រាជធានីភ្នំពេញ ៖ ជនសង្ស័យចំនួន០២នាក់ត្រូវកម្លាំងនគរបាលខណ្ឌទួលគោក សហការជាមួយនគរបាលរដ្ឋបាលផ្សារដេប៉ូទី៣ ឃាត់ខ្លួនកាលពីវេលាម៉ោង៩និង៣០នាទីព្រឹកថ្ងៃទី២២ មេសា នៅចំណុចផ្ទះជួសជុលម៉ូតូធំមុខវត្តនាគវ័ន ក្នុងសង្កាត់ផ្សារដេប៉ូទី៣ ដោយជាប់ពាក់ព័ន្ធភ្ជង់ប្លន់យកម៉ូតូម៉ាកយ៉ាម៉ាហាRX ពណ៌ស មួយគ្រឿង និងគ្រឿងអលង្ការនៅកោះពេជ្រ កាលពីយប់ថ្ងៃទី៩ មេសា ព្រមទាំងដកហូតបានម៉ូតូនោះត្រឡប់មកវិញ។
បន្ទាប់ពីឃាត់ខ្លួនសមត្ថកិច្ចដកហូតបានម៉ូតូម៉ាកហុងដាឌ្រីមសេ១២៥ ស៊េរី២០១៣ ពណ៌ក្រហម មួយគ្រឿងទៀត ដែលជននោះធ្វើសកម្មភាពប្លន់យកបានកាលពីវេលាម៉ោង៨ព្រឹកថ្ងៃទី១១ មេសា នៅសង្កាត់ចាក់អង្រែលើ ខណ្ឌមានជ័យ។ ជនសង្ស័យដែលត្រូវចាប់ខ្លួន១-ឈ្មោះអ៊ុច ដារ៉ា ភេទប្រុស អាយុ២២ឆ្នាំ និង២-ឈ្មោះមាន សុខសាន្ត ភេទប្រុស អាយុ២៧ឆ្នាំ ។ ពួកគេទាំង២នាក់មានលំនៅសង្កាត់ច្បារអំពៅទី២ ខណ្ឌមានជ័យ។
តាមមន្រ្តីនគរបាលខណ្ឌទួលគោកឱ្យដឹងថា កាលពីវេលាម៉ោង១១និង១០នាទីយប់ថ្ងៃទី៩ មេសា មានជនសង្ស័យ០២នាក់ប្រដាប់ដោយកាំភ្លើងខ្លីបានធ្វើសកម្មភាពភ្ជង់ប្លន់យកម៉ូតូម៉ាកយ៉ាម៉ាហាRX ពណ៌ស មួយគ្រឿង ខ្សែ.កផ្លាកទីនទម្ងន់៦ជីកន្លះ ទូរស័ព្ទ៣គ្រឿងនិងកាបូបមានប្រាក់ចំនួនជិត២០០ដុល្លារ ព្រមទាំងឯកសារមួយចំនួន។ អំពើប្លន់នេះកើតឡើង ខណៈដែលឈ្មោះដាំ សួគ៌ា ភេទប្រុស អាយុ២៨ឆ្នាំ មានលំនៅភូមិគីរីថ្មី ឃុំសំរោងលើ ស្រុកអង្គស្នួល ខេត្តកណ្តាល ជាម្ចាស់ម៉ូតូកំពុងអង្គុយលេងសាសងគ្នាជាមួយសង្សានៅកោះពេជ្រ ក្នុងសង្កាត់ទន្លេបាសាក់ ខណ្ឌចំការមន។
ចែករំលែកព័តមាននេះ