រាជធានីភ្នំពេញ ៖ បុរសម្នាក់ ជាជាងបៀកថ្នាំតាមជញ្ជាំង បានរងរបួសយ៉ាងធ្ងន់ ដេកដួលក្នុងថ្លុកឈាម និងត្រូវបានបញ្ជូនទៅកាន់មន្ទីរពេទ្យកាល់ម៉ែត ដើម្បីសង្គ្រោះបន្ទាន់ ក្រោយពីជនមិនស្គាល់មុខមួយក្រុម មានគ្នាចំនួន៦នាក់ ប្រដាប់ដោយកាំបិតប៉័ងតោ គ្រប់ដៃ ជិះម៉ូតូចំនួន៣គ្រឿង បានធ្វើសកម្មភាពកាប់ប្រហារ ជាច្រើនកាំបិត ខណៈពេលរូបគេកំពុងឈរបៀកថ្នាំជញ្ជាំងផ្ទះល្វែងមួយកន្លែង ។
គេសង្ស័យថា អំពើហិង្សានេះ មានជាប់ពាក់ព័ន្ធនឹងរឿងស្នេហាត្រីកោណ គឺជនរងគ្រោះរូបនេះទៅស្រឡាញ់ស្ត្រីម្នាក់ ដែលលែងលះប្តីមិនទាន់ដាច់ស្រេច ហើយត្រូវបក្សពួកប្តីស្ត្រីរូបនោះ តាមទៅកាប់ប្រហារបែបនេះតែម្តង ។ ហេតុការណ៍នេះ បង្កឱ្យមានការភ្ញាក់ផ្អើលឡើង កាលពីវេលាម៉ោង២ និង២០នាទីរសៀល ថ្ងៃទី២២ មេសា នៅការដ្ឋានសំណង់ផ្ទះល្វែងមួយកន្លែង ស្ថិតនៅក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ។
បុរសរងគ្រោះឈ្មោះ អ៊ុយ អាយ អាយុ២៧ឆ្នាំ ស្នាក់នៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតក្នុងភូមិក្រឡោង ឃុំទឹកថ្លា ស្រុកស្វាយអន្ទរ ខេត្តព្រៃវែង បានរងរបួសជិត៣០កំាំបិត គឺរបួសសុសសាច់ ខ្លួនប្រាណ ដៃជើង និងក្បាល ដួលសន្លប់ក្នុងថ្លុកឈាម ។ ដោយឡែក ក្រុមជនដៃដល់ មានគ្នាចំនួន៦នាក់ ប្រដាប់ដោយកាំបិតប៉័ងតោគ្រប់ដៃ និងជិះម៉ូតូចំនួន៣គ្រឿង ក្នុងនោះមានគេស្គាល់១គ្រឿងគឺ ឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ ៣២៦៧ ។ ក្រោយពេលកាប់ប្រហាររួចហើយ ក្រុមជនទាំងនោះក៏បាននាំគ្នាជិះម៉ូតូគេចខ្លួនបាត់ស្រមោល ។
ប្រភពព័ត៌មានឱ្យដឹងថា មុនពេលកើតហេតុ ជនរងគ្រោះកំពុងបៀកថ្នាំជញ្ជាំងផ្ទះល្វែងមួយ នៅចំណុចខាងលើ ហើយនៅទីនោះក៏មានជាងដែក ជាងកំបោរនៅធ្វើការដែរ ។ ខណៈនោះ ស្រាប់តែជនទាំង៦នាក់ ជិះម៉ូតូទៅដល់ ហើយឈប់នៅខាងមុខផ្ទះ រួចដើរចូលទៅធ្វើសកម្មភាពកាប់ប្រហារទាំងកំរោលទៅលើជនរងគ្រោះ បណ្ដាលឱ្យរងរបួសយ៉ាងធ្ងន់ រួចហើយពួកគេបាននាំគ្នាឡើងជិះម៉ូតូគេចខ្លួនបាត់អស់ទៅ ។ ចំណែកជនរងគ្រោះរត់ចេញពីក្នុងផ្ទះល្វែងនោះបានចម្ងាយប្រមាណជាង១០ម៉ែត្រ ក៏ដួលដេកនៅមុខផ្ទះ ។ អ្វីដែលគួរឱ្យហួសចិត្ដនោះ គឺខណៈពេលមានករណីនេះកើតឡើង ជាងដែក និងជាងកំបោរ៤ទៅ៥នាក់ ដែលនៅក្បែរគ្នា មិនមានអ្នកណាម្នាក់ចិត្ដសឿងហា៊នចូលទៅជួយជនរងគ្រោះឡើយ គឺម្នាក់ៗបានត្រឹមតែនាំគ្នាឈរមើលក្នុងភាពស្រឡាំងកាំងប៉ុណ្ណោះ ។
ទាក់ទិននឹងករណីនេះ ជាជំហានដំបូងត្រូវបានសមត្ថកិច្ចដាក់ការសង្ស័យថា ជាករណីផ្ដើមចេញពីរឿងស្នេហាត្រីកោណ ហើយប្រជាពលរដ្ឋបានប្រាប់ប៉ូលិសថា កន្លងមកថ្មីៗនេះ ជនរងគ្រោះបានស្រឡាញ់គ្នាជាមួយស្រ្ដីម្នាក់ ហើយស្រ្ដីរូបនោះបានប្រាប់ថា នាងជាស្រ្ដីមេម៉ាយ ដោយនាងបានលែងលះប្ដីដាច់ស្រឡះហើយ ។ ម៉្យាងទៀត ពេលពួកគេទៅណាមកណា ក៏ធ្លាប់បានបណ្ដើរគ្នាដូចជាប្ដីប្រពន្ធទៀតផង ហើយត្រូវបុរសជាប្ដីតាមទាន់ ។
តាមប្រភពព័ត៌មានថា ស្ដ្រីម្នាក់នេះ បានទាក់ទងជាមួយជនរងគ្រោះក៏ដើម្បីបញ្ឈឺប្ដីរបស់ខ្លួនដែរ ទើបមានរឿងត្រូវគេកាប់បែបនេះ ។ ទោះបីជាយ៉ាងណា គេមិនទាន់ដឹងថា ការកាប់ប្រហារនេះ មានមូលហេតុពិតប្រាកដយ៉ាងណានៅឡើយទេ ព្រោះជនរងគ្រោះមិនអាចនិយាយបានឡើយ គឺរងរបួសធ្ងន់ ៕
ចែករំលែកព័តមាននេះ