីនា ដល់ខែមេសា នៅពេលដែលតម្រូវការអាហារជាធម្មតាកើនឡើង ដែលជំរុញឱ្យផលិតកម្មកើនឡើងបន្ថែមទៀត។
បន្ថែមពីលើកំណើន ក៏ដូចជាការរួមចំណែកដល់ផលិតផលក្នុងស្រុកសរុប (GDP) នោះ វិស័យកសិកម្មក៏បានបង្ហាញពីសមត្ថភាពស្រូបយកកម្លាំងពលកម្មខ្លាំងផងដែរ។ ទិន្នន័យពីទីភ្នាក់ងារស្ថិតិកណ្តាលរបស់ប្រទេសឥណ្ឌូណេស៊ី (BPS) បានបង្ហាញថា គិតត្រឹមខែកុម្ភៈ ឆ្នាំ២០២៥ វិស័យកសិកម្មមានចំណែកការងារ ២៨,៥% នៃកម្លាំងការងារសរុបរបស់ឥណ្ឌូណេស៊ី ច្រើនជាងវិស័យផ្សេងទៀតរួមទាំង ពាណិជ្ជកម្ម និងផលិតកម្ម។
នៅក្នុងរយៈពេល៦ខែកន្លងមកនេះ វិស័យកសិកម្មបានបង្កើតការងារប្រហែល៨៥ម៉ឺននាក់ ក្នុងចំណោមការងារសរុបចំនួន ៨៩ម៉ឺននាក់ ដែលត្រូវបានបង្កើតឡើងនៅទូទាំងប្រទេសឥណ្ឌូណេស៊ី ដោយតួលេខនេះ បានបញ្ជាក់ពីតួនាទីដ៏សំខាន់របស់វិស័យក្នុងការរក្សាស្ថិរភាពសេដ្ឋកិច្ច ជាពិសេសសម្រាប់សហគមន៍ដែលមានប្រាក់ចំណូលទាប៕
ចែករំលែកព័តមាននេះ