រាជធានីភ្នំពេញ ៖ សម្តេចតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ និងជាប្រធានព្រឹទ្ធសភា បានប្រកាសទទួលយកងារជា ”អគ្គភស្តុភារជាន់ខ្ពស់”…
រាជធានីភ្នំពេញ ៖ សម្តេចតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ និងជាប្រធានព្រឹទ្ធសភា បានប្រកាសទទួលយកងារជា ”អគ្គភស្តុភារជាន់ខ្ពស់” និងពេញចិត្ត និងធ្វើកិច្ចការជួយលើការផ្តល់ភស្តុភារបន្ថែមលើភស្តុភារ ដែលរាជរដ្ឋាភិបាលផ្តល់ជូន ។
យោងតាមបណ្តាញសង្គមរបស់សម្តេចតេជោ បាននៅថ្ងៃទី២៦ ខែមិថុនា ឆ្នាំ២០២៥ សម្តេចតេជោ បានលើកឡើងថា ខ្ញុំកំពុងមកសួរសុខទុក្ខកងទ័ពមន្ត្រីរាជការ និងប្រជាជនភៀសសឹក នៅខេត្តឧត្តរមានជ័យ និងខេត្តព្រះវិហារ ។ វត្តមានរបស់ខ្ញុំ មិនមកចេញបញ្ជាជំនួសឲ្យនាយករដ្ឋមន្ត្រី ឬរដ្ឋមន្ត្រីក្រសួងការពារជាតិ ឬអគ្គបញ្ជាការកងទ័ពនោះឡើយ តែជាការមកសួរសុខទុក លើកទឹកចិត្ត និងផ្តល់ជំនួយសម្រាប់កងកម្លាំងប្រដាប់អាវុធ ដែលកំពុងការពារជាតិការទឹកដី ។
សម្តេចបានលើកឡើងថា ៖ “បងប្អូនមេបញ្ជាការកងទ័ព បានហៅខ្ញុំថា (អគ្គភស្តុភារជាន់ខ្ពស់) ។ ខ្ញុំពេញចិត្ត និងធ្វើកិច្ចការជួយលើការផ្តល់ភស្តុភារបន្ថែមលើភស្តុភារ ដែលរាជរដ្ឋាភិបាលផ្តល់ជូន ។ មុខនាទីនេះ មិនតម្រូវឲ្យមានការតែងតាំងនោះទេ ព្រោះជាពាក្យនិយាយលេង” ។
ជាមូយគ្នានោះដែរ សម្តេចតេជោ ក៏បានលើកឡើងថា សារព័ត៌មានថៃមួយ បានចុះផ្សាយថា ខ្ញុំដកអគ្គបញ្ជាការកងទ័ព និងតែងតាំងខ្លួនឯង ជាអគ្គបញ្ជាការកងទ័ព ដើម្បីត្រៀមវាយថៃ ។
ឆ្លើយបកទៅសារព័ត៌មានថៃ សម្តេចបានបញ្ជាក់ថា ៖ “ខ្ញុំសូមផ្តាំទៅវិញថា បើឆ្កួតសូមឆ្កួតតែពួកអ្នកឯងចុះ ។ ខ្ញុំជាមនុស្សទី២ បន្ទាប់ពីព្រះមហាក្សត្រ តើមានការចាំបាច់ទេ ដើម្បីទៅធ្វើជាអគ្គបញ្ជាការកងទ័ព ដោយខ្លួនឯងនោះ ដែលសូម្បីតែតួរនាទី ជានាយករដ្ឋមន្ត្រី
ក៏ខ្ញុំមិនបន្តធ្វើដែរនោះ ។ ឈប់បានឈប់ទៅ និងសូមកុំចូលមកឈ្លានពាន Facebook ខ្ញុំទៀត” ៕
ចែករំលែកព័តមាននេះ