ប្រសិនបើអ្នកជាមហាសេដ្ឋីដែលមានទ្រព្យសម្បត្តិច្រើនជាងគេលេខពីរលើពិភពលោក តើអ្នកនឹងប្រើវាដោយដូចម្តេច? នៅឆ្នាំ ២០១៨ លោក ប៊ីល ហ្គេតស៍ (Bill Gates) មានទ្រព្យសម្បត្តិរួមសរុបប្រមាណ ៩១ប៊ីលានដុល្លារអាមេរិក ។
ទ្រព្យសម្បត្តិភាគច្រើនរបស់លោកមានប្រភពមកពីការធ្វើជាស្ថាបនិករបស់ក្រុមហ៊ុន Microsoft Corporation ។ លោកមិនត្រឹមតែជាអ្នកដឹកនាំដ៏គួរឲ្យគោរពមួយរូបទេ តែលោកក៏ជាឧទាហរណ៍ដ៏ល្អមួយដែលអ្នកដទៃគួររៀនសូត្រតាមទាក់ទិននឹងការវិនិយោគ ។ ខាងក្រោមគឺជាឧទាហរណ៍ខ្លះៗដែលនៃការប្រើលុយរបស់លោក ហ្គេតស៍៖
១. ការវិនិយោគលើក្រុមហ៊ុន៖
លោកមានភាគហ៊ុនរបស់ក្រុមហ៊ុន Microsoft សរុបប្រមាណ ២០% ប៉ុន្តែលោកក៏វិនិយោគលើភាគហ៊ុនក្រុមហ៊ុនដទៃដែរ ហើយការវិនិយោគទាំងនេះស្ថិតក្រោមការគ្រប់គ្រងរបស់ Cascade Investment ។ លោក ហ្គេតស៍ វិនិយោគលើ Republic Services ដែលជាក្រុមហ៊ុនគ្រប់គ្រងកាកសំណល់ប្រមាណ២ប៊ីលានដុល្លារ AutoNation ប្រមាណ ៦៨០លានដុល្លារ និង Ecolab ប្រមាណជិត ២ប៊ីលានដុល្លារ ។ ក្រៅពីនេះលោកបានបង្កើត BGc3 ដែលជាក្រុមអ្នកជំនាញ និងក្រុមហ៊ុនផ្តោតស្មារតីលើការផ្តល់សេវាកម្មវិទ្យាសាស្ត្រ និងបច្ចេកវិទ្យា ការស្រាវជ្រាវ និងបច្ចេកវិទ្យាកុំព្យូទ័រដើម្បីប្រឆាំងនឹងភាពក្រីក្រ និងមានភាគហ៊ុនក្រុមហ៊ុនដទៃទៀតក្នុងវិស័យឌីជីថល ថាមពលអគ្គិសនីនុយក្លេអ៊ែរ និងផ្នែកស្រាវជ្រាវជាដើម ។
២. អចលនទ្រព្យ៖
លោក ហ្គេតស៍ ក៏សកម្មខ្លាំងក្នុងវិស័យអចលនទ្រព្យដែរ ។ វីឡា Xanadu 2.0 របស់លោកមានបំពាក់ដោយបច្ចេកវិទ្យាទំនើបស្របទៅនឹងផ្ទះបាយចំនួន ៦ និងបន្ទប់គេង ២៤បន្ទប់ ។ កាលពីឆ្នាំ ២០១៣ លោកបានទិញវីឡាមួយទៀតក្នុងរដ្ឋ Florida ក្នុងតម្លៃ ៨.៧លានដុល្លារ ។ មានសេចក្តីរាយការណ៍មួយចំនួនបានឲ្យដឹងដែរថា លោកជាម្ចាស់កម្មសិទ្ធិរបស់កោះ Grand Bogue Caye នៅអាមេរិកកណ្តាលទៀតផងដែលមានតម្លៃប្រមាណ ២៥លានដុល្លារ ។
៣. យន្តហោះ និងយានជំនិះ៖
លោក ហ្គេតស៍ មានយន្តហោះឯកជនមួយគឺ Bombardier BD 700 Global Express តម្លៃប្រហាក់ប្រហែល ៤៥លានដុល្លារ ហើយលោកតែងតែប្រើវាជាប្រចាំរាល់ពេលលោកត្រូវហោះហើរដើម្បីធ្វើការការងារក្រោមឈ្មោះមូលនិធិ Bill & Melinda Gates Foundations ។
លោកក៏ធ្លាប់ត្រូវបានចុះផ្សាយថាមានរថយន្ត 1999 Porsche 911 Carerra និង 930 Turbo ដែលលោកបានទិញពេលដែលក្រុមហ៊ុនចាប់ផ្តើមជោគជ័យដំបូងដែរ ។ ក្រៅពីនេះលោកមាន 1988 959 Coupe មួយគ្រឿង ប៉ុន្តែពេលធ្វើដំណើរប្រចាំថ្ងៃលោកបើកបររថយន្ត Mercedes របស់លោក និងលោកមានរថយន្តបែប Minivan ដែលសម្រាប់ធ្វើដំណើរជាគ្រួសារផងដែរ ៕
កែសម្រួលដោយ ៖ សុឃាក់
ចែករំលែកព័តមាននេះ