ផ្លូវ​២​ខ្សែ​ចំណាយ​ថវិកា​កន្លះ​លាន​ដុល្លារ​បាន​ប្រគល់​ជូន​អ្នកស្រុក​កណ្ដៀង​ប្រើប្រាស់​​ហើយ


ខេត្តពោធិ៍សាត់​ ៖ ក្នុង​ដំណើរ​បេសកកម្ម​ពី​រាជធានី​ភ្នំពេញ​ឆ្ពោះទៅ​កាន់​ខេត្តពោធិ៍សាត់​តាម​ឧទ្ទ​ម្ភា​គ​ចក្រ នា​ព្រឹក​ថ្ងៃ​ទី​១៤ ខែតុលា ឆ្នាំ​២០១៩ លោក Wang Wen Tian ឯកអគ្គរដ្ឋទូត​វិសាមញ្ញ​និង​ពេញ​សមត្ថភាព​នៃ​សាធារណៈរដ្ឋ​ប្រជាមានិត​ចិន​ប្រចាំ​ព្រះរាជាណាចក្រ​កម្ពុជា លោក កែវ រត​នះ រដ្ឋមន្ត្រី​ប្រតិភូ​អម​នាយក​រដ្ឋមន្ត្រី និង​ជា​អគ្គនាយក​អគ្គី​ស​នី​កម្ពុជា លោក ស៊ុ​យ សែ​ម រដ្ឋមន្ត្រីក្រសួង​រ៉ែ​និង​ថាមពល លោក​បណ្ឌិត ម៉ៅ ធនិន អភិបាល​នៃ​គណៈ​អភិបាលខេត្ត​ពោធិ៍សាត់ និង​លោក​ប្រធាន​ក្រុមហ៊ុន China National Heavy Machinery Corporation បាន​អញ្ជើញ​កាត់​ខ្សែបូរសម្ពោធ​ផ្លូវ​កៅស៊ូ​ចំនួន​២​ខ្សែ​ដាក់​ឲ្យ​ប្រើប្រាស់​ជា​ផ្លូវការ នៅ​ឃុំ​ស្វាយ​លួង ស្រុក​កណ្ដៀង ខេត្តពោធិ៍សាត់​។

​ផ្លូវ​កៅស៊ូ​ទាំង​២​ខ្សែ​ខាងលើ​នេះ​ប្រវែង​៦៥០០​ម៉ែត្រ ដែល​បាន​កើតឡើង​តាម​រយៈ​ការ​ទំនាក់ទំនង​របស់​លោក​រដ្ឋមន្ត្រី​ស៊ុ​យ សែ​ម និង​លោក​ជំទាវ​។ ខ្សែ​ទី​១​ឆ្លងកាត់​ភូមិ​ស្វាយ​ចំបក់ ភូមិ​ពោធិ៍​ឡើង ភូមិក​គោ និង​ភូមិ​សន្លុង ប្រវែង​៣៨២០​ម៉ែត្រ និង​ខ្សែ​ទី​២​ឆ្លងកាត់​ភូមិ​ឈើទាល ភូមិ​ផ្ទះ​ស្រែ និង​ភូមិ​ជ្រែង ប្រវែង​២៦៨០​ម៉ែត្រ ដោយ​ចំណាយ​ថវិកា​អស់​៥០​ម៉ឺន​ដុល្លា​សហរដ្ឋអាមេរិក ជា​អំណោយ​របស់​ក្រុមហ៊ុន​ចិន​ដែល​មានឈ្មោះ​ថា China National Heavy Machinery Corporation ។

កន្លង​មកនេះ លោក​ស៊ុ​យ សែ​ម​និង​លោក​ជំទាវ​បាន​ទំនាក់ទំនង​ជាមួយ​ក្រុមហ៊ុន​ចិន​កសាង​បាន​នូវ​សមិទ្ធ​ផល​ជា​ច្រើន​ក្នុង​ខេត្តពោធិ៍សាត់ ដូច​ជា​អគារសិក្សា​កម្ពស់​ពីរ​ជាន់​នៅ​វិទ្យាល័យ​នទី​សេដ្ឋា​ស្រុក​កណ្ដៀង មណ្ឌល​សុខភាព​ប្រហា​ល​ឃុំ​តា​លោ​ស្រុក​បាកាន វា​រី​អគ្គី​ស​នី​ស្ទឹង​ពោធិ៍សាត់​១ និង​ផ្លូវ​ក្រួស​ក្រហម​ចំនួន​២​ខ្សែ​នៅ​ឃុំ​ប្រមោយ​ ស្រុក​វាល​វែង​ជាដើម​។

