ខេត្តស្វាយរៀង ៖ កម្មករ-កម្មការិនីនៅតំបន់សេដ្ឋកិច្ចពិសេសចំនួន៣ក្នុងក្រុងបាវិត សរុបប្រមាណជិត៦.០០០នាក់ បានធ្វើកូដកម្មដាច់ដោយឡែកពីគ្នា ដែលខ្លះទាមទារប្រាក់រង្វាន់៥០ដុល្លារក្នុងថ្ងៃចូលឆ្នាំថ្មីប្រពៃណីជាតិ ខ្លះទាមទារកុំឱ្យថៅកែរោងចក្រកាត់ប្រាក់៥០%សម្រាប់ថ្ងៃ១៧ មេសា និងខ្លះទាមទារឱ្យថៅកែរោងចក្របញ្ឈប់កម្មករជនជាតិវៀតណាម និងទាមទារឱ្យមានការដោះលែងសកម្មជន កម្មករ និងសហជីព២១នាក់ ។
ការធ្វើកូដកម្មនេះ មានរយៈពេល៤ថ្ងៃជាប់គ្នាមកហើយ ដែលក្នុងអំឡុងពេលនៃការធ្វើកូដកម្មនេះក៏មានកម្មការិនីម្នាក់ខ្យល់គរស្លាប់ដែរ ពេលដឹកដល់មន្ទីរពេទ្យ ។ បើតាមមន្ត្រីនគរបាលក្រុងបាវិត ឱ្យដឹងថា ក្រុមកម្មករ-កម្មការិនីរោងចក្រជិត៦ពាន់នាក់ បានធ្វើកូដកម្មមិនចូលធ្វើការ ចាប់តាំងពីថ្ងៃសៅរ៍ ទី១៩ មេសា ដែលរហូតមកដល់ថ្ងៃទី២២ មេសា មានរយៈពេល៤ថ្ងៃហើយ និងមាន៦រោងចក្រ ។ នៅតំបន់សេដ្ឋកិច្ចពិសេសមេនហាតធេន ស្ថិតនៅភូមិតាពៅ សង្កាត់បាវិត ក្រុងបាវិត មាន៣រោងចក្រ គឺរោងចក្របេសវ៉េ (Best Way) ដំឡើងកង់ មានកម្មករ១.៥៧៧នាក់ ទាមទារប្រាក់ចូលឆ្នាំខ្មែរ៥០ដុល្លារ រោងចក្រអង្គរស្រ្ពីង ផលិតពូក មានកម្មករ១៤៧នាក់ ទាមទារប្រាក់ចូលឆ្នាំខ្មែរ៥០ដុល្លារ និងទាមទារដកកម្មករជនជាតិវៀតណាមចេញពីរោងចក្រ និងរោងចក្រអុិចស្ទេន ផលិតខោខូវប៊យ មានកម្មករ-កម្មការិនី២.៣៥៥នាក់ ទាមទារប្រាក់៥០ដុល្លារ រង្វាន់ថ្ងៃចូលឆ្នាំខ្មែរ ។
នៅតំបន់សេដ្ឋកិច្ចពិសេសតាយសេង ស្ថិតនៅភូមិតាបិប សង្កាត់បាវិត មាន២រោងចក្រ គឺរោងចក្រស្មាតថេច មានកម្មករ-កម្មការិនី១.១១៥នាក់ ទាមទារកុំឱ្យថៅកែកាត់ប្រាក់ខែ ថ្ងៃ១៧ មេសា ចំនួន៥០% និងទាមទារឱ្យថៅកែផ្តល់ប្រាក់ថ្ងៃបុណ្យចូលឆ្នាំខ្មែរ៥០ដុល្លារ ។ ទាមទារឱ្យដោះលែងសកម្មជនសហជីព និងកម្មករចំនួន២១នាក់ចេញពីពន្ធនាគារ ។ ក្រុមកម្មករបានដាក់មេក្រូប្រកាសនៅមុខតំបន់សេដ្ឋកិច្ចពិសេសតាយសេង អស់រយៈពេលប្រមាណ២ម៉ោងនៅវេលាម៉ោង៩ព្រឹកថ្ងៃទី២១ មេសា ដែលមានសហជីពចំនួន៦ មកចូលរួម តែដោយត្រូវសមត្ថកិច្ចបង្ក្រាប ក៏នាំគ្នាត្រឡប់ទៅរាជធានីភ្នំពេញវិញ ។ សមត្ថកិច្ចបានចោទថា ក្រុមសហជីពទាំង៦ បានមកញុះញង់កម្មករឱ្យធ្វើកូដកម្មខុសគោលដៅរបស់កម្មករ កម្មការិនីចង់បាន ។ ចំណែករោងចក្រភូមិផ្តៅ មានកម្មករ៧០នាក់ទាមទារប្រាក់៥០ដុល្លារថ្ងៃចូលឆ្នាំខ្មែរដែរ ។
ដោយឡែក នៅតំបន់សេដ្ឋកិច្ចពិសេសសានតុង ភូមិព្រៃធំ សង្កាត់ព្រៃអង្គញ់ ក្រុងបាវិត មានកម្មករ៧០០នាក់ទាមទារប្រាក់ថ្ងៃចូលឆ្នាំ៥០ដុល្លារ ។ ការទាមទារនេះថៅកែរោងចក្រទាំង៦ខាងលើមិនព្រមផ្តល់ឱ្យដោយនិយាយថា ខុសពីច្បាប់កំណត់ ។ នៅថ្ងៃទី២២ មេសា វេលាម៉ោង៩ព្រឹក នៅតំបន់សេដ្ឋកិច្ចពិសេសមេនហាតធេន តំណាងអាជ្ញាធរខេត្ត-ក្រុង និងមន្ទីរការងារ បានកោះហៅនាយករោងចក្រទាំង៦ មកប្រជុំ ក៏បុ៉ន្តែលទ្ធផលពុំដឹងយ៉ាងណាទេ ។ អ្នកសារព័ត៌មានមិនត្រូវបានអនុញ្ញាតឱ្យចូលស្តាប់ឡើយ ដោយសារលោក អ៊ូ សុខខឿន អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តប្រចាំការនៅតំបន់សេដ្ឋកិច្ចពិសេសមិនអនុញ្ញាតឱ្យចូលស្តាប់ ។
ក្នុងអំឡុងពេលនៃការធ្វើកូដកម្មនេះដែរ ក៏មានកម្មការិនីម្នាក់ឈ្មោះ ឡាំ ធឿន អាយុ៣៥ឆ្នាំ ជាកម្មការិនីរោងចក្រសានតុង ស្ថិតក្នុងភូមិព្រៃធំ សង្កាត់ព្រៃអង្គញ់ ក្រុងបាវិត មានទីលំនៅភូមិស្រម៉ជ្រំ សង្កាត់សង្ឃ័រ ក្រុងស្វាយរៀង ខ្យល់គរស្លាប់ពេលដឹកមកដល់មន្ទីរពេទ្យបង្អែកស្រុកប្រតិបត្តិជីភូ នាថ្ងៃទី២១ មេសា វេលាម៉ោង៨ព្រឹក ។ មន្ត្រីសមត្ថកិច្ចឱ្យដឹងថា ការស្លាប់របស់កម្មការិនីម្នាក់នេះមិនពាក់ព័ន្ធនឹងការធ្វើកូដកម្មនោះទេ គឺខ្យល់គរពេលចូលធ្វើការ ហើយត្រូវបានខាងរោងចក្រដឹកបញ្ជូនមកមន្ទីរពេទ្យបង្អែកជីភូដើម្បីសង្គ្រោះ បុ៉ន្តែមិនអាចសង្គ្រោះបាន ។ នៅក្នុងការធ្វើកូដកម្មនេះ ក្រុមកម្មករ-កម្មការិនីបានព្រមានថា បើគ្មានដំណោះស្រាយទេ ពួកគេមិនបញ្ឈប់កូដកម្មនេះឡើយ ៕
ចែករំលែកព័តមាននេះ