សម្តេចតេជោ ប្រកាសរងចាំមើលនាយករដ្ឋមន្ត្រីថៃថ្មី ដើម្បីដោះស្រាយជម្លោះព្រំដែនជាមួយកម្ពុជា
រាជធានីភ្នំពេញ ៖ សម្តេចតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ និងជាប្រធានព្រឹទ្ធសភា បានសម្តែងក្តីសង្ឃឹមថា នៅប្រទេសថៃ…
រាជធានីភ្នំពេញ ៖ សម្តេចតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ និងជាប្រធានព្រឹទ្ធសភា បានសម្តែងក្តីសង្ឃឹមថា នៅប្រទេសថៃ នឹងមាននាយករដ្ឋមន្ត្រីថ្មី ហើយចេញមក ដើម្បីដោះស្រាយជម្លោះជាមួយកម្ពុជា ព្រោះថា នៅពេលនេះ មិនដឹងថា ត្រូវចរចាជាមួយអ្នកណា ? អំណាចពិតប្រាកដជាអ្នកណា ? ។
ថ្លែងក្នុងជំនួបសំណេះសំណាលសួរសុខទុក្ខជនភៀសសឹក នៅទីទួលសុវត្ថិភាព វត្តពោធិ ៥០០០ដើម នារសៀលថ្ងៃទី២៦ ខែមិថុនា ឆ្នាំ២០២៥ នៅខេត្តព្រះវិហារ សម្តេចតេជោ បានលើកឡើងថា ខណៈនេះកម្ពុជា កំពុងរង់ចាំមើលនាយករដ្ឋមន្ដ្រីថ្មីរបស់ថៃ ដែលអាចនឹងមានការផ្លាស់ប្តូរនៅពេលខាងមុខ ដើម្បីដោះស្រាយ ករណីជម្លោះព្រំដែនជាមួយកម្ពុជា ព្រោះការដោះស្រាយបញ្ហានេះ លុះត្រាតែមាននាយករដ្ឋមន្ដ្រីថៃថ្មី ទើបមានឆន្ទៈក្នុងការដោះស្រាយបាន ។
សម្តេចតេជោ បានគូសបញ្ជាក់យ៉ាងដូច្នេះថា «យើងសង្ឃឹមរង់ចាំថា នៅប្រទេសថៃ នឹងមាននាយករដ្ឋមន្ត្រីថ្មី ហើយចេញមក ដើម្បីនឹងដោះស្រាយជាកម្ពុជា ព្រោះនៅពេលនេះ យើងមិនដឹងថា ត្រូវចរចាជាមួយអ្នកណា អំណាចពិតប្រាកដ គឺជាអ្នកណា តើជាទ័ព ឬក៏ជាបក្សនយោបាយ ឬក៏អ្នកនៅក្រោយបក្សនយោបាយ ឬក៏ជានាយករដ្ឋមន្ត្រី វាអត់ដឹងថា អ្នកណាជាអ្នកមានអំណាចពិតប្រាកដ» ។
សម្តេច បានបញ្ជាក់បន្ថែមថា ស្ថានភាពនៅថៃ បច្ចុប្បន្ននេះ អាចបង្ហាញបានថា លុះត្រាតែមាននាយករដ្ឋមន្ត្រីថ្មី ចូលកាន់តំណែងនាពេលខាងមុខ ទើបអាចនឹងមានសុឆន្ទៈដោះស្រាយជាមួយកម្ពុជា ហើយកម្ពុជាបានត្រៀមខ្លួនហើយ ក្នុងការធ្វើការជាមួយនាយករដ្ឋមន្ត្រីថៃក្រោយ ។
សម្តេចតេជោ បានមានប្រសាសន៍ទៀតថា មិនមែនតែកម្ពុជាទេ ដែលរំពឹងថា កម្ពុជានឹងមាននាយករដ្ឋមន្ត្រីថ្មី សូម្បីតែប្រជាជនថៃ ក៏ត្រូវការមានមេដឹកនាំថ្មី ផងដែរ ។
ទន្ទឹមគ្នា សម្តេចតេជោ សង្កត់ធ្ងន់ថា កម្ពុជាមិនមើលទៅថៃ និងទុកថៃ ជាសត្រូវនោះទេ ហើយកម្ពុជា ក៏មិនដែលគាំទ្រខាងបក្សអាវក្រហម ឬអាវលឿង ឬបក្សណានោះទេ គឺកម្ពុជាធ្វើការគ្រប់ជាមួយតួអង្គទាំងអស់ ដែលចូលមកគ្រប់គ្រងប្រទេសថៃ ។
ជាមួយគ្នានេះ សម្ដេចតេជោ ហ៊ុន សែន បានរំលឹកផងដែរថា ក្នុងជំនាន់អតីតនាយករដ្ឋមន្ដ្រីថៃ ប្រាយុទ្ធ ចាន់អូចារ ដែលបានដឹកនាំថៃ រយៈពេលជិត១០ឆ្នាំ ដែលកាលនោះ ទំនាក់ទំនងកម្ពុជា-ថៃ មិនដែលមានរឿងអ្វីកើតឡើងនោះទេ ហើយបានឈានទៅការភ្ជាប់ទំនាក់ទំនងខ្ពស់បំផុត។ បើទោះបីជាលោកចេញពីយោធាក៏ដោយ ប៉ុន្តែលោកបានដឹកនាំប្រទេស និងបង្កើនទំនាក់ទំនងសាមគ្គីភាពជាមួយបណ្តាប្រទេសទាំងអស់ ផ្ទុយពីបច្ចុប្បនេះ ប្រទេសថៃ មានបញ្ហាជាមួយគ្រប់ប្រទេសជាប់របងទាំងអស់ ដែលរួមមានបញ្ហាព្រំដែនជាមួយ ម៉ាឡេស៊ី មីយ៉ាន់ម៉ា ឡាវ ហើយបច្ចុប្បន្ននេះ ក៏មានបញ្ហាព្រំដែនជាមួយកម្ពុជាទៀត ដែលព្រំដែនត្រូវបានបិទជាឯកតោភាគី ៕
ចែករំលែកព័តមាននេះ