ខេត្តព្រះសីហនុ ៖ ឯកឧត្តម ភាវ សុវុទ្ធី អនុរដ្ឋលេខាធិការក្រសួងបរិស្ថាន និងជាប្រធានគណៈកម្មាធិការគ្រប់គ្រងគម្រោង CCA4CS ថ្លែងថា ការដាំដុះស្តារព្រៃកោងកាងឡើងវិញ…
ខេត្តព្រះសីហនុ ៖ ឯកឧត្តម ភាវ សុវុទ្ធី អនុរដ្ឋលេខាធិការក្រសួងបរិស្ថាន និងជាប្រធានគណៈកម្មាធិការគ្រប់គ្រងគម្រោង CCA4CS ថ្លែងថា ការដាំដុះស្តារព្រៃកោងកាងឡើងវិញ គឺដើម្បីបង្កើនគម្របបៃតង ជួយកាត់បន្ថយការបំភាយឧស្ម័នផ្ទះកញ្ចក់ ក៏ដូចជាការវិនិយោគជូនបងប្អូនក្នុងមូលដ្ឋាន ។
ឯកឧត្តមអនុរដ្ឋលេខាធិការ បានថ្លែងបែប នេះ នៅក្នុងពិធីដាំដើមកូនកោងកាងដើម្បី «រួមគ្នាបង្កើនគម្របបៃតងជូនមាតុភូមិយើង» នៅភូមិសំរុងក្រោម ឃុំសំរុង ស្រុកព្រៃនប់ ។ ពិធីនេះ រៀបចំឡើងដោយអង្គការសហប្រជាជាតិសម្រាប់លំនៅឋានមនុស្សជាតិ(UN-Habitat)កាលពីថ្ងៃទី២៥ ខែមិថុនា ឆ្នាំ២០២៥កន្លងទៅ ដោយមានការចូលរួមពីលោកអភិបាលរងខេត្ត ប្រធានមន្ទីរ អង្គភាព អាជ្ញាធរមូលដ្ឋាន ប្រជាសហគមន៍ និងមន្ត្រីរដ្ឋបាលជលផល ។
ឯកឧត្តម ភាវ សុវុទ្ធី បានសាទរចំពោះការខិតខំប្រឹងប្រែងរបស់អាជ្ញាធរមូលដ្ឋាន រហូតដល់ថ្នាក់ដឹកនាំខេត្ត ដែលធ្វើការដាំដុះស្តារព្រៃកោងកាងជាបន្តបន្ទាប់ ។ ក្រសួងបរិស្ថាន និងអាជ្ញាធរដែនដី បានចូលរួមចំណែកក្នុងការបង្ការទប់ស្កាត់ការកាប់ទន្ទ្រាន ការកាន់កាប់ និងការរុករានយកដីព្រៃដោយខុសច្បាប់ រួមគ្នាការពារគម្របបៃតង ត្រូវដាំដុះព្រៃកោងកាងឲ្យបានជាអតិបរមា មានតុល្យភាពក្នុងការស្រូបយកឧស្ម័នផ្ទះកញ្ចក់ ។ទាក់ទងនឹងភាពបៃតង ក្រសួងបរិស្ថានបានធ្វើយុទ្ធនាការពន្លកបៃតង ដោយបង្កើតឲ្យមានថ្នាលបណ្តុះកូនឈើតាមតំបន់នៅទូទាំងព្រះរាជាណាចក្រកម្ពុជា ។
ការដាំកូនកោងកាងនៅទីនេះជាផ្នែកមួយនៃការស្តារព្រៃកោងកាងនៅក្នុងតំបន់ រួមចំណែកក្នុងយុទ្ធនាការពន្លកបៃតង ។ គោលដៅសំខាន់ គឺកាត់បន្ថយការប្រែប្រួលអាកាសធាតុ ព្រោះព្រៃកោងកាងគឺជាអង្គរក្សសមុទ្រមួយដែលជួយទ្រទ្រង់ប្រព័ន្ធអេកូឡូស៊ីសមុទ្រ និងផ្តល់អត្ថប្រយោជន៍ផ្សេងៗជូនប្រជាពលរដ្ឋនៅក្នុងសហគមន៍ផងដែរ ។
លោក នេន ចំរើន ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានលើកឡើងថា នៅទីតាំងនេះមានព្រៃកោងកាង ២ ៨០០ហិកតា ក្រៅពីនេះសុទ្ធតែជាផ្ទៃទឹក សម្រាប់អ្នកនេសាទជាលក្ខណៈគ្រួសារមានប្រមាណ ៥០០នាក់ ។ នៅទីតាំងនេះ បានដាំកូនកោងកាងឡើងវិញជាង៥០ ០០០ដើមរួចហើយ ។
យើងនៅសល់កូនកោងកាងជាង ១០ម៉ឺនដើម ដាំបន្តនៅសហគមន៍ជម្ពូខ្មៅ និងសហគមន៍បែកក្រង់បន្ថែមទៀត ។ ការដាំជារឿងមួយ ក៏ប៉ុន្តែការថែទាំជារឿងសំខាន់ដែលទាមទាឱ្យគ្រប់ភាគីពាក់ព័ន្ធចូលរួមថែរក្សាទាំងអស់គ្នា ។ លោក ឡុង ឌីម៉ង់ អភិបាលរងខេត្ត ចាត់ទុកសកម្មភាពនេះ គឺជាការការពារបរិស្ថាន និងប្រព័ន្ធអេកូឡូស៊ី បង្កើតជាជម្រកសម្រាប់សត្វសមុទ្រ ។
ដើមកោងកាងមានសមត្ថភាពបំពេញតួនាទីរំលាយកាបូនក្នុងខ្យល់ ដោយកាត់បន្ថយការបំពុលអាកាស និងអភិរក្សបរិស្ថាន កោងកាង អាចអភិវឌ្ឍន៍ក្លាយជាគោលដៅទេសចរណ៍ធម្មជាតិ សម្រាប់ទេសចរជីវចម្រុះ និងការអភិរក្សធម្មជាតិដ៏សំខាន់មិនអាចខ្វះបាន ៕
ចែករំលែកព័តមាននេះ