ខេត្តឧត្តរមានជ័យ ៖ យោងតាមការណែនាំមន្ត្រីស្ថាប័នមានសមត្ថកិច្ចបម្រើការងារនៅច្រកទ្វារអន្តរជាតិអូរស្មាច់ បានបង្ហាញការធុញទ្រាន់នឹងភាគីថៃ ដែលបើកបិទរបងព្រំដែនតាមតែទំនើងចិត្តជាឯកតោភាគីរបស់ខ្លួន កាលពីថ្ងៃទី២៥ ខែមិថុនា ឆ្នាំ២០២៥ ។ ទាក់ទិនទៅនឹងភាគីថៃបិទបើកច្រកទ្វារអន្តជាតិអូរស្មាច់ជាឯកតោភាគីតាមតែទំនើងចិត្តរបស់ខ្លួននោះ…
ខេត្តឧត្តរមានជ័យ ៖ យោងតាមការណែនាំមន្ត្រីស្ថាប័នមានសមត្ថកិច្ចបម្រើការងារនៅច្រកទ្វារអន្តរជាតិអូរស្មាច់ បានបង្ហាញការធុញទ្រាន់នឹងភាគីថៃ ដែលបើកបិទរបងព្រំដែនតាមតែទំនើងចិត្តជាឯកតោភាគីរបស់ខ្លួន កាលពីថ្ងៃទី២៥ ខែមិថុនា ឆ្នាំ២០២៥ ។
ទាក់ទិនទៅនឹងភាគីថៃបិទបើកច្រកទ្វារអន្តជាតិអូរស្មាច់ជាឯកតោភាគីតាមតែទំនើងចិត្តរបស់ខ្លួននោះ ប្រជាពលរដ្ឋខ្មែររស់នៅក្នុងខេត្តឧត្តរមានជ័យមិនសប្បាយចិត្តទេ ព្រោះពួកគាត់មិនដែលរស់ក្រោមការដកដង្ហើមពីប្រទេសថៃឡើយ ទោះបីបិទរហូតក៏មិនខាតបង់អី្វដែរ ។
ប្រជាពលរដ្ឋដែលរស់នៅក្នុងខេត្តឧត្តរមានជ័យ បានថ្លែងអំណរគុណ និងដឹងគុណរាជរដ្ឋភិបាល ដែលមិនឱ្យនាំបន្លែ ផ្លែឈើចូលមកប្រទេសកម្ពុជា ទុកឲ្យប្រជាពលរដ្ឋខ្មែរ មានឱកាសប្រកបមុខរបរដាំដុះបន្លែ ផ្លែឈើក្នុងស្រុកលក់ដោះដូដើម្បីចិញ្ចឹមជីវិត ។
លោក បញ្ញា រិទ្ធ ប្រធានស្នាក់ការត្រួតពិនិត្យច្រកទ្វារអន្តរជាតិអូរស្មាច់ នៅព្រឹកថ្ងៃទី២៦ ខែមិថុនា ឆ្នាំ២០២៥ បាននិយាយថា យោងតាមទង្វើរបស់ក្រុមទាហានថៃនៅច្រកទ្វារនេះគឺពួកគេចង់បិទឬចង់បើកជាឯកតោភាគី ។ ដោយសារមានការធុញទ្រាន់នឹងទង្វើនេះ ទើបខាងកម្ពុជាសម្រេចចិត្តបិទរហូតតែម្តងទៅកាលពីថ្ងៃទី២៥ ខែមិថុនា ឆ្នាំ២០២៥ ។
លោក បញ្ញា រិទ្ធ បានបញ្ជាក់ថា ម៉ោងនេះថ្ងៃនេះ ទោះជាភាគគីថៃបើកក៏កម្ពុជាមិនបើកដែរ ខាងកម្ពុជារង់ចាំទទួលបទបញ្ជាពីថ្នាក់លើសិន ទើបបើកឲ្យដំណើការឡើងវិញ ។ ប៉ុន្តែសម្រាប់ពលករខ្មែរដែលវិលត្រឡប់ពីប្រទេសថៃនោះ សមត្ថកិច្ចរួមទាំងក្រុមអាជ្ញាធររង់ចាំទទួលជានិច្ច ។
គួររំឭកដែរថា ខេត្តឧត្តរមានជ័យមានច្រកទ្វារចំនួន៣ គឺច្រកទ្វារអន្តរជាតិចំនួន២ មានច្រកទ្វារអន្តរជាតិជាំ ស្ថិតនៅក្នុងស្រុកអន្លង់វែង និងច្រកទ្វារអន្តរជាតិអូរស្មាច់ ស្ថិតនៅក្រុងសំរោង និងច្រកតំបន់ជប់គគីរ ស្ថិតនៅក្នុងស្រុកបន្ទាយអំពិល ហើយនៅថ្ងៃទី២៥ ខែមិថុនា ឆ្នាំ២០២៥ ខាងកម្ពុជាបានសម្រេចចិត្តបិទទាំង៣ច្រកទ្វារតែម្តង ៕
ចែករំលែកព័តមាននេះ