រាជធានីភ្នំពេញ ៖ មានឧប្បត្តហេតុផ្ទុះទូកុងតឺន័រមួយ ដែលផ្ទុកទៅដោយរថយន្តម៉ាកតូយ៉ូតាព្រូសចំនួន៥គ្រឿង លាន់សូរដូចគ្រាប់ប្លោង បង្កឲ្យមានអណ្ដាតភ្លើងឆាបឆេះយ៉ាងសន្ធោសន្ធៅ ហើយបើទោះជាភ្លាមៗនោះ មានរថយន្តពន្លត់អគ្គិភ័យទៅជួយបាញ់ពន្លត់ក្ដី ប៉ុន្តែរថយន្តទាំង៥គ្រឿងនៅក្នុងទូកុងតឺន័រនោះ បានរងការខូចខាតទាំងស្រុង…
រាជធានីភ្នំពេញ ៖ មានឧប្បត្តហេតុផ្ទុះទូកុងតឺន័រមួយ ដែលផ្ទុកទៅដោយរថយន្តម៉ាកតូយ៉ូតាព្រូសចំនួន៥គ្រឿង លាន់សូរដូចគ្រាប់ប្លោង បង្កឲ្យមានអណ្ដាតភ្លើងឆាបឆេះយ៉ាងសន្ធោសន្ធៅ ហើយបើទោះជាភ្លាមៗនោះ មានរថយន្តពន្លត់អគ្គិភ័យទៅជួយបាញ់ពន្លត់ក្ដី ប៉ុន្តែរថយន្តទាំង៥គ្រឿងនៅក្នុងទូកុងតឺន័រនោះ បានរងការខូចខាតទាំងស្រុង ។
ឧប្បត្តិហេតុនោះបានកើតឡើងនាវេលាម៉ោង០៣និង៣០នាទីរសៀលថ្ងៃទី២៦ ខែមិថុនា ឆ្នាំ២០២៥ នៅក្នុងផែស្ងួតហុង ឡេងហួរ ស្ថិត នៅក្នុងភូមិកន្ទោកខាងជើង សង្កាត់កន្ទោកខណ្ឌកំបូល រាជធានីភ្នំពេញ ។
តាមប្រភពពីកន្លែងកើតហេតុ បានប្រាប់ឲ្យដឹងថា នៅវេលាកើតហេតុខាងលើ នៅសុខៗស្រាប់តែមានហេតុការណ៍ផ្ទុះទូកុងតឺន័រមួយនៅក្នុងផែស្ងួតនោះ លាន់សូរដូចគ្រាប់ប្លោង ហើយប៉ើងដំបូលទូកុងតឺន័រ ហោះចេញក្រៅចម្ងាយប្រមាណ១០០ម៉ែត្រធ្លាក់ចូលទៅក្នុងស្រះទឹក និងមានកម្ទេចកម្ទីរខ្ទាតចេញពេញផែស្ងួត។ បន្ទាប់មកស្រាប់តែមានអណ្ដាតភ្លើងឆាបឆេះយ៉ាងសន្ធោសន្ធៅ និងមានផ្សែងហុយឃ្មួលខ្មញ់ឡើងលើ បង្កឲ្យមានការភ្ញាក់ផ្អើលដល់កម្លាំងអាជ្ញាធរ និងសមត្ថកិច្ចខណ្ឌកំបូល បានចុះទៅអន្តរាគមន៍ភ្លាមៗ។ ចំណែកក្រុមអ្នកពន្លត់អគ្គិភ័យ និងរថយន្តពន្លត់អគ្គិភ័យជាច្រើនគ្រឿង បានចេញទៅកាន់ទីនោះ ហើយបានបើកប្រតិបត្តិការពន្លត់ភ្លើងនោះ ។
បើតាមសមត្ថកិច្ចបានប្រាប់ជាជំហានដំបូងថា ពុំមានមនុស្សណាម្នាក់គ្រោះថ្នាក់ដោយរងរបួស ឬស្លាប់នោះទេ ហើយក៏ពុំទាន់ដឹងពីមូលហេតុនៃការផ្ទុះឆេះនេះឲ្យប្រាកដនៅឡើយទេ ប៉ុន្តែបើតាមការសន្និដ្ឋាន អាចបណ្ដាលមកពីការឆ្លងចរន្តភ្លើងអាគុយរថយន្តនៅក្នុងទូកុងតឺន័រនោះ ។ ម្យ៉ាងទៀតរថយន្តព្រូសនេះ សុទ្ធតែប្រើប្រព័ន្ធប្រេងសាំងផង និងប្រព័ន្ធអាគុយស្ងួផង ហើយក៏សុទ្ធតែជាប្រភេទរថយន្តមួយទឹកថែមទៀតដែលងាយនិងឆ្លងចរន្ត បង្កការឆាបឆេះ ។
សមត្ថកិច្ចបានប្រាប់ឲ្យដឹងបន្តទៀតថា នៅក្នុងប្រតិបត្តិការពន្លត់ភ្លើងនេះក្រុមអ្នកពន្លត់អគ្គិភ័យបានប្រើប្រាស់រថយន្តពន្លត់អគ្គិភ័យ ដែលមកពីបណ្ដាអង្គភាពនានាចំនួន១១គ្រឿង ហើយបាញ់ទឹកអស់ទាំង១១គ្រឿងនោះ ទើបភ្លើងរលត់ទៅវិញទាំងស្រុង ខណៈដែលរថយន្តព្រូស១កុងតឺន័រចំនួន៥គ្រឿងនោះ បានខូចខាតអស់ទាំងស្រុង ប៉ុន្តែមិនបានរាលដល់កន្លែងផ្សេងឡើយ ៕
ចែករំលែកព័តមាននេះ