រាជធានីភ្នំពេញ ៖ ព្រះចៅអធិការវត្តកោះពោធិវង្ស ហៅវត្តកោះលោកយាយជំទាវតី ស្ថិតក្នុងភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ រួមនឹងពុទ្ធបរិស័ទបានធ្វើការអំពាវនាវដល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជួយធ្វើអន្តរាគមន៍ទាមទារដីទំហំ៣០ម៉ែត្រគុណ១៧០ម៉ែត្រ ដែលក្រុមហ៊ុនរំលោភយកនៅក្នុងបរិវេណវត្ត ។
រាជធានីភ្នំពេញ ៖ ព្រះចៅអធិការវត្តកោះពោធិវង្ស ហៅវត្តកោះលោកយាយជំទាវតី ស្ថិតក្នុងភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ រួមនឹងពុទ្ធបរិស័ទបានធ្វើការអំពាវនាវដល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជួយធ្វើអន្តរាគមន៍ទាមទារដីទំហំ៣០ម៉ែត្រគុណ១៧០ម៉ែត្រ ដែលក្រុមហ៊ុនរំលោភយកនៅក្នុងបរិវេណវត្ត ។
ការប្រមូលផ្ដុំគ្នាទាំងព្រះសង្ឃនិងពុទ្ធបរិស័ទនេះបានធ្វើឡើងដោយសន្ដិវិធីនៅក្នុងបរិវេណវត្តខាងលើកាលពីព្រឹកថ្ងៃទី២២ មេសា ។ ព្រះទេវសត្ថា ពឿយ មេត្ដា ព្រះចៅអធិការវត្តកោះពោធិវង្សមានថេរដីកាថា កាលពីដើមឡើយដីវត្តទាំងអស់មានទំហំ១០០ម៉ែត្រគុណនឹង១៧០ម៉ែត្រ ជាទីកន្លែងដែលប្រជាពុទ្ធបរិស័ទចំណុះជើងវត្តបានចាត់ទុកជាទីសក្ការៈគោរពបូជាតាំងពីបុរាណកាលមក និងដីផ្លូវចាស់ចូលវត្តមានទទឹង១២ម៉ែត្រ និងបណ្ដោយ២៤៤ម៉ែត្រ ។ ព្រះអង្គមានថេរដីកាបន្តថា ក្នុងឆ្នាំ២០០៩ លោកឧកញ៉ាឈាង ប៉ាក់សួរ និងលោក ជា ខេមា អភិបាលរងខណ្ឌសែនសុខ បាននាំកម្លាំងប៉ូលិសមួយចំនួនមកបិទវត្តនិងឱ្យព្រះសង្ឃ និងពុទ្ធបរិស័ទចេញដោយសំអាងហេតុផលថាវត្តនេះត្រូវរុះរើព្រោះរាជរដ្ឋាភិបាលត្រូវយកទីនោះធ្វើជាអាងស្ដុកទឹកសម្រាប់រាជធានីភ្នំពេញ ។
ការបណ្ដេញចេញនេះធ្វើឱ្យមានការប៉ះទង្គិចគ្នាជាមួយព្រះសង្ឃ និងពុទ្ធបរិស័ទចំណុះជើងវត្ត ។ ប៉ុន្តែដោយហេតុផលថា វត្តមានច្បាប់ត្រឹមត្រូវទើបព្រះសង្ឃ និងពុទ្ធបរិស័ទនាំយករឿងទាំងនោះទៅទូលថ្វាយសម្ដេចព្រះមហាសុមេធាធិបតីនន្ទ ង៉ែត និងជម្រាបលោក មិន ឃិន រដ្ឋមន្ត្រីក្រសួងធម្មការ និងសាសនា ដើម្បីផ្ទៀងផ្ទាត់ឯកសារ ។ ដោយឃើញឯកសារត្រឹមត្រូវជាផ្លូវការរួចហើយ សម្ដេចព្រះមហាសុមេធាធិបតី និងលោករដ្ឋមន្ត្រី ក៏បានចេញលិខិតជាផ្លូវការមួយច្បាស់លាស់បន្ថែមទៀត ។
