សម្តេចតេជោ ផ្តាំទៅថៃ ថា អាចបញ្ជាទ័ព ឬចូលប្រយុទ្ធបានគ្រប់ពេល
រាជធានីភ្នំពេញ ៖ ថ្លែងចេញពីទឹកដីខេត្ដព្រះវិហារ ជាប់ព្រំដែនប្រទេសថៃ សម្តេចតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ បានថ្លែងបញ្ជាក់អំពីសុខភាពរបស់សម្ដេចថា…
រាជធានីភ្នំពេញ ៖ ថ្លែងចេញពីទឹកដីខេត្ដព្រះវិហារ ជាប់ព្រំដែនប្រទេសថៃ សម្តេចតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ បានថ្លែងបញ្ជាក់អំពីសុខភាពរបស់សម្ដេចថា គឺនៅល្អទាំងអស់ ហើយបើមានតម្រូវការឲ្យសម្ដេចបញ្ជាទ័ព ឬចូលប្រយុទ្ធ គឺសម្ដេចកំដរបានគ្រប់ពេល ។
ការថ្លែងបញ្ជាក់របស់សម្តេច ក្នុងឱកាសដែលសម្តេចអញ្ជើញជួបសំណេះសំណាល ជាមួយបងប្អូនប្រជាពលរដ្ឋ ដែលបានភៀសខ្លួន ចេញពីតំបន់ប្រឈម នៅព្រំដែនកម្ពុជា-ថៃ ក្នុងខេត្តព្រះវិហារ នាល្ងាចថ្ងៃទី២៦ ខែមិថុនា ឆ្នាំ២០២៥ ។
ថ្លែងជាសាធារណៈ ក៏ដូចជាចង់ប្រាប់ទៅភាគីថៃ សម្តេចតេជោ ហ៊ុន សែន បានបញ្ជាក់យ៉ាងដូច្នេះថា ៖ «សុខភាពរបស់ ហ៊ុន សែន នៅល្អណាស់ កុំមើលឃើញថា ហ៊ុន សែន បែបនេះជា ហ៊ុន សែន ទន់ខ្សោយ សូម្បីតែឥឡូវ ឧទាហរណ៍ត្រូវបញ្ជាកងទ័ព ឬត្រូវចូលប្រយុទ្ធ ហ៊ុន សែន កំដរបាន» ។
សម្តេចតេជោ ហ៊ុន សែន បានថ្លែងថា «ខ្ញុំត្រូវពិនិត្យ ដើម្បីរុករកឲ្យឃើញជំងឺ មានអ្វីខ្លះ អ្វីៗល្អទាំងអស់ ប៉ុន្ដែខ្ញុំទាមទារឲ្យគេពិនិត្យបេះដូងរបស់ខ្ញុំ» ។
សម្ដេចតេជោ បានលើកឡើងថា ការពិនិត្យបេះដូងនេះ ព្រោះសម្ដេចមានបងប្រុស ដែលទទួលមរណភាព នៅឆ្នាំ២០២២ ដោយសារតែគាំងបេះដូង ខណៈដែលត្រកូលសម្ដេច និងក្រុមគ្រួសារសម្ដេច មិនដែលមានអ្នកគាំងបេះដូងនោះទេ ចឹងហេតុនេះហើយ បានជាសម្ដេចមានតម្រូវការ ហើយគ្រូពេទ្យ ក៏ឯកភាព ៕
ចែករំលែកព័តមាននេះ