រាជធានីភ្នំពេញ ៖ មានឧប្បត្តិហេតុគ្រោះអគ្គិភ័យមួយបានកើតឡើង ដោយបានឆាបអគាររោងចក្រផលិតចាន និងប្រអប់បាយស្នោមួយកន្លែង យ៉ាងសន្ធោសន្ធៅ និងមានផ្សែងហុយឡើងលើខ្មៅខ្មួលខ្មាញ់កប់អាកាស ដោយមិនទានដឹងពីមូលហេតុនៅឡើយ ប៉ុន្តែភ្លាមៗនោះមានការសង្ស័យថា បណ្ដាលមកពីឆ្លងចរន្តអគ្គិសនី ។
ឧប្បត្តិហេតុនោះបានកើតឡើងនាវេលាម៉ោង៤រសៀល ថ្ងៃទី៤ ខែមិថុនា ឆ្នាំ២០២៦ ដែលរោងចក្រខាងលើនោះមានទីតាំងស្ថិតនៅក្នុងភូមិត្រពាំងសាលា សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
សមត្ថកិច្ច បានប្រាប់ថា រោងចក្រនោះមានច្រើនអគារ ដែលសាងសង់ពីថ្មលាយដែក ប្រក់ដំបូលស័ង្កសី ចំណែកជញ្ជាំងបាំងដោយស័ង្កសី១កំណាត់ខាងលើ និងថ្ម ១កំណាត់ក្រោម ហើយភ្លាមៗនោះត្រូវបានភ្លើងឆេះអស់ទាំងស្រុង និងដួលរលំអស់ចំនួន២ខ្នងហើយ ។ ដោយឡែកនៅមុនពេលកើតហេតុ ខណៈដែលកម្មករកំពុងធ្វើការ ហើយម៉ាស៊ីនសង្វាក់ផលិតកម្មកំពុងតែដំណើរការសុខៗ ស្រាប់តែមានភ្លើងឆាបឆេះឡើងយាងឆាប់រហ័ស តែមួយភ្លែតក៏មានអណ្ដាតភ្លើងសន្ធោសន្ធៅ ព្រមទាំងមានផ្សែងហុយឡើងលើឃ្មួលខ្មាញ់កប់អាកាសតែម្ដង ។
សមត្ថកិច្ចបានប្រាប់ឲ្យដឹងបន្តទៀតថា នៅពុំទាន់ដឹងថា មានកម្មករបម្រើការងារនៅក្នុងរោងចក្រនោះប៉ុន្មាននាក់នោះនៅឡើយទេ បើតាមការពិនិត្យជាបឋមនៅពុំទាន់ឃើញមានកម្មករណាម្នាក់រងរបួសនោះទេ ហើយសម្ភារៈនៅក្នុងអគារទាំង២នោះ បានរងការឆាបឆេះអស់ដែរ ចំណែកមូលហេតុ នៃការឆាបឆេះក៏ពុំទាន់ដឹងដែរ កំពុងស្ថិតក្នុងការស្រាវជ្រាវ ។
បន្ទាប់ពីមានហេតុការណ៍នោះកើតឡើងភ្លាម កម្លាំងអាជ្ញាធរនិងសមត្ថកិច្ចខណ្ឌដង្កោព្រមទាំងរថយន្តពន្លត់អគ្គិភ័យជាច្រើនគ្រឿងបានចេញទៅអន្តរាគមន៍ពន្លត់ភ្លើងនោះហើយក្រោយពីប្រតិបត្តិការពន្លត់រយៈពេលជាង១ម៉ោងក្រោយមកភ្លើងបានថមថយបន្តិច ប៉ុន្តែមិនទាន់នៅឡើយ ៕
ចែករំលែកព័តមាននេះ