លុះមកដល់ចុងឆ្នាំ២០១២ លោកឧញ៉ានិងលោកអភិបាលរងខណ្ឌបាននាំគ្នាមកបិទវត្តម្ដងទៀតដោយមិនឱ្យព្រះសង្ឃកសាងអ្វីៗទាំងអស់ ហើយបានប្រាប់ថា រាជរដ្ឋាភិបាលមិនអនុញ្ញាតឱ្យធ្វើទេ ព្រោះដីនេះប៉ះចំលើគម្រោងប្រព័ន្ធលូទឹករាជធានីភ្នំពេញ ដូច្នេះត្រូវតែរុះរើចេញ ។ ពេលនោះព្រះសង្ឃនិងពុទ្ធបរិស័ទបានពិភាក្សាគ្នាថាបើវត្តប៉ះចំលើគម្រោងស្ដុកទឹករាជធានីភ្នំពេញមែន ពួកយើងគួរតែពិចារណាហើយរក្សាភាពស្ងៀមស្ងាត់ចាំមើលថា តើរាជរដ្ឋាភិបាលអភិវឌ្ឍគម្រោងនេះឬយ៉ាងណា? ផ្ទុយទៅវិញ លោកឧកញ៉ា និងលោកអភិបាលរងខណ្ឌ បែរជាមករំលោភយកដីវត្តអស់ទំហំទទឹង៤០ម៉ែត្រ និងបណ្ដោយ១៧០ម៉ែត្រ ។ ពេលនោះព្រះសង្ឃនិង ពុទ្ធបរិស័ទឃើញភាពមិនប្រក្រតី ក៏នាំគ្នាតវ៉ាទើបលោកឧកញ៉ានិងលោកអភិបាលរងខណ្ឌដកថយ១០ម៉ែត្រ ហើយគំរាមថារាជរដ្ឋាភិបាលសម្ដេចតេជោ ហ៊ុន សែន ឱ្យពួកគេមកអភិវឌ្ឍតំបន់នេះ ត្រូវទុកទំហំដីវត្តត្រឹមតែ៧០ម៉ែត្រគុណនឹង១៧០ម៉ែត្រប៉ុណ្ណោះ ។
ទោះជាយ៉ាងណាក្ដី ព្រះចៅអធិការបានលើកឡើងទៀតថា រាល់សេចក្ដីជូនដំណឹងរបស់លោកឧកញ៉ា និងអភិបាលរងខណ្ឌ យកមកបង្ហាញមិនបានប្រកាសប្រាប់ដល់ព្រះសង្ឃនិងពុទ្ធបរិស័ទឱ្យបានច្បាស់លាស់ឡើយគឺមានភាពលាក់លៀម ។ ព្រះអង្គមានថេរដីកាទៀតថា នឹងដាក់ពាក្យបណ្ដឹងជូនសម្ដេចតេជោនាយករដ្ឋមន្ត្រីឱ្យជួយអន្តរាគមន៍ពីបញ្ហានេះ ។ ព្រះអង្គបញ្ជាក់ថា មូលហេតុដែលព្រះអង្គនិងពុទ្ធបរិស័ទស្នើសុំអន្តរាគមន៍ពីសម្ដេចតេជោ និងមិនដាក់ពាក្យប្ដឹងតាមឋានានុក្រមព្រោះថា ការដាក់ពាក្យប្ដឹងនៅតាមថ្នាក់មិនអាចដោះស្រាយជូនព្រះអង្គ និងពុទ្ធបរិស័ទបានទេ ដោយសារអ្នកដែលរំលោភយកសុទ្ធតែមានបុណ្យស័ក្ដិធំ ។ ព្រះអង្គស្នើសុំឱ្យការសាងសង់បុរីដែលកំពុងសាងសង់លើដីមានជម្លោះមិនទាន់ដោះស្រាយចប់នោះបញ្ឈប់សកម្មភាពរង់ចាំការដោះស្រាយពីសម្ដេចតេជោនាយករដ្ឋមន្ត្រី កាត់ក្ដីយ៉ាងណាទើបអនុញ្ញាតឱ្យធ្វើបន្ត ។