​លោក​បណ្ឌិត ម៉ៅ ធនិន ក្នុង​នាម​អភិបាល​នៃ​គណៈ​អភិបាលខេត្ត និង​ជំនួស​មុខ​ឲ្យ​ប្រជាពលរដ្ឋ​ខេត្តពោធិ៍សាត់​ទាំងមូល​និយាយ​រួម និយាយ​ដោយឡែក​ប្រជាពលរដ្ឋ​ក្នុងស្រុក​កណ្ដៀង បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​ក្រុមហ៊ុន​ចិន ដែល​បាន​ផ្ដល់​ផ្លូវ​កៅស៊ូ​ចំនួន​២​ខ្សែ​ប្រវែង​៦៥០០​ម ចំណាយ​អស់​ថវិកា​កន្លះ​លាន​ដុល្លា​សហរដ្ឋអាមេរិក ជា​ចំណងដៃ​ជូន​ដល់​ប្រជាពលរដ្ឋ​ក្នុងស្រុក​កណ្ដៀង​នា​ពេល​នេះ​។ ទ​ង្វើ​ទាំងនេះ​បាន​រួមចំណែក​ជាមួយ​រាជរដ្ឋាភិបាល​ក្នុង​ការ​អភិវឌ្ឍន៍​វិស័យ​គមនាគមន៍​នៅ​កម្ពុជា ដែល​កំពុង​រីក​ចំរើន​លើ​គ្រប់​វិស័យ​ក្រោម​ការ​ដឹកនាំ​ដ៏​ឆ្លាត​វៃ​ប្រកបដោយ​គតិបណ្ឌិត​របស់​សម្ដេច​តេ​ជោ​ហ៊ុន សែន ជា​នាយក​រដ្ឋមន្ត្រី​។ ដើម្បី​ជា​សម្ព័ន្ធមិត្ត​នឹង​គ្នា​លោក​អភិបាលខេត្ត​ សូម​ឲ្យ​ក្រុមហ៊ុន​ចិន​បន្ត​ជួយ​កសាង​នូវ​ហេដ្ឋារចនាសម្ព័ន្ធ​ផ្សេង​ៗ​ទៀត ក្នុង​ការ​ចូលរួម​ជាមួយ​រាជរដ្ឋាភិបាល​ដើម្បី​បំពេញ​តាម​តម្រូវការ​ចាំបាច់​របស់​ប្រជាពលរដ្ឋ​កម្ពុជា​។

​លោក Wang Wen Tian ឯកអគ្គរដ្ឋទូត​ចិន​ប្រចាំ​កម្ពុជា បាន​លើក​ឡើង​ពី​ទំនាក់ទំនង​ចិន​ជាមួយ​កម្ពុជា គឺ​មាន​រយៈពេល​ប្រមាណ​២០០០​ឆ្នាំ​មក​ហើយ នេះ​បើ​តាម​វត្ថុ​បុរាណ​ដែល​មាន​ចារ​នៅ​ក្នុង​រូបចម្លាក់​ដែល​បាន​រក​ឃើញ​នៅ​ខេត្តតាកែវ​កន្លង​មកនេះ​។ ប្រទេស​កម្ពុជា​មាន​មេដឹកនាំ​ឆ្លាត​វៃ​និង​មាន​ទំនាក់ទំនង​ល្អជា​មួយ​ប្រទេស​ជិតខាង មាន​ស្ថេ​រ​ភាព​នយោបាយ មាន​គោលនយោបាយ​ច្រើន​ទាក់ទង​វិនិយោគិន ប្រជាជន​ចិន​មាន​សេចក្ដី​ស្រលាញ់​ចំពោះ​ប្រជាជន​កម្ពុជា និង​មាន​អរិយធម៌​ប្រហាក់ប្រហែល​គ្នា​ផង​ដែរ​។ បាន​ជម្រុញ​ឲ្យ​កូន​ខ្មែរ​ខិតខំ​រៀនសូត្រ និង​មាន​អាហារូបករណ៍​ទៅ​រៀន​នៅ​ប្រទេស​ចិន ដើម្បី​ទទួល​បាន​ជំនាញ​ផ្សេង​ៗ​សម្រាប់​អនាគត​របស់​ខ្លួន​និង​ចូលរួម​អភិវឌ្ឍន៍​ប្រទេស​។

ក្នុង​ឱកាស​នោះ​ក៏​មាន​ជូន​លិខិត​ថ្លែងអំណរគុណ​ដល់​ក្រុមហ៊ុន​ម្ចាស់​ជំនួយ​ក្រុមហ៊ុន​សាងសង់ និង​ជូន​ផលិត​ផល​ក្នុងស្រុក​មាន​អំបុក ស្ករត្នោត ផ្លែ​ដូង ក្រឡាន ដល់​គណៈអធិបតី ដើម្បី​បង្កើន​ភាព​ស្និទ្ធស្នាល​រវាង​ចិន​និង​កម្ពុជា​ផង​ដែរ​៕ (​កែសម្រួល​ដោយ ៖ ធីតា​)

Facebook Google Twitter Email

ព្រឹត្តិការណ៍សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

០៨:៥០ | ក្នុងស្រុក

តើ​នឹង​មាន​អ្វី​កើតឡើង នៅ​ពេល​តារា​សម្តែង​ភាពយន្ត​ដ៏​ល្បី ទេព រិ​ន​ដា​រ៉ូ និង​តារា​ល្បី​ក្នុង​បណ្តាញ​សង្គម ហេង វិសាល ប្រឈម​មុខ​នឹង​សត្វព្រៃ​នៅ​ខេត្តបាត់ដំបង?

ការស្ទង់មតិគេហទំព័រថ្មី




សូម​អរគុណ