ទីក្រុងប៉េកាំង៖ មនុស្ស៦នាក់ស្លាប់ដោយសារទឹកជំនន់នៅខេត្តកួយចូវ (Guizhou) ប្រទេសចិន ខណៈដែលមនុស្សជាង៨ម៉ឺននាក់ត្រូវជម្លៀសខ្លួនជាបន្ទាន់។ ទឹកហូរចាក់ខ្លាំងនៅខេត្តភាគខាងត្បូងមួយនេះបង្ខំឱ្យអាជ្ញាធរចាត់វិធានការក្ដៅជាបន្ទាន់។ នៅថ្ងៃព្រហស្បិ៍នេះ ទូរទស្សន៍ចិនស៊ីស៊ីធីវី (CCTV) ផ្សាយថាទឹកជំនន់នៅក្នុងបរិមាណដ៏ច្រើនមហាសាលបានហូរចាក់ទៅលើតំបន់រ៉ុងជាំង…
ទីក្រុងប៉េកាំង៖ មនុស្ស៦នាក់ស្លាប់ដោយសារទឹកជំនន់នៅខេត្តកួយចូវ (Guizhou) ប្រទេសចិន ខណៈដែលមនុស្សជាង៨ម៉ឺននាក់ត្រូវជម្លៀសខ្លួនជាបន្ទាន់។ ទឹកហូរចាក់ខ្លាំងនៅខេត្តភាគខាងត្បូងមួយនេះបង្ខំឱ្យអាជ្ញាធរចាត់វិធានការក្ដៅជាបន្ទាន់។ នៅថ្ងៃព្រហស្បិ៍នេះ ទូរទស្សន៍ចិនស៊ីស៊ីធីវី (CCTV) ផ្សាយថាទឹកជំនន់នៅក្នុងបរិមាណដ៏ច្រើនមហាសាលបានហូរចាក់ទៅលើតំបន់រ៉ុងជាំង (Rongjiang) ខេត្តកួយចូវ ចាប់តាំងពីថ្ងៃអង្គាររហូតមកដល់ពេលនេះមិនទាន់បញ្ចប់នៅឡើយទេ។
គិតត្រឹមម៉ោង១១ព្រឹកមិញ អាជ្ញាធរស្រង់បានសាកសពជនរងគ្រោះ៦នាក់។ តំបន់ទំនាបនៅតែបន្តលិចទឹកដដែលទេ។ ហេដ្ឋារចនាសម្ព័ន្ធនៅទីក្រុងមួយចំនួនរងការខូចខាតយ៉ាងធ្ងន់ធ្ងរដោយសារទឹកជំនន់ជាហេតុធ្វើឱ្យកកស្ទះចរាចរណ៍ ដាច់ប្រព័ន្ធទំនាក់ទំនង ឬមនុស្សជាប់ផុងទៅណាមិនរួច។ សម្រាប់ពេលនេះ ទឹកជំនន់ចាប់ផ្ដើមស្រកទៅវិញនៅក្រោមកម្រិតប្រកាសអាសន្ន។
ទីភ្នាក់ងារព័ត៌មានស៊ីនហួផ្សាយថាតារាងបាល់ទាត់មួយនៅតំបន់រ៉ុងជាំងត្រូវទឹកលិចរហូតដល់កម្ពស់បីម៉ែត្រ។ អ្នកខ្លះរស់នៅដល់ជាន់ទីបីក៏ត្រូវជម្លៀសខ្លួនចេញជាបន្ទាន់ផងដែរ។ ក្រឡេកទៅមើលខេត្តក្វាងស៊ី (Guangxi) ដែលមានព្រំប្រទល់ជាប់នឹងខេត្តកួយចូវក៏កំពុងរងគ្រោះដោយជំនន់ទឹកភ្លៀងផងដែរ។ ទីភ្នាក់ងារព័ត៌មានស៊ីនហួបង្ហោះរូបដីល្បាប់ហូរចាក់ទៅលើផ្លូវនៃទីក្រុងម៉ីលីន (Meilin)។
អាជ្ញាធរបានចេញសេចក្ដីប្រកាសអាសន្នឱ្យប្រុងប្រយ័ត្នចំពោះទឹកនៅតាមដងទន្លេ និងស្ទឹងចំនួន២០ដែលហូរខ្វាត់ខ្វែងកាត់ខេត្តក្វាងស៊ី។ ហេតុការណ៍បាក់ដី និងទឹកជំនន់បានបំផ្លាញប្រព័ន្ធគមនាគមន៍។ អាកាសធាតុកំពុងប្រែប្រួលមិនទៀងទាត់នៅប្រទេសចិន។ ទន្ទឹមនឹងតំបន់ខ្លះមានទឹកជំនន់ដ៏ល្ហល្ហាចបែបនេះ តំបន់ខ្លះបែរជាមានអាកាសធាតុក្ដៅហួតហែងខ្លាំងទៅវិញ។
នៅសប្ដាហ៍នេះ អាជ្ញាធរបានចេញសេចក្ដីព្រមានអំពីការឡើងកម្ដៅដល់កម្រិតខ្ពស់លំដាប់ទី២នៅរដ្ឋធានីប៉េកាំង។ កាលពីសប្ដាហ៍មុន មនុស្សរាប់ម៉ឺននាក់នៅខេត្តហ៊ូណាន (Hunan) ដែលមានព្រំប្រទល់ជាប់នឹងខេត្តកួយចូវត្រូវបង្ខំចិត្តជម្លៀសខ្លួនទាំងប្រញាប់ប្រញាល់ដោយសារភ្លៀងធ្លាក់ខ្លាំងដែលបង្កជាគ្រោះទឹកជំនន់យ៉ាងឆាប់រហ័ស៕
ចែករំលែកព័តមាននេះ