តាមពាក្យបណ្ដឹងដែលគ្រោងនឹងដាក់ជូនសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ព្រះចៅអធិការវត្តបានប្ដឹងលោកឧកញ៉ាឈាង ប៉ាក់សួរ និងលោក ជា ខេមា អភិបាលរងខណ្ឌសែនសុខ ពីករណីរំលោភបំពានយកដីកម្មសិទ្ធិស្របច្បាប់របស់វត្តកោះពោធិវង្សមកសាងសាង់ជាបុរីសម្រាប់លក់ដើម្បីបំពេញផលប្រយោជន៍ផ្ទាល់ខ្លួន ។ ក្នុងពាក្យបណ្ដឹងបានលើកឡើងថា ក្នុងឆ្នាំ២០១៣កន្លងមក លោកឧកញ៉ាឈាង ប៉ាក់សួរ និងលោកអភិបាលរងខណ្ឌជា ខេមា បានរំលោភបំពានយកដីស្របច្បាប់របស់វត្តដែលមានដីផ្លូវចាស់ចូលវត្តមានទទឹង១២ម៉ែត្រ និងបណ្ដោយ២៤៨ម៉ែត្រ ដីក្នុងវត្តមានទទឹង៣០ម៉ែត្រ និងបណ្ដោយប្រវែង១៥០ម៉ែត្រ ដីកោះលោកយាយជំទាវតី មានទទឹង២០ម៉ែត្រ និងបណ្ដោយ៣០ម៉ែត្រ ផ្ទៃដីវត្តមានទំហំសរុប១០០ម៉ែត្រគុណនឹង១៧០ម៉ែត្រ ផ្ទៃដីដែលបានបាត់បង់ចំនួន៣០ម៉ែត្រx១៧០ម៉ែត្រ និងផ្ទៃដីនៅសល់ចំនួន៧០ម៉ែត្រx១៧០ ម៉ែត្រ ។
លោក សុខ ម៉ូវម៉ានិត អភិបាលរងខណ្ឌសែនសុខ ដែលមានវត្តមាននៅកន្លែងប្រមូលផ្ដុំនេះបានមានប្រសាសន៍យ៉ាងខ្លីថា រូបលោកមកក្នុងពិធីស្នើសុំជួយអន្តរាគមន៍ពីសម្ដេចអគ្គមហាសេនាបតីតេជោ ហ៊ុន សែន ពីសំណាក់ព្រះចៅអធិការវត្ត និងពុទ្ធបរិស័ទចំណុះជើងវត្តកោះពោធិវង្សគឺដើម្បីយកពាក្យបណ្ដឹងរបស់ព្រះចៅអធិការនិងដើម្បីរាយការណ៍ជូនលោកអភិបាលខណ្ឌតែប៉ុណ្ណោះ ។
ចំពោះរឿងផ្សេងពីនេះ លោកបានបដិសេធមិននិយាយ ។ សូមបញ្ជាក់ថា ពុទ្ធបរិស័ទព្រមទាំងព្រះសង្ឃដែលមានវត្តមានប្រមាណជា៥០០អង្គ/នាក់ នៅក្នុងពិធីនោះបានលើកបដាសុំឱ្យសម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ជួយធ្វើអន្តរាគមន៍ និងរកដំណោះស្រាយពីបញ្ហារំលោភយកដីវត្តកោះពោធិវង្ស អស់ទទឹងប្រវែង៣០ម៉ែត្រ និងបណ្ដោយ១៧០ម៉ែត្រ និងផ្លូវចាស់ចូលវត្តទទឹង១២ម៉ែត្រ និងបណ្ដោយ២៤៨ម៉ែត្រ ត្រូវតែប្រគេនដល់ព្រះសង្ឃ និងជូនពុទ្ធបរិស័ទវិញ ។
វត្តកោះពោធិវង្ស ស្ថិតនៅក្នុងស្ថានភាពមិនទាន់មានការសាងសង់ជាដុំកំភួននៅឡើយ និងកំពុងតែចាក់ដីលុបកន្លែងលិចទឹកព្រោះថាទីធ្លាវត្តភាគច្រើនសុទ្ធតែលិចទឹក ។ ព្រះចៅអធិការវត្ត និងពុទ្ធបរិស័ទក្នុងស្រុក និងក្រៅស្រុកបាននាំគ្នាប្រមូលបច្ច័យដើម្បីទិញដីចាក់លុបបន្ថែមទៀតតែដល់ពេលមានបញ្ហាក៏ផ្អាកការសាង សង់ ។ មិនទាន់អាចសុំការបំភ្លឺណាមួយបានទេ ទាក់ទិននឹងការចោទប្រកាន់ពីសំណាក់ព្រះសង្ឃចំពោះលោកឧកញ៉ាឈាង ប៉ាក់សួរ និងលោក ជា ខេមា ក្នុងថ្ងៃដដែលនោះ ៕
ចែករំលែកព័តមាននេះ