រាជធានីភ្នំពេញ ៖ មេគោផើម១ក្បាល ដែលម្ចាស់របស់វាលែងឲ្យដើរស៊ីស្មៅនៅតាមវាល ខណៈកំពុងដើរឆ្លងផ្លូវ ក៏ត្រូវរថយន្តម៉ាក Ford Ranger XLT ១គ្រឿង ជ្រុលទៅបុកបណ្ដាលឲ្យមេគោនោះ ខ្ទាតជាង១០ម៉ែត្រងាប់ភ្លាមៗនៅនឹងកន្លែង។ បន្ទាប់មក រថយន្តខាងលើក៏ខ្ទាតផ្លោងទៅបោកផ្ទប់ជាមួយបង្គោលស្លាកប៉ាណូធំ១ដើម ស្ថិតនៅកណ្ដាលសួនពុះចែកទ្រូងផ្លូវ និងធ្លាយចូលទៅចំណែកផ្លូវម្ខាងទៀតរងការខូចខាតយ៉ាងដំណំ ប៉ុន្តែមិនបានបណ្ដាលឲ្យអ្នកបើកបររងរបួសឡើយ ។
ឧប្បត្តិហេតុនោះបានកើតឡើងកាលពីវេលាម៉ោង០៣និង២០នាទីរសៀលថ្ងៃទី៤ ខែមិថុនា ឆ្នាំ២០២៦ នៅលើកំណាត់មហាវិថីស៊ី ជីនពីង ត្រង់ចំណុចជិតភ្លើងស្តុបវត្តគោកខ្សាច់ ស្ថិតនៅក្នុងភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
រថយន្តម៉ាក Ford Ranger XLT ១គ្រឿងនោះ ពណ៌ស ពាក់ស្លាកលេខភ្នំពេញ 2BK-3520 បើកបរដោយបុរសមិនស្គាល់អត្តសញ្ញាណម្នាក់ ដោយឡែកមេគោផើមងាប់នោះ ពុំទាន់រកម្ចាស់ឃើញនៅឡើយទេ ដោយម្ចាស់របស់វាបានលែងចោលឲ្យដើរស៊ីស្មៅនៅតាមទីវាល ។
សមត្ថកិច្ច បានប្រាប់ថា នៅមុនពេលកើតហេតុ រថយន្តហ្វតបានបើកបរធ្វើដំណើរតាមមហាវិថីស៊ី ជីនពីង ក្នុងទិសដៅពីជើងទៅត្បូង ក្នុងល្បឿនលឿនគួរសមដែរ ។ លុះពេលទៅដល់ត្រង់ចំណុចកើតហេតុបានវាក់ជាមួយមេគោផើម ១ក្បាល ខាងលើ កំពុងដើរឆ្លងផ្លូវមហាវិថីស៊ី ជីនពីង ពីកើតទៅលិច ។
សមត្ថកិច្ច បានប្រាប់បន្តទៀតថា ពេលនោះរថយន្តខាងលើគេចអត់ទាន់ ក៏ជ្រុលទៅបុកមេគោនោះពេញទំហឹង បណ្ដាលឲ្យខ្ទាតជាង១០ម៉ែត្រងាប់ភ្លាមៗនៅនឹងកន្លែងតែម្ដង ។ ចំណែករថយន្ត បានខ្ទាតផ្លោងទៅបោកផ្ទប់ជាមួយបង្គោលស្លាកប៉ាណូធំ ១ដើម នៅកណ្ដាលសួនពុះចែកទ្រូងផ្លូវ និងធ្លាយចូលទៅចំណែកផ្លូវម្ខាងទៀត ការខូចខាតកាងមុខខាងឆ្វេង បែកកង់ខាងស្ដាំ និងក្រពឹតទ្វារមុខ ព្រមទាំងទ្វារក្រោយខាងស្ដាំង ហើយស្ថិតនៅទទឹងផ្លូវទៀតផង ។
ក្រោយពេលកើតហេតុ កម្លាំងនគរបាលប៉ុស្តិ៍ភ្លើងឆេះរទេះ បានចុះទៅកាន់ទីនោះ រួចរាយការណ៍ជូនកម្លាំងការិយាល័យនគរបាលចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ។ ដើម្បីចុះទៅនាំយករថយន្តខាងលើទៅរក្សាទុករង់ចាំការដោះស្រាយរឿងខូចខាតស្លាកប៉ាណូ និងសួនពុះចែកទ្រូងផ្លូវ ព្រមទាំងធ្វើការស្រាវជ្រាវរកម្ចាស់គោឲ្យចេញមុខមកទទួលខុសត្រូវលើករណីនេះផងដែរ ៕
ចែករំលែកព័តមាននេះ